Bibliapillatami Bibliapa nishcacunata aliguta intindichunga yachachin. Taita Diospa Shimitaca tucuicunami intindita ushanchi. Bibliata intindinaca ni pipa “na yapa shinllichu” can (Deuteronomio 30:11).

Bibliata intindingapaca ¿imatata minishtinchi?

1.   Humildemi cana canchi. Biblia Taita Diospa Shimi cashcata criingapaca humildemi cana canchi. Taita Diosca jariyashcacunataca na ricunayachinchu (1 Tesalonicenses 2:13; Santiago 4:6). Shinallata feta charina cashcamandalla na charina canchichu. Taita Diosca paimanda yachajuchunmi munan (Romanos 12:1, 2).

2.   Ali yachaitami oracionbi mañana canchi. Bibliapica Proverbios 3:5​pica, cashnami nin: “Aligutapacha yarishpami purini yashpaca, ama jariyanguichu”. Bibliata aliguta intindingapaca ʹali yachaita [o sabiduriata] Taita Diosta cutin cutin mañanacaʹ minishtirishcapachami can (Santiago 1:5).

3.   Cada punllami Bibliata liina capanchi. Bibliamanda huaquinbilla yachajunapa randica Bibliamanda cada punlla yachajushpami Bibliataca ashtahuan aliguta intindita ushapangui (Josué 1:8).

4.   Tema por tema yachajupashunchi. Bibliapa yachachishcacunata aliguta intindi ushachunga tema por tema yachajunami ayudanga. Callaripica facillla yuyaicunatami yachajuita ushapangui. Jipaca ‘ashtahuan alipacha yachajushpami ñaupaman’ catita ushapangui (Hebreos 6:1, 2). Shuj shuj versocunata comparashpa ricujpica Bibliaca chai yuyaicunatalla intindichijtami ricunchi. ‘Na ñapash intindi ushanalla yuyaicunatapashmi’ intindita ushanchi (2 Pedro 3:16).

5.   Ayudata mascapai. Bibliata aliguta intindijcunapa ayudata chasquichunmi Bibliapica animan (Hechos 8:30, 31). Testigo de Jehovacunaca Bibliamandaca gratismi yachachin. Cunanbipash punda Jesusta catijcunashnallatami shuj gentecunaman Bibliamanda aliguta intindichita ushangapaca paicunarami Bibliapa textocunapi imata nijujtaca aliguta intindin (Hechos 17:2, 3).

Bibliata intindingapaca imata na minishtirin

1.   Ali estudiashcacunaca na cana canchichu. Huaquin gentecunaca Jesuspa 12 apostolcunataca ‘na estudiashca yangalla gentecuna’ can nijpipash Bibliamandaca aliguta intindishpami paicunaca shujcunamanbash yachachita usharca (Hechos 4:13).

2.   Culquita charina. Bibliamanda yachajungapaca imatapash na paganachu can. Jesusca paipa discipulocunamanga cashnami nirca: “Gratismi chasquircanguichi y gratismi cuna canguichi” (Mateo 10:8).