Perdonanaca pipash ñucanchita llaquichishca cajpipash, paita disculpanata o paipa pandarishcata ñana yarijunatami nisha nin. Bibliapi griego shimipi “perdonana” nishpaca “yalichun saquina” nisha ninmi. Por ejemplo shuj dibita ñana cobrashpa yalichun saquinata. Jesusca paipa discipulocunataca oracionda ruranatami yachachijurca. Chaipica pecadocunata dibihuan comparashpami cashna nirca: “Imashinami ñucanchita nalita rurajcunata, o ‘dibijcunata’ perdonashcanchi, shinallata ñucanchi pecadocunatapash perdonapangui” nirca (Lucas 11:4, nota). Shinallata, millai esclavopa comparacionmanda Jesús parlajushpaca perdonanaca shuj dibita pagashcashnami can nircami (Mateo 18:23-35).

 Huaquinbica imatapash rurashpami pipash ñucanchita llaquichin, o chashna llaquichishcamandami imatapash pirdina tucushcanchi. Pero perdonashpaca paicunahuanga ñana risintirishca canachu capanchi. Shinallata imatapash cuchun o recompensachunga na exigijunachu capanchi. Bibliapica juyaimandami perdonana canchi ninmi. Porque “juyaita charijcunaca na risintirishcalla causanllu” (1 Corintios 13:4, 5).

Perdonashpaca:

•   Nali ruraicunata alicachijushcataca na nijunllu. Bibliapica nali ruraicunataca nimamanda na alicachinachu canguichi ninmi (Isaías 5:20).

•   Imapash na pasashca cajpishnaca na quidanachu cana can. Taita Diosca Davidpa jatun nali pecadocunatapash perdonarcami. Pero Davidca paipa nali ruraicunamandaca jatun llaquicunatami aguantana tucurca. Ashtahuanbash Taita Diosca gentecuna cunan punllacunapipash yachachunmi Davidpa pecadocunataca Bibliapi escribichishpa saquirca (2 Samuel 12:9-13).

•   Shujcuna ñucanchimanda aprovecharichun saquina cashcataca na nijunllu. Por ejemplo: Shuj personaman culquita mañachishcanchiman. Pero chai personaca mañachishca culquita yangata malgastashpa, pagasha nishpapash pagangapaj na munashcanman. Shinashpaca chai personaca nali sintirishpa ñucanchitaca perdonda mañashcanman. Perdonda mañajpica paita perdonashpami paihuanga ñana resentido cana canchi, ni imata rurashcatapash ñana cutin cutin reclamanajunachu canchi. Talvez dibi culquitapash na cobrashpachari saquina tucunchi. Shinapash jipacunaman chai personaman culquita mañachinata o na mañachinataca aligutami pensarina canchi (Salmo 37:21; Proverbios 14:15; 22:3; Gálatas 6:7).

•   Na yangata perdonanataca nijunllu. Yachashca jahua, nali munaihuan pecadocunata rurajcunata, nalita rurashcata na reconocingapaj munajcunata, aliman tigrangapaj na munajcunata o perdonda mañangapaj na munajcunatapash Taita Diosca na perdonanllu (Proverbios 28:13; Hechos 26:20; Hebreos 10:26). Na arripintiringapaj munaj personacunaca Taita Diospa contrami tucun. Taita Diosca pai na perdonashca personacunata ñucanchipash perdonachunga na obliganllu (Salmo 139:21, 22).

   Pero pipash ñucanchita nalita tratashpa disculparingapapash na munajpi o pandarishcata na reconocingapaj munajpica ¿imata pasan? Bibliapica, “ninanda fiñarinata saquishpa, chai fiñarinataca shitai” ninmi (Salmo 37:8). Ñucanchita llaquichijpipash culira vincichunga na saquinachu canchi. Chaipa randica Taita Diosca shuj justo Dios cashcatami confiana canchi (Hebreos 10:30, 31). Ashtahuanbash, imashina llaquichishca cajpipash chai llaquicunataca ñallami Taita Diosca tucuchinga (Isaías 65:17; Apocalipsis 21:4).

•   Huaquinbica imagumandapash perdonda mañachun munanchi. Huaquinbica na imatapash rurajpita culira sintirishpami tucuimanda perdonda mañachun munanchi. Bibliapica ninmi: “Cambaj yuyaipica, ama ñapash fiñaringuichu. Shinlli shungu runacunapaj yuyaipimi, chashna fiñarinaca tiajun” ninmi (Eclesiastés 7:9).

Perdonachunga ¿imata ayudai ushan?

1.   Perdonana ima significashcatami yarina cangui. Bibliapica pecadoca alimi can nitapash na nijunllu, ni nunca na imapash pasashcajpishna quidana cashcatapash na nijunllu. Sino ñana cutin cutin yarijunatami nin.

2.   Perdonana imamanda ali cashcatami pensarina canchi. Culirata yalichishpa o resintirishca canata saquishpaca tranquilomi sintirichun. Ñucanchi saludpash mejorangami y cushillami sintirishun (Proverbios 14:30; Mateo 5:9). Ashtahuanbash ñucanchi pecadocunata Taita Dios perdonachun munashpaca, shujcunata perdonanaca importantepachami can (Mateo 6:14, 15).

3.   Tucuicunallatami pandarinchi (Santiago 3:2). Ni pipash na perfecto canchichu. Imashinami ñucanchita perdonachun munanchi, shinallatami shujcunatapash perdonana canchi (Mateo 7:12).

4.   Shujcunata intindinami canchi. Imapash pandarishcagulla cajpica, Bibliapica ‘caishuj chaishujmi aguantarina’ canguichi ninmi (Colosenses 3:13).

5.   Uchami perdonana canchi. Ashtahuan ashtahuan culirajunapa randica, uchalla perdonangapami esforzarina canchi (Efesios 4:26, 27).