Santiago 1:1-27
1 Ñucaca Santiagomi capani. Taita Diospa esclavo, shinallata Señor Jesucristopa esclavomi capani. Shuj shuj pushtucunapi causangapaj rishca 12 jatun familiacunatami saludajupani.
2 Ñuca huauquicunalla, shuj shuj pruebacunata charishpaca, ninandami cushijuna capanguichi.
3 Imashinami yachapanguichi, pruebacunata mishashpami tucui shunguhuan crishcata ricuchipanguichi. Shina rurashpami aguantashpa causanata yachajupanguichi.
4 Y aguantashpa catishpami quiquingunaca ima pandapash illa* canata y tucuita ali ruranatapash aliguta yachajupanguichi.
5 Shinaca, ali yachaita pipash minishtijushpaca, Taita Diostami cutin cutin mañana can. Shina mañashpami, ali yachajushca canata chasquinga. Porque Taita Diosca na culirashpa, tucui shunguhuanmi ashtacata caranata yachan.
6 Pero nimata na dudashpa tucui shunguhuan crishpami mañashpa catina can. Porque dudanata yachajcunaca, huaira apajpi caiman chaiman cuyuchi tucushca mar yacupi olacunashnami can.
7 Ashtahuangarin, shina dudanata yachajcunaca Jehová* Diosmandaca na imatapash chasquingachu.
8 Shina gentecunaca, ishcai shungu gentecunashnami can. Imata ruranatapash na atinajcunami can.
9 Shinapash pobrella huauquica, Taita Dios alipi churajpimi cushijuna can.
10 Pero charij huauquica pingaichi tucushcamandami cushijuna can. Porque charijcunaca pambapi sisacunashnami tucuringa.
11 Indi llujshishpa ushashcata indijpimi, plantacunaca anguyan y sisagucunapash anguyan. Chaimi plantagucunaca ñana juyaillagu ricurin. Shina cuendami charijcunaca, culquitalla mascanajuimandaca tucuringa.
12 Pruebacunata charishpapash, aguantashpa catijcunaca cushijunami can. Pruebacunata aguantashpaca, causaita cuj coronatami chasquinga. Chai coronataca, Jehová* Diosmi paita juyashpa catijcunaman carasha nishpa prometishca.
13 Pruebacunahuan cashpaca nipipash na ninachu can: “Taita Diosmi cai pruebataca cachamuhuashca” nishpa. Porque Taita Diosca nalita rurachunga nipita na tentanllu. Taita Diostapash nalicunata rurachunga nipipash na tentaita ushanllu.
14 Ashtahuangarin, cada unomi paicunapa propio munaicunata ninanda alicachimanda o munaimanda tentai tucun.
15 Shinami, chai munaica ashtahuan ashtahuan mirashpa pecadopi urmachin. Y chai pecadoca huañuimanmi apan.
16 Ñuca juyashca huauquicunalla, na quiquingunallata umachirinachu capanguichi.
17 Taita Diosmi jahua cielomandaca ashtahuan alipacha regalocunata caramun. Paipa carashcacunaca siempremi perfecto can. Paimi jahua cielopi michagucunatapash* rurashca. Aunque sombra cambiajpipash, paica nunca na cambianllu.
18 Taita Diosca paipa voluntad cajpimi, ñucanchicuna paipa cabal yachachishcacunata crishcamandaca ñucanchicunamanga causaita cararca. Paipa rurashcacunamanda primero agllashcacuna cachunmi shina rurarca.
19 Ñuca juyashca huauquicunalla, caita yachachunmi munapani, uyangapaca listomi cana capanguichi. Uyangapaj listo cashpapash na ñapash imatapash ninajunachu capanguichi, ni ñapash culirajllapash na canachu capanguichi.
20 Culirashpaca, Taita Diospa ñaupapi ima ali cashcata ruraitaca* gentecunaca na ushanllu.
21 Shinaca, ima mapatapash, ima nalicunatapash tucuitami quiquingunamandaca anchuchina capanguichi. Ashtahuangarin, salvaita ushaj Taita Diospa shimita humildadhuan chasquishpami, quiquingunapa shungupi sapiyachun saquina capanguichi.
22 Shinapash, Taita Diospa shimita uyashpallaca na quidanachu* capanguichi. Sino pactachinami capanguichi. Shinallata Taita Diospa shimita uyashpallata suficientemi can yashpaca, na pandarinachu capanguichi.
23 Porque Taita Diospa shimita uyashpapash na pactachijcunaca, ñavita espejopi ricurij runashnami can.
24 Paica, espejopi ricurishpapash chaimanda rishpaca pai imashina cashcataca ñapash cunganllami.
25 Cutin libre cachun ayudaj Taita Diospa alipacha leyta aliguta ricushpa pactachishpa causajujca, uyaitallaca na uyanllu. Ni cungaitapash na cunganllu. Sino Taita Diospa obratami ruran. Y chaita rurashpaca cushillami canga.
26 Taita Diostami adorajuni* yashpapash, shimi llujshishcata parlajca* paillatami paipa shungupi umachirijun. Paica yangami Taita Diostaca adorajun.
27 Ñucanchi Taita Diosca, paita limpio, ima mapapash illa adorachunmi munan. Chaipaca caitami rurana capanchi, taitamama illa sufrinajuj huahuacunatapash y sufrinajuj viuda huarmigucunatapashmi cuidana capanchi. Cai mundopa nali ruraicunamandapash separadomi cashpa catina capanchi.
Notacuna
^ O “completo”.
^ Caipica “indimanda, lunamanda, estrellacunamandami” parlajun.
^ O “saquirinachu”.
^ O “religiosomi cani”.
^ Griego shimipica “jalluta na controlajca” nijunmi.
