Caipi yuyapai: Brianga ishcai cumbacuna paipaman shamunajujta ricushpami ninanda manllarin. Cai semanapillami ña ishcai viajeta tabacota chupai nishca. Cutinmi chaitallata ningapaj quimirinajun.

Paicunamanda shujca cashnami nin:

Shinami ashata asirishpa shuj tabacota bolsillomanda llujchishpa jaica nin.

Tabacota ricushpacarin Brianga ashtahuanmi manllarin.

Quiquin Brian cashpaca ¿imatashi ruranguiman?

Brianba cumbacunaca ¿imata ruranajushcataca yachanllu? ¿Paicunallatachu shina ruranata decidishca? Na, na shina canllu. Tal vez shujcuna rurajta ricushpa, cumbacunapa ñaupajpi ali quedangapallami shina ruranajunga. Shinami paicunapa causaipi shujcuna satirichun saquin.

Quiquinbash Brian shina pasajushpa, shujcuna nishcatalla ama rurangapaca ¿imatashi ruranguiman?

1. ALI RURANATAMI RICUNA CANGUI

   Bibliapica ninmi: “Ali yuyaita charij runaca, ima llaqui japinata ricushpaca pacajunmi. Ashtahuangarin na yachajushca runacunaca, yangata rishpa llaquichi tucunllami” nishpa (Proverbios 22:3).

   Huaquinbica ima problema tianataca ricurinllami. Yuyapai, quiquin rijujpi ashtaca jovenguna fumajujta, drogarijujta ricushcanguiman. Imata ruranata ali yachashpaca na chaitallataca yalinguimanllu.

2. ALIGUTA PENSARINGUI

   Bibliapica ninmi: “Ali yuyaihuanmi [o ali concienciahuanmi, NM] causana canguichi” nishpa (1 Pedro 3:16).

   Tapuripai: “Tucuicuna rurashcata ñuca catishpaca ¿imashinashi sintirisha?” nishpa. Colegiopi cumbacunaca asha tiempota alicachijpipash, ¿imashinashi jipamanga sintirisha? ¿Cumbacunata manllaimandallachu, quiquimba crishcata, ali yuyaicunatapash yangapi saquigringui? (Éxodo 23:2).

3. IMATA RURANATA AGLLANGUI

   Bibliapica ninmi: “Alipacha yachajushca runaca, nalita ruranata manllashpa caruyanmi” nishpa (Proverbios 14:16).

   Siempremi tucuicuna imata ruranatapash agllana tucunchi. Jipaman ima tucujpipash ñucanchillatami responsable cashun. Chaimandami Bibliapica Josemanda, Jobmanda, Jesusmanda parlan. Paicunaca siempremi ali decisiongunata agllarca. Shinallata Caín, Esaú, Judasmandapashmi parlan. Paicunaca nali decidircachu. ¿Quiquinga imatata ruragringui?

Bibliapica ninmi: “Nalita ruranataca, na ricunayachishpa, alita ruranata catinguichi” nishpa (Romanos 12:9). Imata ruranata decidishpapash, ima pasanataca ñami ali yachangui. Shinaca ashata shinlli cajpipash imata ruragrijushpapash pimanbash parlanami cangui. Shina ruranami ali can.

Ama yapata preocuparichu, cumbacunamanga na tucuita nijunachu cangui. Imapash nalita rurachun nijpica na manllashpa na ninallami cangui. Shinallata imatapash na nishcata intindichunga, cashna ninallami cangui:

• “Chaitaca na apoyashachu”.

• “Chaicunataca na ruranichu”.

• “Ñuca pensashcataca yachanguichimi”.

Uchalla na nishpa tigrachijpica, cumbacunaca ñana cutin cutin caita o chaita rurai ninajungachu.

Tal vez quiquinba cumbacunaca pingaichingapaj munashpami cashna ninga: “Canhuanga ¿imata pasan? ¿Manllajunguichu?” nishpa. Casi siempremi shina nishpa paicunapa munashcata rurachun munanga. Shina nijpica ¿imatata rurana cangui? Cai ishcai yuyaicunapi pensaripai:

• 1. Cashna ninallami cangui: “Ari manllanimi” nishpa. Jipamanga imamanda imatapash na rurangapaj munashcata intindichingui.

• 2. Cashna ninallami cangui: “Quiquinshna ali pensarij jovenga na fumajunmanllu” nishpa. Shinallata imamanda na fumangapaj munashcata intindichingui.

Cutin cutin imatapash rurachun ninajujpica, anchurinami cangui. Yaripai: chaipi uyashpa shayajujpica, ashtahuanmi imatapash rurachun munanga. Chaimanda anchurishpaca imata ruranatapash quiquinllata ali yachashcatami ricuchingui.

Alimi yachanchi: siempremi huaquingunaca paicunapa munashcata rurachun munanga. Shina pasajpi imata ruranata, imata ninataca yachanami cangui. Shinallami shujcunapa munashcataca na rurangui. Imata ruranataca canllatami ali agllana cangui (Josué 24:15).