Cusahuarmi causachun Jehová Dios callarichishpaca, huahuacunata charishpa cuidachunmi mingarca (Proverbios 6:20). Shinaca quiquingunami huahuacunamanga Jehová Diosta juyachun yachachina capanguichi. Shinami paicuna jatunyashpaca imacunatapash ali ruranata yachajunga. (2 Timoteo 1:5; 3:15). Shinallata huahuacunapa shungupi imata charishcata yachanami capanguichi. Chaipaca quiquingunapa ejemplopash minishtirishcami can. Shinaca Taitamamacuna Diospa Shimimanda huahuacunaman yachachingapaj munashpaca, quiquingunarami Taita Diospa mandashcataca shungupi charina capanguichi (Salmo 40:8).

BIBLIAPICA NINMI: Imaguta cashpapash tucuicunallatami aliguta uyajcuna, aliguta yarishpara parlajcuna cana canguichi nishpa (Santiago 1:19). Huahuacuna na manllashpa parlachunmi taitamamacunaca munapanguichi. Paicuna parlangapaj munajpica, quiquingunaca alimi uyana capanguichi. Shinallata huahuacuna parlajujpica tranquilo sintirichunmi ayudana capanguichi (Santiago 3:18). Yapata culirashpa huahuacunata imatapash nali rurashcanguichu nijpica, manllaimanda imashina sintirishcataca na villangapaj munangachu. Chaimandami na culirashpa paicunata juyashcataca yarichijuna capanguichi (Mateo 3:17; 1 Corintios 8:1).

CAITA RURAPANGUI:

• Huahuacuna parlangapaj munajpica uyangapaj tiempota llujchinami capanguichi

• Huahuacunahuan parlangapaca shuj problema tiachunga na shuyanachu capanguichi, siempremi paicunahuanga parlana capanguichi

BIBLIAPICA NINMI: “Aligutapacha yarishpa purij tucui runacunaca, ali yachaihuanmi imatapash ruranajun” nishpa (Proverbios 13:16). Huahuacuna imatapash nijujpica na yangata uyana cashcamandaca uyanachu can. Shinallata imashina sintirijta ali cuenta japishpami paicunata ashtahuan intindipanguichi. Jovengunaca na pensarishpa yangata imatapash ninllami, cutin huaquinbica napash problema cajpitami yapata preocuparin. Chaimandami Bibliapica nin, “Narapash uyashpata imatapash tigrachijlla runaca, muspa runashnami” can nishpa (Proverbios 18:13). Shinaca, taitamamacunaca na ñapash culiranachu capanguichi (Proverbios 19:11).

CAITA RURAPANGUI:

• Huahuacuna parlajujpica, parlachun saquipai, imata villajujpipash ñapash culirashpaca na caparinachu capangui

• Quiquin joven cashpa ima problemacuna charishcata, imashina sintirishcatami yarina capangui

BIBLIAPICA NINMI: “Ñuca huahualla, ali causachun cambaj taita yachachishcataca, aliguta uyangui. Ali causachun cambaj mama yachachishcatapash, ama yangapi churanguichu” nishpa (Proverbios 1:8). Jehová Diosca ishcanditami huahuacunata ali viñachichun mingashca. Chaimandami huahuacuna respetachun, cazuchunga taitamamacuna yachachina capanguichi. (Efesios 6:2, 3). Taitamamacuna na “shujlla yuyai” charishcataca ñapashmi cuenta japin (1 Corintios 1:10). Chaimandami cusahuarmi imapipash na igual pensarishpaca, huahuacunapa ñaupajpica na culirarijunachu capanguichi. Chaita ricushpaca huahuacunaca ñana respetangapaj munangachu.

CAITA RURAPANGUI:

• Huahuacunata imashina yachachinataca ishcandi parlaripanguichi

• Huahuacunata yachachinamanda cusahuarmi na igual pensashpapash, intindiringapaj parlaripanguichi

BIBLIAPICA NINMI: Huahuata ali yachachipangui nishpa (Proverbios 22:6). Huahuacunata ali viñachingapaj munashpaca, imashina yachachinata, imashina consejanataca cusahuarmimi yachana capanguichi (Proverbios 29:17). Huahuacunata aliguta yachachingapaca astina, tacurijunallaca na minishtirinllu, chaipa randica taitamamacuna imamanda imagutapash mandashcata cazunata intindichunmi ayudana capanguichi (Proverbios 28:7). Bibliapi consejocunata cazuchun, ali intindichun yachachipanguichi (Salmo 1:2). Shinami ima ali cashcata, ima nali cashcatapash agllai ushanga (Hebreos 5:14).

CAITA RURAPANGUI:

• Taita Dios cierto tiashcata crichun, paipi confiachun huahuacunata ayudapaichi

• Huahuacuna imata rurashpa, imata pensashpapash, tucuipi limpio cachunmi, taitamamacuna ayudana capanguichi. Shinallata Internetpi mensajecunata cachana paginacunapica, jovengunata violashpa huaglichingapaj mascaj gentecunami tian. Chaicunahuan ama umachi tucuchunmi taitamamacunaca ayudana capanguichi