HUAQUIN GENTECUNACA NINMI.

Ashtaca gentecunaca gobiernopa leycunapi chai pugllaicunamanda na imatapash nijujpica, pugllanallami ninmi. Huaquinbicarin gobiernollatami lotería pugllaicunata organizashpa chai culquicunataca huaquin gentecunata ayudangapaj utilizan.

BIBLIAPICA NINMI.

Bibliapica apostashpa pugllanamandapachaca na imatapash ninllu. Shinapash apostashpa pugllanamanda Taita Dios imata yuyajta intindichunga huaquin ali consejocunatami ricuchin.

Gentecunaca culquita munaimandami apostashpa pugllan. Shinapash chaita ruranaca nalichu canman. Jesusca “charij tucunatalla na munashpami, aliguta yarishpa causana canguichi” nishpami consejarca (Lucas 12:15). Gentecunaca ashtaca culquita charingapaj munaimandami pugllan. Na ganana cajpipash, apostashpa pugllaicunata organizajcunaca ashtaca culquicunatami gananguichi nishpami anunciocunata churan. Chariyangapaj munaimandaca gentecunaca ashtaca culquicunata apostashpami pugllai callarin. Chai pugllaicunaca gentecunata ama ambicioso cachun ayudanapa randica na trabajashpata culquita fácil ganachunmi animan.

Apostashpa pugllajcunaca paicuna ganangapaca chaishuj pugllajcuna perdichunmi shuyan. Shinapash Bibliapica “pipash na quiquimbajlla ali cachun, imatapash ruranachu. Ashtahuangarin shujpajpash, ali cachunmi, imatapash rurana” cashcatami nin (1 Corintios 10:24). Diez Mandamientocunapica “imatalla charishcacunatapash, chai cumba runagupajtaca ama munanguichu” nijunmi (Éxodo 20:17). Ganangapapacha munajcunaca shujcunapi na pensarishpa, paicuna ganana culquipillami pensarin.

Bibliapica suertepi na crina cashcatami nin. Punda tiempopi israelitacunaca Taita Diospi na feta charishpami, suerteta cuj nishca yanga diostara adorai callarirca. Pero chaitaca Taita Diosca ¿imashinata ricurca? Paica nircami: “Ñuca ñaupajpica, nalitarami rurarcanguichi. Shina rurashpami, ñuca na ricunayachishcatara agllarcanguichi” ninmi (Isaías 65:​11, 12).

Huaquin llactacunapica chai pugllaicunamandami autoridadcunaca gentecunata ayudangapaj nishpami culquita llujchin. Por ejemplo, chai pugllaicunamanda llujchishca culquihuanmi pobrella gentecunata ayudan o escuelacunatapashmi ruran. Chai culquita imashina utilizashpapash chai culquica apostanamandami llujshin. Chaimandami chai pugllaicunaca gentecuna ashtahuan codicioso cachun, paicunapilla pensarichun, imatapash na rurashpata cosascunata charina munaita charichunmi ayudan.

“Imatalla charishcacunatapash, chai cumba runagupajtaca ama munanguichu” (Éxodo 20:17).

BIBLIAPICA NINMI.

Bibliapica “charijyangapaj munajcunaca, imatapash nalita yarichijuj nali munaicuna urmachingapaj shamujpimi, lazupishna urmashpa imatapash nalitara ruranajun. Shinamandami shinlli shungu tucushpa, ninandapacha culquita munai huaglichishpa, gentecunataca ninanda llaquichishpa, chingaita chinganaman apajun” ninmi (1 Timoteo 6:9). Gentecunaca codicioso caimandami apostashpa pugllan. Codicioso canaca napacha alichu. Chaimandami Bibliapica napacha codicioso cana cashcata yachachin (Efesios 5:3).

Apostashpa pugllajcunaca culquita fácil japimandami culquitara juyai callarin. Chaimandami Bibliapica “culquita juyashpa causanami, imatapash nalitalla ruranataca sapishna callarichin” ninmi. Culquita charinapilla yuyashpa causaj gentecunaca ansiedad nishca unguitapashmi japita ushan, shinallata Taita Diosmandapash caruyaita ushan. Bibliapica ashtahuan culquita charingapaj munajcunaca “ninan llaquicunata apanajun” ninmi (1 Timoteo 6:10).

Codicioso gentecunaca paicuna charishca cosascunahuan na cushilla cashpa, ashtahuan charingapaj munaimandami cushilla causaitaca na ushan. Chaimandami Eclesiastés 5:10​pica: “Culquita ninanda juyaj runaca, culquita mashnata charishpapash na cushijunllu. Imatapash charinacunata ninanda juyaj runapash chai charishcahuanga, ima alitapash na japinllu” ninmi.

Apostashpa pugllanata yachajushpaca chai pugllaitaca fácil saquitaca na ushanllu. Por ejemplo, Estados Unidos llactapica ashtaca millón gentecunami apostashpa pugllana viciopi urmashca.

Proverbios 20:21​pica codicioso gentecunaca ashtaca culquita chari ushashpapash Taita Diospa bendiciondaca na charita ushangachu ninmi. Shinallata apostashpa pugllajcunaca ninanda dibi tucuimandami amigocunata, trabajota, familiatapash perdita ushan. Chaimandami Bibliapica chai pugllaicunapi ama urmachun ali consejocunata cun.

“Charijyangapaj munajcunaca, imatapash nalita yarichijuj nali munaicuna urmachingapaj shamujpimi, lazupishna urmashpa imatapash nalitara ruranajun. Shinamandami shinlli shungu tucushpa, ninandapacha culquita munai huaglichishpa, gentecunataca ninanda llaquichishpa, chingaita chinganaman apajun” (1 Timoteo 6:9).