Taitamamacunapash huahuacunapash aliguta parlashpaca, imata yuyashcata, imashina sintirishcatami nin.

Solteroyajuj churiguhuan parlanaca shinllimi can. Huahuacuna uchilla cashpaca tucuitami parlangapaj munan. Shinapash viñashpaca, ñana parlangapaj munanllu. Paicuna imata pensajta, imashina sintirijtaca ñana yachai ushanchichu. Paicunahuanga huaicu chaishuj ladopi shayajuj cuendami canchi. Shinapash, chai ratocunapimi huahuacunaca taitamamacunahuan parlanata minishtinajun.

Quiquinba churi parlangapaj munajpica yapa tuta cajpipash parlanallami capangui.

Lisaca ninmi: “Huaquinbica ‘punlla entero igual cashpatachu cunan ratopira nijungui’ yashpami rimangapaj munanchi. Shinapash parlangapaj munajujpica na quejarijunachu capangui. Taitamamacunaca huahuacuna parlachunmi munanchi” nin.

Robertoca ninmi: “Ali horasta puñunata gushtashpapash, chaupi tuta yalicunapimi huaquinbica ñuca churicunahuan aliguta parlaita ushashcani” nishpa.

BIBLIAPICA NINMI: ‘Pipash na quiquinballa ali cachun, imatapash ruranachu. Shujpajpash ali cachunmi, imatapash rurana’ can nishpa (1 Corintios 10:24).

Aliguta uyapangui. Shuj taitaca ninmi: “Huahuacuna parlajujpica shuj cosascunapirami huaquinbica pensajuni. Shina rurajpica huahuacunapash cuenta japinmi” nishpa.

Quiquinbash shina ruranata yachashpaca televisionda apagashpa, celularta o imatapash ladoman saquishpami, quiquinba churi imata nijujtaca aliguta uyana capangui. Shinami, huahuapa uchilla cosascunapipash preocuparishcata ricuchijupangui.

Mariaca ninmi: “Paicunapi preocuparishcata na sintishpaca, huahuacunaca na parlangapaj munangachu, shuj gentecunahuanrami parlangapaj munanga” nishpa.

Antonioca ninmi: “Imacunata parlajpipash na manllarijunachu capanchi” nishpa.

BIBLIAPICA NINMI: “Aliguta uyaichi” nishpa (Lucas 8:18, NM).

Tiempotaca aliguta aprovechapangui. Huaquinbica tranquilo pushtugupimi huahuacunaca taitamamacunahuan parlangapaj munan.

Ninaca ninmi: “Carropi rinajuj tiempotami aprovechanchi. Chimbapura tiarishpa parlanapa randica ladopi tiajuimandami aliguta parlai ushashcanchi” nishpa.

Micuna horascunapi parlanapash alipachami can.

Raulca ninmi: “Micunajushpami chai punllapi tucui ima pasashcata parlanchi. Chaimi tucuicuna aliguta llevarinchi, ima problemacuna ricurijpipash ayudarinchi” nishpa.

BIBLIAPICA NINMI: ‘Tucuicunallatami aliguta uyajcuna, aliguta yarishpara rimajcuna cana canguichi’ nishpa (Santiago 1:19).