¿Imashinata Taita Dioshuan ali caita ushapanchi?
Imashinami callari temapi ricuparcanchi, ashtaca gentecunami Bibliaca Diospa shimi cashcata crin. Bibliata liishpa, chai nishcacunata causaipi pactachishpami, gentecunaca Taita Diospaman ashtahuan quimirishpa ali causai tianata crishpa cushilla causan.
Bibliapica alita rurashpa causangapaj esforzarijcunatami ‘Diospa espirituta’ charijcuna can nishpa rijsin (Judas 18, 19). Taita Diosta sirvij gentecunaca Taita Diospimi confian. Cutin Taita Diosta na sirvij gentecunaca paicunapillami confian (Efesios 5:1).
SHAMUJ PUNLLACUNAPI ALI CAUSAI TIANAPI PENSARINA
BIBLIAPICA NINMI: “Imatalla rurana punllapi imata ruranatapash na munashpaca, ushai illajmi tucungui” (Proverbios 24:10).
¿IMATATA NINGAPAJ MUNAN? Cada punllami shuj shuj llaquicunahuan o problemacunahuan chimbapurana tucunchi. Shinapash desanimarishca cashpaca chai llaquicunata chimbapuraitaca na usharingachu. Shamuj punllacunapi ali causai tianata yaria causanami, ima llaquicuna ricurijpipash ñaupaman catichun ayudan. Shinallata llaquicunata chimbapurana asha tiempopalla cashcata, llaquicunata charishpapash shuj ali causai tianapi pensarichunmi ayudan.
¿IMATATA RURAI USHAPANGUI? Ali punllacuna tianapimi yaria causana capangui. Tucui ali pasachunga na shuyanachu capangui. Chaipa randica cada unomi imagutapash rurangapaj munashpaca esforzarina can. Shinapash imagutapash pactachingapaj munashpapash siempremi shuj shuj jarcaicuna o imacunapash ricurita ushan (Eclesiastés 9:11). Shinapash tucui ali llujshinata pensarinami ali can. Por ejemplo, tarpunahuan chimbapurashpami Bibliapica cashna nin: “Tutamanda muyuta tarpushpaca, chishimambash na samashpa tarpunguilla. Punda tarpushca, jipa tarpushca, maijan ali canatapash na yachanguichu. Na cashpaca, ishcandillata alimi canman” nishpa (Eclesiastés 11:6).
GENTECUNA YACHANGAPAJ MUNASHCA TAPUICUNATACA ¿MAIPITA YACHAI USHANCHI?
BIBLIAPICA NINMI: “Tucui cambaj Shimicunaca, napacha llullachu” (Salmo 119:160).
¿IMATATA NINGAPAJ MUNAN? Casi tucui gentecuna rurashca tapuicunatami Bibliapica tarita ushapanchi. Por ejemplo, cai cati tapuicunata:
-
¿Imapata caipi capanchi?
-
¿Imamandata llaquicunahuan causapanchi?
-
Huañushca jipaca ¿imata tucunchi?
-
Shamuj punllacunapica ¿imashi pasanga?
Mundo enteromanda ashtaca gentecunaca cai tapuicunamanda, shuj tapuicunamandapash Bibliapi ima nishcata yachajushcamandami cunanbica cushilla causan.
¿IMATATA RURAI USHAPANGUI? Cai tapuicunamandapash, shuj tapuicunamandapash quiquinllata Bibliapi yachajuchunmi animapanchi. Shuj testigo de Jehovata Bibliamanda yachachichun mañapangui. Shinallata jw.org paginaman yaicupangui. Na cashpaca testigo de Jehovacunapa tandanajuiman rita ushapangui, gratismi can.
BIBLIAPA YACHACHISHCACUNA
jw.org/qvi direccionbi ¿Imamandata Bibliata yachajuna capanchi? nishca videota ricupangui. 880 yali shimicunapimi tian.
TAITA DIOSPAMAN QUIMIRINA
“Diosmanda yachajungapaj, paicunapaj shungupi ninanda munajcunaca, ninandami cushijun” (MATEO 5:3).
TAITA DIOSTA ALI RIJSINA
“Taita Diospajman quimirichi. Shina quimirijpica, paipash cangunapajman quimiringami” (SANTIAGO 4:8).
BIBLIATA LIINA, LIISHCAPI PENSARINA
“Ashtahuangarin Mandaj Dios [Jehová *] mandashcata pactachishpami cushijun. Tutapash, punllapash chai mandashcataca aliguta yariajunllami. [...] Tucui imata rurajpipash, ali llujshingallami” (SALMO 1:2, 3).
^ par. 23 Bibliata escribishca shimicunapica, Diospa shuti Jehová cashcatami ricuchin.
Cai temacunata ashtahuan liipai
VILLAJUN REVISTA
Bibliaca ¿ñucata ayudahuangacha?
Bibliaca punda tiempopi llujshishca cashpapash alipacha consejocunatami charin.
