“Cai punllacunapica ashtaca computadoracuna, aparatocuna, estudiashca gentecuna, ashtaca culquita charij gentecunami tian [...]. Shinapash cai cosascuna alishnalla ricurishpapash gentecunataca llaquimanmi apanajun”. (Foro Económico Mundial huata 2018manda Informe)

HUAQUIN ESTUDIASHCA GENTECUNACA SHAMUJ PUNLLACUNAPI PAICUNAHUAN, CAI ALPAHUANBASH IMA PASANATA YACHASHPACA NINANDAMI PREOCUPARIN. HUAQUIN LLAQUICUNAMANDA PARLAPASHUN.

• INTERNETPI LLAQUICHIJCUNA. Australiamanda shuj periodicopica: “Cunanbi Internetta utilizanaca na yapa alichu can, ashtahuan peligrosomi tucujun, internetpica huahuacunata llaquichingapaj munajcuna, imacunatapash nishpa mensajecunata cachashpa catiriashpa llaquichijcuna, troles * nishcacuna, computadoramanda, celularcunamanda, tabletcunamanda shujcunapa informaciongunata shuhuajcunami utilizan” ninmi. ‘Mundo enteropi shujcunapa informaciongunata shuhuajcunaca mirashpa catinajun. Internetca huaquin gentecuna millai, jatun nalicuna cashcatami ricuchin’ ninmi.

• NA TUCUICUNACHU CHARIJCUNA CAN. Pobrecunata ayudaj organizacionga: “Cai Alpapica 3.600 millón pobre gentecuna charishca culquitapash yalimi, 8 gentecunalla ashtaca culquita charin” ninmi. Shinallata culquita nali manejajushcamandami mundo enteropica “pobrecunamanda aprovecharishpa ashalla gentecuna charijyashpa catinajushca. Cutin pobre gentecunaca ashtahuanmi pobreyanajushca, aprovechari tucushcacunamandaca ashtacacunaca huarmicunami can” nircami. Chaimi huaquingunaca nishca “shina pasajuimandami gentecunaca ñalla reclamai callaringa” nishpa.

• GUERRACUNA, CATIRIASHPA LLAQUICHIJCUNA. Agencia de las Naciones Unidas huata 2018manda Informepica nircami: “Cunanbimi ashtaca gentecunaca paicunapa llactata saquishpa, shuj llactacunaman pacajungapaj yalinajushca” nishpa. Shinallata “Cada minutomi 30 gentecuna paicunapa llactacunamanda pacajushpa llujshinajun” nircami. Mundo enteropica 68 millón yali gentecunami guerracunamanda, catiriashpa llaquichijcunapa culpamanda paicunapa huasicunata saquishpa, shuj llactacunaman pacajungapaj rishca.

• CAI ALPATA TUCUCHINAJUN. Huata 2018manda shuj Informepica nircami: Cunanbica ‘huaquin plantacuna, animalcunaca tucuritapachami tucurinajun, huairata, mar yacuta ashtahuan mapayachinajushcamandami gentecunataca ungüicuna ashtahuan japinajushca’ nishpa. Shinallata ashtaca abejacuna, mariposacuna, picaflorcuna shuj shuj animalcunapashmi huaquin llactacunapica tucuritapacha tucurinajun. Cai animalgucunaca shuj sisa plantagumanda shuj sisagucunaman polén nishca jacuguta yalichishpami shuj plantacunapash tiashpa catichun ayudan. Cai animalgucuna tucurinajushcamandami cientificocunaca nishca cai Alpaca ashtahuanmi huaglishpa catinga nishpa.

Cai Alpapi tranquilo, ali causangapaca ¿imatata rurai ushapanchi? Huaquin gentecunaca yachajushpallami, ali causai usharinga ninmi. Shinapash ¿imatata yachajuna capanchi? Cai tapuicunamandaca cati temacunapimi yachajui ushapangui.