Jarcaicunata, llaquicunata charishpapash ñaupaman catichunmi ayudan. Shinapash caitaca tiempohuanmi yachajurin. Imashinami huahuacunaca puri callaritaca huaquin viajecunata urmashpara ali puri callarin, shinallatami causaipipash imagupipash pandarishpara imagutapash yachajurin.

Huaquin huahuacunaca imapash nali llujshijpi o pipash nalitami rurashcangui nishpa rimajpica, ninandami llaquiyan. Shujcunacarin imatapash rurashpa catingapapash ñana munanllu. Chaimandami huahuacunaca caita ali intindina can:

• Tucuita alipacha ruraitaca na usharinllu (Santiago 3:2).

• Tucuicunallatami imahorapash llaquicunata charinchi (Eclesiastés 9:12).

• Tucuicunallatami imatapash nali rurajpica shujcuna consejachun minishtinchi. Chaillami imagutapash yachajushun (Proverbios 9:9).

Imapi pandarishpapash ñaupaman catinata yachajushca huahuacunaca, ima llaquicunata chimbapurajushpapash tranquilomi causai ushanga.

Imapipash pandarijpi

BIBLIAPICA NINMI: “[Alita] ruraj runaca, canchiscaman urmashpapash, cutin jatarinllami” nishpa (Proverbios 24:16).

Huahuacunataca na tucui cosascunachu ali llujshinga nishpami animana capangui. Tapuripai. Quiquinba huahua shuj examenbi nali notata llujchishpaca: “¡Imatapash na ushanichu, yangamandami esforzarijuni!” ¿ninmanllu?

Huahuacunataca ñaupaman catingapaj imapi mejorana cashcata cuenta japichun ayudapai. Chaimi na ushanichu nishpa llaquirijunapa randica ñaupaman catinga.

Paicunapa problemacunatapash na quiquinra arreglajunachu capangui. Paicunallatami alita ruranata yachajuna can. Huahuacunataca cashna tapupangui: “Ali notata charingapaca ¿imatashi rurai ushanguiman?” nishpa.

Imapash llaqui pasajpi

BIBLIAPICA NINMI: ‘Caya punlla ima tucunatapash, na yachashpami causanguichi’ nishpa (Santiago 4:14).

 Causaipi ima pasanataca na yachanchichu. Ratomi ima ungüipash japinlla, culquipash illaj quedarinlla. Chaimi Bibliapica nin: ‘Runapash ima punlla ima tucunataca na yachanllu. Imashnami alasyu animalcunapash tugllapi huatarishpa japi tucun, shinallatami runacunapash nali punllacunapica ima llaquipipash lazupishna ñapash japi tucun’ nishpa (Eclesiastés 9:12).

Quiquinba huahuacunata imacunamandapash cuidangapaj munashpapash, tucuimanda cuidajuitaca na ushapanguichu.

Uchilla caimandaca tal vez trabajo illaj cana, culqui illaj cana problemacunataca na charingachu. Shinapash shuj problemacunatami chari ushan. Por ejemplo, shuj ali amigohuan ñana pundashna ali llevarita, o familiapi pipash huañujpi yapata llaquilla sintirita. a

Pipash consejajpi

BIBLIAPICA NINMI: “Rucuyashpapash alipacha yachajushca cangapaca, ali yuyaita cushcatapash uyangui” nishpa (Proverbios 19:20).

Pipash consejashpaca, butaitaca na butajunllu. Chaipa randica nali portarishcamanda, imapash nalita rurajushcamanda ama chaicunata rurashpa catichunmi animajun.

Uchillamandallata consejocunata aliguman chasquinata yachachinaca quiquinda, huahuacunatapashmi cushichinga. Johnga ninmi: “Huahuacunapa problemacunata ñucanchira arreglanajujpica, paicunaca imahorapash problemacunata arreglanataca na yachajungachu, siempremi problemacunata charijungalla. Chai problemacunaca tucuicunatallatami llaquichinga” nishpa.

Shujcuna consejajpi aliman consejocunata huahuacuna chasquichunga, escuelapi o maipi cashpapash pipash consejajpica quiquinra culirajunapa randica caitami huahuacunataca tapui ushapangui:

• “¿Imashpashi shina nirca?”.

• “¿Imapita mejorai ushanguiman?”.

• “Cutin shina pasajpica ¿imatata ruragringui?”.

Huahuacuna cunanbillata consejocunata aliguman chasquinata yachajushpaca, jipa punllacunapipashmi ali causai ushanga.