CALLARI TEMA | TUCUIPI HONRADO CASHUNCHI
Honrado canaca ¿cunanbica minishtirinllu?
Hitoshi shuti jarica, Japón llactamanda shuj empresapimi contabilidadpi trabajan carca. Shuj punllaca, cuentacunata revisajujpimi, jefeca chai cuenta rurashcacunata falsificanami cangui nirca. Shinapash, Hitoshica chaita rurashpaca ñuca concienciapi nali sintirishachu nircami. Chaimandami, jefeca trabajomanda llujchishpa cachashami nirca. Jipaca llujchishpa cacharcallatami.
Huaquin quillacuna yalijpipash, na llullashpa trabajana trabajota na tarishpami Hitoshica llaquirirca. Shuj trabajota ricungapaj rishpaca Hitoshica nircami, imatapash falsificaitaca na ushanichu nishpa. Chaipi trabajachijca nircami: “Can imamanda shina pensajtaca na intindinichu” nishpa. Familiapash, amigocunapash alitami rurajungui nishpa animajpipash, Hitoshica yangami honrado cani yashpami pensari callarirca. Paica ninmi: “Honrado canamanda imata ñuca pensashcataca, villanacha cani nishpami tapuri callarircani” nishpa.
Imashinami ricunchi, na tucuicunachu honrado gentecunata alicachin. Chaimandami huaquingunaca nin: Negociocunapi trabajangapaca honrado canaca na minishtirinllu nishpa. Sudáfrica llactamanda shuj huarmica nircami: “Ñuca trabajopi cumbacunaca na honrado canllu. Chaimandami honrado canaca ñucapaca shinlli can” nishpa.
Cunanbica casi tucui gentecunami llullashpalla causan. Massachusetts universidadmanda Robert Feldman psicologoca, huaquin huatacuna huashaman shuj investigacionda rurashpaca ricurcami, gentecuna 10 minutocunatalla parlashpapash 60% gentecunaca shuj viajellapash llullajta. Paica nircami: “Chaita ricushpaca manllarircanchimi. Gentecuna llullashpalla causajtaca na cuenta japishcarcanchichu” nishpa. ¿Imamandashi gentecunaca paicunata llullachun na munashpapash, llullashpalla causan?
¿Imamandata gentecunaca tucui ladocunapi llullashpalla, shuhuashpalla, nalita rurashpalla causan? Na honrado cashpaca ¿imashinata shujcunatapash llaquichinchi? Honrado cangapaca ¿imata rurana canchi?
