Pitapash ashtahuan ali rijsingapaca, pai imacunatalla rurashcata yachanaca minishtirishcami can. Shinallatami, Taita Diosta ashtahuan rijsingapaca pai imacunatalla rurashcata yachana capanchi. Taita Dios tucui gentecunamanda imatalla rurashcata yachana, shamuj punllacunapipash imacunatalla ruranata yachanami cushilla causachun ayudan.

Jehová Diosca ñucanchita Ruraj Diosmi can. Pai imashinapacha cajtaca ‘cai pachata pai rurashcamandapachami aligutapacha ricuchijun’ (Romanos 1:20). ‘Cai pachataca paipa ushaihuanmi rurarca. Cai pachataca alipacha yachaihuanmi aliguta jilapi churarca. Alipacha yachaihuanmi, jahua pachatapash churarca’ nishpa (Jeremías 10:12). Taita Diosca gentecunata juyashcataca paipa tucui rurashcacunapimi ricuchijun.

Taita Diosca “paishnalla rijchajtami” gentecunataca rurarca (Génesis 1:27). Chaimandami cushilla causai ushapanchi. Taita Dios imashina cajtaca ñucanchicunapashmi ashatallapash ricuchi ushapanchi. Paiman rijcha cashcamandaca, pai imata yuyashcata, paipa mandashcacunatapashmi intindi ushapanchi. Jehová Diospa mandashcacunata catishpaca paipa ali amigocuna tucushpami cushilla, ali causashun.

Jehová Dios gentecunata juyashcataca cai Alpapi rurashcacunata ricushpapashmi cuenta japipanchi. Apóstol Pabloca nircami: Taita Diosca “pai juyashpa charijushcatami ricuchin [...]. Chaimandami, tamiachishpa granocunatapash fucuchishpa, ñucanchiman ima aligutapash carashpa cushichijun” nishpa (Hechos 14:17). Cai Alpata rurashpaca ñucanchi minishtishcacunatallaca na caramurcachu, ashtahuangarin cushilla causachunmi ashtaca ashtaca cosascunatapash caramurca. Shamuj punllacunapicarin ashtahuan ali cosascunatami caramunga.

Jehová Diosca gentecuna para siempre causachunmi cai Alpataca rurarca. Bibliapica ninmi: “Cai pachataca, huañuna aichayu runacunamanmi cushca” nishpa. Shinallata: “Na yanga tiachunga rurarcachu, ashtahuangarin chaipi causanajuchunmi rurarca” nin (Salmo 115:16; Isaías 45:18). Shinapash ¿picunata chaipica causana carca? ¿Ima horacamanda causana carca? Bibliapica  ninmi: ‘Imatapash cashcatapacha rurajcunami, llactataca [o Alpataca] japinga. Chaipica, causaitami causanajunga’ nishpa (Salmo 37:29).

Jehová Dios, Adán y Evata rurashpaca para siempre causachunmi rurarca. Paicunataca shuj juyailla pushtugupimi ‘imatapash rurashpa, cuidachun churarca’ (Génesis 2:8, 15). Paicunataca: “Ninanda mirashpa, ashtacacunapacha tucushpa, cai pachapi jundanguichi. Cai pachapi imalla tiajcunata cazuchinguichi” nishpami mandarca (Génesis 1:28). Adán y Eva cai Alpapi para siempre causai ushashpapash, Taita Diosta na cazushcamandami causana oportunidadtaca chingachirca. Shinapash Jehová Diospa munaica na cambiashcachu. Paica cai Alpapi tucui gentecuna ali causachunmi munan. Chaipaca ¿imatallata Taita Diosca rurashca?

Taita Diosca paita rijsichun munaimandami Bibliataca cushca (Proverbios 2:1-5). Gentecuna Taita Diosmanda Bibliapi tucui tucuita yachajungapaj munajpipash na tucuitaca yachajui ushangachu, shuj librocunacarin na ayudangachu (Eclesiastés 3:11). Shinapash Bibliapi tiajuj tucui yuyaicunaca Taita Diosmanda yachajuchunmi ayudan. Bibliapica, Jehová Dios gentecunata imashina tratajta, paipa ñaupajpi ali ricuringapaj imacunatalla rurana cashcatami ricuchijun (Salmo 15:1-5). Shinallata, Jehová Dios paita imashina adorachun munashcata, paipa mandashcacuna ima cajta, culquimanda o shuj cosascunamanda imata yuyashcatapashmi yachajupanchi. Bibliapica, Taita Diospa churi Jesucristo imacunatalla nishcata, rurashcacunatapashmi liipanchi. Shinami Jehová Dios imashina cashcata cuenta japishpa, paimandaca ashtahuan yachajupanchi (Juan 14:9).

Jehová Diosca ali, cushilla, tranquilo causachunmi Bibliataca curca. Bibliapimi familia ucupi cushilla causangapaj imata rurana cashcata, llaquicunapi cashpa ama yapata pinarijungapaj imata rurana cashcatapash ricuchijun. Cati temapica imamanda ashtaca llaquicunahuan causajushcata, shamuj punllacunapipash ima laya causaigu tianata, shinallata Taita Dios paipa munaita pactachingapaj imatalla rurashcatami ricupashun.

Ashtaca cosascunata ricushpami Bibliaca Diospa Shimipacha cajta cuenta japinchi. Casi 40 jaricuna, casi mil 600 huatacunapi escribishca cajpipash, Bibliaca shuj yuyaimandallami parlan. Chaimi Taita Diospacha escribichishcataca crinchi (2 Timoteo 3:16). Ñaupa tiempocunamanda shuj librocunahuan ricujpica, Bibliapi escribishca yuyaicunaca na cambiashcachu. Chaitaca punda tiempopi Bibliata escribishca ashtaca ashtaca rollocunata ricushpami shina nipanchi. Shinallata Bibliata ama traducichun, shuj gentecunapash ama liichun jarcangapaj munajpipash, Bibliaca cunangamanmi tiashpa catishca. Cunanbica, mundo enteropimi Bibliaca shuj librocunatapash yali tauca shimicunapi traducishca, ashtahuan jaturishca libro can. Cunanbi, Bibliata charimandami ‘Diospa Shimica, causaita causaicamanmi causajungalla’ nipanchi (Isaías 40:8).

Taita Diosca paipa munaita pactachingapaca shuj juyailla regalotami cararca. Imashinami ña yachajupashcanchi, Taita Diosca gentecuna cai Alpapi para siempre causachunmi munarca. Shinapash Adán Taita Diosta na cazushcamandami Adanbash, paipa miraicunapash chai juyailla causaigutaca chingachirca. Chaimi Romanos 5:12​pica nin: “Juchata ruranaca, shujlla runamandami cai pachapica callarirca. Chai juchamandami, huañuipash callarirca. Shinallatami tucuicuna juchata rurashcamandaca, huañuipash tucuicunapajman yalijun” nishpa. Shinapash paipa munai pactarichunga ¿imatata Taita Diosca rurarca?

Alita ruraj Dios caimandami, Adán y Evataca castigarca. Shinapash gentecunata ninanda juyaimandami paicunata salvangapaj shuj arreglota rurarca. Jehová Dios ali yachaita charimandaca uchallami imata ruranata decidirca, shinallata imata ruragrijujtapashmi villarca (Génesis 3:15). Chaimi, juchamanda, huañuimandapash salvangapaj paipa Churi Jesusta cachamugrijurca.

 Gentecunaman causaiman apaj ñanmanda yachachichunmi, Jehová Diosca Jesusta cai Alpaman cachamurca. Shinallata gentecunamanda ‘huañushpa quishpichichunbashmi’ cachamurca a (Mateo 20:28; Juan 14:6). Jesusca Adanshnallatami jucha illaj carca. Shinapash tucuipimi Jehová Diostaca cazurca. Jesusca gentecunapa juchacunamanda, na huañuna cashpapash gentecunata juyaimandami huañurca. Chaimi Jehová Diosca cutin cielopi causachun Jesustaca causachirca. Chaimandami Romanos 5:19​pica nin: “Shujlla runa na cazujpimi, ashtacacuna juchayu tucushca. Shinallata shujlla runa cazushcamandami, ashtacacuna imatapash cashcatapacha rurajcuna canga” nishpa. Jesús huañushcamandami Jehová Diospa munaica pactaringa. Chaimandami gentecunaca cai Alpapi para siempre causai ushanga.

Adán na cazujpi, Jehová Dios imata rurashcata yachanami paita ashtahuan rijsichun ayudashca. Jehovapa munai pactarichunga imapash na jarcai ushanllu. Paipa nishcacunaca siempremi “ali llujshinga” (Isaías 55:11). Shinallata gentecunata ninanda juyashcatami ricuchin. Chaimi 1 Juan 4:9, 10​pica nin: “Causaita causagrinata ñucanchi japigrichunmi Taita Diosca, paipaj shujlla Churita cai pachaman cachamushpa, ñucanchita juyajushcata ricuchirca. Ñucanchica, Taita Diosta na juyashpami causarcanchi. Ashtahuangarin pairami ñucanchita juyarca. Paillatami, paipaj Churita ñucanchi juchacunata anchuchingapaj huañuchun cachamurca. Shina cachamushpami, ñucanchita juyajushcataca ricuchijun” nishpa.

Taita Diosca paipa shujlla Churitami gentecunamanda huañuchun cachamurca. Chaimandami Taita Dios ‘ñucanchiman tucui imagutapash caramunataca’ tucui shunguhuan cripanchi (Romanos 8:32). Taita Diosca ¿imatallata carasha nishca? Ricupashun.