APÓSTOL Pablopa punllacunapica shuj llactaman gentecunata apaj barcocunaca na tiarcachu. Chaimi pipash shuj llactaman ringapaj munashpaca chai llactaman cargata apaj barco tiajta o na tiajta, gentecunata apai ushanllu nishpapashmi tapuna carca (Hech. 21:2, 3). Shinapash gentecuna munashca llactaman barco na chayajpipash chai barcoman vitsanallami carca. Shinami barcocuna cargata saquingapaj maijan pushtupipash shayarijpica, gentecuna chayangapaj munashca llactaman shuj barcota mascanalla carca (Hech. 27:1-6).

Huatapica huaquin quillacunapillami barcopi shuj llactacunaman ri usharin carca. Shinallata barcocunaca paicuna llujshingapaj munashca horaspimi llujshin carca. Barcota manejajcunaca na ali tiempo cajpi o imapash pasanata crishpami na llujshin carca. Por ejemplo, shuj cuervo nishca pájaro huacajujta uyashpa o shuj barcocunapa huaquin partecuna yacupi huambujujta ricushpaca, imapash llaqui pasanga yashpami na uchalla shuj llactacunaman rin carca. Barcota manejajcunaca ali tiempo cajpillami shuj llactacunaman llujshin carca. Shinaca pipash shuj llactaman apai ushana barcota tarishpaca, barcocuna shayarij pushtumanmi paipa cosascunahuan rina carca. Shinami barco ima horas llujshingacaman shuyana carca.

Estudiashca Lionel Casson shuti runaca cashnami nin: “Roma llactapica, shuj llactaman ringapaj munaj gentecuna ama caiman chaiman barcocunata mascashpa purinajuchunmi shuj oficinacuna tian carca. Barcocuna shayarij pushtuca, Tíber shuti río manñapimi carca. Chai ladopimi Ostia nishca llacta tiarca. Chaipimi shuj shuj oficinacuna tiarca. Shuj oficinaca, Narbona llactamanda jatun barcopami carca [cunanbica Francia llactami can]. Cutin shuj oficinaca, Cartago llactamanda barcopami carca [cunanbica Túnez llactami can]. Shinami shuj shuj oficinacuna tiarca. Pipash shuj llactaman ringapaj munashpaca chai oficinacunaman rishpa tapunallami carca” nishpa.

Shuj llactaman ucha chayangapaca shuj barcopi rinami ali carca. Shinapash peligrosomi carca. Apóstol Pabloca shuj llactacunapi villachingapaj rijushpaca huaquin viajecunatami pai rijuj barcocunaca yacupi huashajurca (2 Cor. 11:25).