Ashtaca gentecunaca yanmi, Diabloca na tianllu, Bibliapi Diablomanda parlashpaca imapash nalicunamanda parlangapallami Diablomandaca parlan nishpa. Paicunapa yuyaicuna cierto cajpica ¿imamandata Bibliapica nin, Diabloca Jesushuanbash Taita Dioshuanbash parlarcami nishpa?

Bautizarishca jipaca, quimsa viajecamanmi Diabloca Jesusta pandachingapaj munarca. Pundapica Diabloca nircami, Taita Diospa churi cashpaca cai rumicunata tandaman tigrachi nishpa. Jipamanga nircami, gentecuna alicachichunga cai jahuamanda shitari nishpa. Jipamangarin cai Alpapi llactacunata Jesusman ricuchishpami Diabloca nirca, ñucata cungurishpa alicachijpica cai tucui llactacunata mandachunmi churasha nishpa. Diablo quimsa viajecaman pandachingapaj munajpipash Jesusca nircami, nachu yachangui Taita Dios escribichishca shimipica cashnami nijun nishpami tigrachirca (Mateo 4:1-11; Lucas 4:1-13).

¿Jesusca paipa shungupi nali munaihuanllu parlajurca? Na. Bibliapica ninmi, Jesusca tucui  gentecunashnallata llaquicunata charishpapash jucha illajmi carca nishpa (Hebreos 4:15). Jesusca ‘ima juchatapash na rurarcachu. Paipa shimihuanga umachinatapash na yacharcachu’ (1 Pedro 2:22). Shinaca, Jesusca jucha illaj, Taita Diosta tucuipi cazujmi carca. Paica paipa shungu ucupi nali munaihuanga na parlajurcachu. Ciertopacha tiaj Diablohuanmi parlajurca.

Imashinami ricupanchi Diabloca ciertopachami tian.

• Yaripai, Diabloca Jesustaca nircami, ñuca ñaupajpi cungurishpa ñucata alicachijpica tucui cai llactacunata can mandachunmi cusha nishpa (Mateo 4:8, 9). Shinaca ¿Diablo na tiashca cashpaca Jesusta shina nijunmanllu carca? Diablo ushaita charishcataca alimi Jesusca yacharca.

• Jesusta chai rato na umachi ushashpaca ‘asha punllacunata saquishpami’ Diabloca rirca (Lucas 4:13). Diablo na tiashca cashpaca shuj punlla umachisha yashpaca na Jesusta saquishpa rinmanllu carca.

• Mateo 4:11​pica ninmi, Jesusta animashpa ayudangapami ‘angelcuna shamurca’ nishpa. Imashinami angelcunaca ciertopacha tiarca, shinallatami Diablopash ciertopacha tiarca.

Cunanga Taita Diosta ali sirvij Job shuti runagupa punllacunapi ima pasashcata ricushun. Chai punllacunapica ishcai viajetami Taita Diosca Diablohuan parlarca. Diabloca yangata juchachishpallami nirca, Jobca can bendiciajpillami canda sirvijun nishpa. Diablo shina nijpimi Jehová Diosca Jobpa tucui charishcacunata, paipa huahuacunatapash Diablo tucuchichun saquirca. Ashtahuangarin shuj nali ungüi japichunbash saquirca. * Jipamanga Diablo yanga llullajushcata ricuchishpami llaquicunata aguantashca Jobtaca Taita Diosca bendiciarca (Job 1:6-12; 2:1-7).

¿Taita Diosca paipa shungupi nali munaihuanllu parlajurca? Na. Bibliapica ninmi: ‘Taita Diospica ima pandapash na tianllu’ nishpa (2 Samuel 22:31). Ashtahuangarin ninmi, Taita Diosca ‘jucha illaj, jucha illaj, jucha illaj Tucui Ushaita Charij Jatun Taita Diosmi’ can nishpa (Apocalipsis 4:8). Jucha illaj nishpaca ima pandapash, ima mapash illaj nijunmi. Shinaca jucha illaj Taita Diosca paipa shungupi imapash nali munaihuanga na parlajushcangachu.

Cutin shujcunaca ninmi, Jobca na tiarcachu, paimanda parlashcacunaca yanga parlocunallami can nishpa. Shinapash Bibliapica ninmi, Jobca ciertomi tiarca nishpa. Bibliapi imata nijta ricupashun. Santiago 5:7-11​pica Job ciertopacha tiashcatami parlan. Jobmanda parlashpami, Jesusta catijcuna llaquicunata aguantajpi Taita Dios bendicianata yarichin. Jobpash, paipa llaquicunapash na tiashca cajpica chai textocunata liishpaca na animarinchimanllu. Ezequiel 14:14, 20​pica Danielmandapash Noemandapashmi parlan. Paicunaca ciertomi tiarca. Paicunamanda parlashpaca Jobmandapashmi parlan. Shinaca Daniel, Noé cierto tiashca cashpaca Jobpash ciertomi tiashcanga. Shinallata Job cierto tiashca cashpaca, Jobta llaquichij Diablopash ciertomi tiashcanga.

Bibliapi yachajushca shinaca Diabloca tianbachami. Shinapash nachu tapurishcangui ¿imashinata Diabloca ñucatapash ñuca familiatapash llaquichi ushan nishpa?

Yuyapai. Ashtaca nali gentecuna quiquinba llactaman chayamushca cashcanman. ¿Nachu quiquinba llactapi gentecunaca manllarinman? ¿Nachu gentecunapash huaglishpa catinman? Cunanga yuyapai. Diablopash paipa ayacunapash ñucanchipurapi causanajushpaca ¿imashi cai Alpapica pasanman? Noticiacunata ricujpica ¿imata mundo enteropica pasajun?

• ¿Nachu nali gentecuna ama tiachun imata rurajpipash ashtaca millai gentecuna miranajun?

• ¿Nachu taitamamacuna cuidanajujpipash huahuacunapaca brujeriacunata ricuchij videocuna, peliculacunaca ushashcata mirajun?

•   ¿Nachu Alpa ama huaglichun ninanda ricuriajujpipash Alpaca ashtahuan ashtahuan huaglijun?

• ¿Nachu gentecunataca pipash llaquichijuj shina ricurin?

Pi llaquichijujta ricuchingapami Bibliapica nin: ‘Dragonga jahua pachamandami shitai tucurca. Paica pundamandapacha causajuj culebrami. Paillatami Diablo shutipash Satanás shutipash. Paica tucui cai pachapi causajcunatami umachin. Paica paipa angelcunandimi alpaman shitai tucurca. Alpapi causajcuna, mama cuchapi causajcunapash ¡aij imachari tucunguichi! Diabloca punllacuna tucurijujta yachashpami, ninanda fiñarishpa cangunapaman uriajumurca’ nishpa (Apocalipsis 12:9, 12). Huaquin yuyaicunata ali intindishpami ashtacacunaca nishca, jatun nali Diablomi cai mundotaca mandajun nishpa.

Shinaca, jatun nali Diablomandaca cuidarinami cashcanchi. Shinapash ¿imashinata cuidari ushanchi? Chaitaca shamuj temapi ricupashun.