Julio: Tio Ernesto, quiquinhuan Bibliamanda parlashpaca cushijupanimi. * Yaripanguichu imacharipash, chaishuj viajeca Diospa Reinomanda tapushpami nijuparcangui ¿imamandata testigo de Jehovacunaca ninguichi, Diospa Reinoca 1914​pimi mandai callarirca? nishpa.

Ernesto: Ari. Cangunapa revistapimi liircani Diospa Reinoca 1914 huatapi mandai callarishcata. Chaimi tapujuparcani. Cangunaca Bibliapimi shina nijun nipanguichimi.

Julio: Ari, ñucanchicunaca Bibliamandallami yachachipanchi.

Ernesto: Shinapash ñucaca tucuilla Bibliatami liishcani. Tucuilla Bibliapica 1914 huataca maipipash na ricurinllu. Chaimandami Internetman yaicushpa tauca Bibliacunapi 1914 huatata mascarcani. Shinapash na tarircanichu.

Julio: Tucuilla Bibliata liishcamandaca cushijupanimi. Quiquinga ninandami Bibliataca alicachipashcangui.

Ernesto: Ari, Bibliaca alipacha libromi can.

Julio: Ari, shinami can. Bibliami tucuilla librocunata yali ashtahuan ali libro can. Shinallata quiquinga Bibliapi mandashca shinami, imatapash yachangapaj munashpaca Bibliapi ali yachaitaca mascapashcangui. * Chaita ruranapash alipachami can.

Ernesto: Pagui tio Julio. Ñucaca yachajushpa catingapami munapani. Chaimandami shuj shuj librocunata ricujurcani, y quiquihuan liijushca libropimi 1914 huatamanda liircani. Chaipica shuj jatun quiruta cuchujpimi chai quiruca cutin viñarca ninmi yarin.

Julio: Ah, quiquinga Daniel capítulo 4​pi shimicunamandami parlajupangui. Chaipica Babilonia llactamanda rey Nabucodonosorpa muscuitami parlajun.

Ernesto: Ari, chaitami nijurca. Cutin cutin liijushpapash Diospa Reino 1914​pi mandai callarishcataca na intindiparcanichu.

Julio: Ama llaquirijupaichu. Chai shimicunata escribishca profeta Danielpash na intindircachu.

Ernesto: ¿Cierto?

Julio: Ari. Ricupai profeta Danielca na ali intindi ushashpami Daniel 12:8​pica nirca: “Shina nijta uyashpapash, na yachai ushashpami: ‘Ñucata Mandajlla cashna tucunaca ima punllata pactangayari nishpa tapurcani’” nirca.

Ernesto: Shinaca na ñucallachu na ali intindi ushajupashcani.

Julio: Shinapash yachapanguichu ¿imamandata profeta Danielca na intindi usharca? Chai punllacunapica, Taita Diospa yuyaipica nara chai shimicunataca  intindinachu carca. Cunan punllacunapimi intindina tiempo carca. Chaimandami cunan punllacunapi chai shimicunata intindi ushanchi.

Ernesto: ¿Cierto?

Julio: Ari, verso 9ta ricupai. Caipica cashnami nijun: “Cai shimicunaca, tucurimui punllacunacaman sellashpa vichashcami tiajun” nishpa. Imashinami caipi nijun, chai shimicunataca tucuri punllacunapillami intindi ushana carca. Y cunan punllacunapi imacunalla pasajujta ricushpami tucuri punllacunapi causajushcata yachanchi. Shinapash chaitaca cai libropa shamuj capitulopimi yachajupashun. *

Ernesto: Chai shimicunataca nali intindipanichu ¿nacha intindichihuanguiman?

Julio: Ari, ushashcaguta intindichipasha.

Julio: Pundapica Nabucodonosor imata muscushcata ricupashun. Jipamanga chai muscui ima cashcata ricupashun.

Ernesto: Alimi can.

Julio: Nabucodonosorca jahua cielocaman chayajta viñashca quirutami muscurca. Muscuipica Taita Diospa angelmi nijurca, quiruta cuchushpa shitaichi nishpa. Cuchushpa shitajpica sapihuan troncollami quedarca. Chai troncoca ‘canchis huatacuna’ jipami cutin viñai callarirca. * Chai shimicunaca Nabucodonosorpillatami callaripica pactarirca. Ashtaca poderta charimandami, rey Nabucodonosorca jahua cieloman chayajta viñashca quirushna carca. Shinapash paica quirushna cuchui tucushpami canchis huatacaman imatapash na rurai usharca. ¿Yaripanguichu imamandami rey Nabucodonosorca shina pasarca?

Ernesto: Mmm... Na cabal yaripanichu.

Julio: Bibliapica ninmi, rey Nabucodonosorca loco tucushpami canchis huatacaman shinalla pararca nishpa. Hebreo shimicunapi ricujpica canchis huatacuna nishpaca canchis tiempocunamandami parlajun. Nabucodonosorca loco tucuimandami canchis huatacunata na mandarca. Shinapash chai huatacuna jipaca ali tucushpami cutin mandai callarirca. *

Ernesto: Pagui, ñami intindijupani. Shinapash ñucaca 1914 huatapi Diospa Reino mandai callarishcatami tapujuparcani.

Julio: Ari, Diospa Reinomanda parlangapallatami profeta Danielpa shimicunata parlajuparcani. Chai shimicunaca ishcai viajemi pactarin. Pundapica Nabucodonosor mandanata saquijpimi pactarirca. Jipamanga Dios agllashca reycuna cai Alpata mandanata saquijpimi pactarirca. Y chaimi Diospa Reinomanda ashtahuan intindichijurca.

Ernesto: Pero profeta Danielpa shimicuna jipamanbash pactarishcataca ¿imashinata yachanguichi?

Julio: Profeta Danielpa shimicunata ricushpami shina ninchi. Daniel 4:17​pica ninmi: “Runacuna mandana llactataca, jahua pachapi causajuj Dios mandajujta cai pachapi causajcuna yachachunmi chashna villarca. Chai mandanataca, pai piman cungapaj munashpapash, cujlla cajta” yachachunmi shina villarca ninmi. ¿‘Runacuna mandana llactata’ nijta cuenta japircanguichu?

Ernesto: Ari. Shinapash ‘runacuna mandana llactataca, jahua pachapi causajuj Diosmi mandajun’ ninmi.

Julio: Ari. Chai shimicunaca na rey Nabucodonosormandallachu parlajun. Ashtahuanbash Diospa Reino cai Alpapi gentecunata mandanamandapashmi parlajun. Chaita intindingapaca Daniel libropi shuj textocunatapash ricupashun.

Ernesto: Shinaca ricupashun.

Julio: Daniel libropica cutin cutinmi ricuchijun Diospa Reinopica Jesusmi mandanga nishpa. Daniel 2:44​ta ricupashun. Quiquin liishpa carahuai.

Ernesto: Ari, liipashallami. Caipica ninmi: “Chai jatun mandajcuna mandajui punllacunapimi, jahua pachapi causajuj Taita Diosca, ima horapash na tucuchi tucuna mandana llactata churanga. Chai mandana llactataca, na shuj llacta runacunaman cungachu. Chai mandajca, cai tucuilla  mandana llactacunatami ñutushpa tucuchinga. Ashtahuangarin paica, causaita causaicaman mandajungallami”.

Julio: Pagui. ¿Chaipica Diospa Reinomandami parlajun nipanguimanllu?

Ernesto: Mmm... No se.

Julio: Cai textopica Diospa Reinoca “causaita causaicaman mandajungallami” ninmi. Shinaca pensaripai ¿maijanbash gobierno Diospa Reinoshna causaita causaicaman mandaita ushanllu?

Ernesto: Pipash shina mandaitaca na ushangachu yanimi.

Julio: Cunanga shuj textotapash ricupashun. Chai textopica Diospa Reinopi pi mandana cashcatami ricuchijun. Chai textoca Daniel 7:13, 14​mi can. Chaipica ninmi: “Paipajman pushajpica, tucui gentecuna, tucui llactacuna, shuj shuj rimaita rimaj tucui runacuna paita sirvinajuchunmi, mandai ushanatapash, ninanda alicachi tucunatapash, mandana llactatapash paiman curca. Paipaj mandanaca, causaita causaicaman na tucurij mandanami, pai mandana llactaca napacha tucuchi tucungachu”. Caipipash ñajalla parlashca yuyaimandami cutin parlajun.

Ernesto: Ari. Diospa Reinomandami cutin parlan.

Julio: Shinapash Diospa Reinoca ‘tucui gentecunata, tucui llactacunata, shuj shuj rimaita rimaj tucui runacunatami’ mandanga ninmi. Shinaca Diospa Reinolla mundo enterota mandanatami ricuchijun.

Ernesto: Ari, chaitami nijun.

Julio: Cai shimicunata cutin yaripai: “Paipaj mandanaca, causaita causaicaman na tucurij mandanami, pai mandana llactaca napacha tucuchi tucungachu”. Cai shimicunaca ¿nachu Daniel 2:44​huan casi igual uyarin?

Ernesto: Ari. Casimi igual uyarin.

Julio: Cunanga, caicaman imata yachajushcata ashata yaripashun. Daniel capítulo 4​pica ‘runacuna mandana llactata jahua pachapi causajuj Dios mandanatami’ villajun. Chai shimicunaca na rey Nabucodonosorpillachu pactarin. Ashtahuanbash tucuilla Daniel libropica Diospa Reino mandai callarinata, chai Reinopi Jesús mandanatapashmi villajun. ¿Nachu chaicunata ricushpaca Daniel capítulo 4​pica Diospa Reinomandami parlajun nita ushapanchi?

Ernesto: Ari, Diospa Reinomandami parlajun. Shinapash 1914 huatamandaca nara parlanchica.

Julio: Cutin rey Nabucodonosormanda parlashun. Imashinami ricuparcanchi profeta Danielpa shimicunaca pundapica rey Nabucodonosorpimi pactarirca. Paipa muscuipi ricushca quiruca Nabucodonosor cajtami intindircanchi. Quiruta cuchujpimi Nabucodonosorca mandanata saquirca. Canchis tiempocuna yalijpimi Nabucodonosorca loco tucushca cashpapash cutin ali tucushpa cutin mandai callarirca. Shinallata Dios agllashca reycuna cai Alpata mandanata saquijpipashmi chai shimicunaca pactarirca. Shinapash ¿Taita Dios nali mandashcamandachu shina pasarca?

Ernesto: Na intindipanichu.

Julio: Ricupangui. Ñaupa punllacunapica Israel llactata mandajcunaca “Mandaj Dios cushca tiarinapimi” tiarin carca ninmi. * Paicunaca Dios agllashca gobiernocunami carca. Chaica Diospa Reino tianatami ricuchijurca. Shinapash tiempo  yalijpica tauca mandajcunami Taita Diostaca ñana cazurca. Shuj gentecunapashmi paicunata catishpa Diosta na cazurca. Chaimandami Taita Diosca Jesús shamungapaj 607 huatacuna faltajpica, Israel llactata Babilonia llacta llaquichichun saquirca. Chai huatapimi Jehová agllashca gobiernocunaca Jerusalén llactapica ñana tiarca. Shinaca Diosca ñana mandajurcachu. ¿Intindirijupanllu?

Ernesto: Ashaguta intindijupanimi.

Julio: Jesús shamungapaj 607 huatacuna faltajuj punllacunapimi canchis tiempocunaca callarirca. Chai punllacunapimi Dios agllashca reycunaca ñana cai Alpata mandanajurca. Canchis tiempocuna nishca tucurijpimi Taita Diosca shuj reyta agllarca jahua cielomanda mandachun. Shinaca ¿ima horashi profeta Daniel parlashca canchis tiempocunaca tucurirca? Ima hora tucurishcata yachashpami Diospa Reino ima hora mandai callarishcata yachashun.

Ernesto: ¿1914​pichu mandai callarirca?

Julio: Ari tio Ernesto.

Ernesto: Shinapash ¿imashinata yachanchi Diospa Reinoca 1914​pi mandai callarishcata?

Julio: Jesús nara cai Alpaman shamushpaca canchis tiempocunaca nara tucurishcachu nircami. * Shinaca canchis tiempocunaca ashtaca ashtaca huatacunami cana carca. Canchis tiempocunaca Jesús cai Alpaman shamungapaj ashtaca huatacuna faltajpillata callarishpapash Jesús causarishpa jahua cieloman tigrajpipash nara pactarircachu. Shinallata yaripai, profeta Danielpa shimicunaca ‘tucuri punllacunapimi’ intindirina carca. * Ashtahuangarin 1800 huatacacuna tucurijpimi Taita Diosta tucui shunguhuan sirvingapaj munajcunaca Danielpa escribishca shimicunatapash shuj versocunatapash ashtahuan investigai callarirca. Shina investigashpami canchis tiempocunaca 1914 huatapi tucurinata intindirca. Chai huatamanda ima pasajujta ricushpami intindishcanchi Diospa Reinoca 1914 huatamanda mandai callarishcata, tucuri punllacuna nishca tiempopash callarishcata. Tio Ernesto ashtaca yuyaicunatami yachajunajupanchi, shinapash intindi ushapanguimi.

Ernesto: Ari, pero aliguta intindingapaca cutinmi liina capani.

Julio: Ari, ñucapash cutin cutin liishpami intindi usharcani. Shinapash imashinami cunan ricunajupashcanchi, Diospa Reinomanda parlashpaca testigo de Jehovacunaca Bibliapi ricuchishpami parlapanchi.

Ernesto: Ari shinami capashca. Canguna Bibliapi ricuchishpa parlajtami ñucaca alicachipani.

Julio: Quiquinbash Bibliapi liishpa yachajuchunmi munapanchi. Imashinami nijuparcani, ashtaca yuyaicunatami cunanga yachajunajupanchi. Yaringapalla, canchis tiempocunaca Jesús shamungapaj 607 huatacuna faltajuj punllacunapimi callarirca, chai canchis tiempocunaca Diospa Reinohuami ricunata charin. Shinapash ¿imamandata ninchi chai canchis tiempocunaca 1914 huatapimi tucurirca nishpa? *

Ernesto: Ari, chaitami tapungapaj munajuparcani.

Julio: Canchis tiempocuna mashna huatacuna parana cashcata yachangapaca ¿nachu shuj punllagu shamushpa Bibliapillata ricuchi ushapani? *

Ernesto: Ari, yachangapaj munapaimanmi, shamupangui.