Culquita maqui ucuchinata yachaj gentecunallata gobiernopa oficinacunapi trabajangapaj yaicuimandami chai llaquica na tucurin. Shinapash Bibliapica shuj ali gobierno tianatami parlan. Chai ali gobiernomanda parlashpami Jesusca Diospa Reinomanda mañanguichi nishpa paipa catijcunamanga yachachirca (Mateo 6:9, 10).

Diospa Reinoca ciertopachami tian. Jahua cielopimi can. Diospa Reinomi cai Alpapi tucui gobiernocunapa cuenda mandanga (Salmo 2:8, 9; Apocalipsis 16:14; 19:19-21). Culquita maqui ucuchijcuna tiachunga na saquingachu. Cunanga, gobiernocuna imamanda culquita maqui ucuchijcunata na tucuchi ushashcata, Diospa Reino imashina tucuchinatapash ricupashun.

¿IMA PROBLEMATA TIAN? Gobiernocunaca impuestocunata cobrashca culquihuanmi imatapash ruran. Impuestocunamanda ashtaca culquita ricuimandami gobiernopa oficinacunapi trabajadorcunaca shuhuana munaita charin. Cutin shujcunaca, impuestocunata ama yapata cobrangapami imacunatapash mañan. Chai culquita maimanda na recuperai ushashpami gobiernocunaca tucui gentecunapa impuestocunata subichin. Gobiernocuna shina rurajpimi culquita maqui ucuchij gentecunapash ashtahuan miran. Honrado gentecunarami shujcunapa culpamanda llaqui apan.

¿IMATATA DIOSPA REINOCA RURANGA? Diospa Reinoca tucui ushaita charij Jehová Diospami can (Apocalipsis 11:15). * Chaimandami impuestocunata cobranataca na minishtin. Jehová Diosca tucui ushaita charij, ali Dios caimandami gentecuna imata minishtishcata cunga (Isaías 40:26; Salmo 145:16).

¿IMA PROBLEMATA TIAN? Página 3​pi Susan Rose-Ackerman profesoraca ninmi, culquita maqui ucuchijcuna ama tiachunga nali mandajcunatarami anchuchina can nishpa. Culquita chasquijlla policiacunata, aduanapi trabajajcunata anchuchishpapash gobiernopa oficinacunapi culquita chasquijllacunata na anchuchijpica gentecunaca na gobiernocunapi cringapaj munanllu. Bibliapi nishca shinaca alitalla ruraj, ima horapash juchata na ruraj runaca shujllapash na tianllu (Eclesiastés 7:20).

¿IMATATA DIOSPA REINOCA RURANGA? Diospa Reinopi Jesús mandashpaca ima horapash na huaglingachu. Shuj punllaca cai mundota mandajuj Diablomi Jesustaca ñuca ñaupajpi cungurishpa adorajpica ‘cai pachapi tucui llactacunatami’ cusha nirca. Shinapash Jesusca na uyarcachu (Mateo 4:8-10; Juan 14:30). Ña huañuna horaspicarin, ama nanaita sintichun nishpami Jesusmanga imachari yacuta carangapaj munarca. Shinapash Jesusca juizu chingashca cangapaca na munarcachu (Mateo 27:34). Shinami Jesusca jahua cielomanda ali mandai ushanata ricuchirca (Filipenses 2:8-11).

¿IMA PROBLEMATA TIAN? Ashtaca llactacunapica cada asha tiempomi votacionguna tian. Gentecunaca chaipimi aprovechan nali gobiernocunata anchuchingapaj. Ashtahuangarin jatun llactacunapipashmi campaña punllacunapi, votación punllacunapillata imapash nali cosascunata pacalla, llullashpa ruran. Charijcunapash paicunata randi ayudachunmi campañacunapi ayudaj tucun.

Tribunal Supremo de Estados Unidospi trabajaj John Paul Stevens juezca escribircami, gentecunaca pacallami imatapash ruran. Chaimandami gobiernocuna  votacionbi imashina ganashcata, ali gobierno canataca na yacharin. Gentecunapash gobiernocunapi confiaitaca na ushanllu” nishpa. Chaicunata ricushpami ashtacacunaca politicocuna honrado cajtaca na crin.

¿IMATATA DIOSPA REINOCA RURANGA? Diospa Reinoca unai unaicamanmi mandanga. Chaimandami campañacunata rurana, campañacunapi imacunatapash pacalla ruranaca tucuringa (Daniel 7:13, 14). Ashtahuangarin pi Diospa Reinopi mandana cashcata agllangapaca na votacionguna tiangachu. Taita Diosmi pi mandanataca churanga. Unai unaicaman mandana cashcamandami paipa munaitaca maimanda pactachinga.

¿IMA PROBLEMATA TIAN? Huaquinbica pensanchipashchari, maqui ucuchij gentecuna ama tiachunga ashtahuan leycunatami churana can nishpa. Shinapash ali estudiashca gentecunaca nishcami, ashtaca leycunata churajpica ashtahuanmi leycunataca na pactachin nishpa. Nali gobiernocunata tucuchingapaj ninanda esforzarishpapash na ushangachu.

¿IMATATA DIOSPA REINOCA RURANGA? Diospa Reinopa leycunaca alipachami can. Imata ruranata yachachun tauca leycunata churanapa randica Jesusca cai shimicunatallami nirca: ‘Shujcuna imatapash aliguta cangunaman rurachun munashpaca, chashnallatami cangunapash shujcunaman aliguta rurana canguichi’ nishpa (Mateo 7:12). Jesusca gentecuna ali sintirichunbashmi munarca. Chaimandami mandarca: ‘Canba cumba runagutaca imashina can juyarinshnallata juyangui’ nishpa (Mateo 22:39). Taita Diosca gentecuna paicunapa shungupi imashina cajtaca alimi yachan. Chaimandami chai leycunata pactachichun aliguta ricurianga (1 Samuel 16:7).

¿IMA PROBLEMATA TIAN? Gobiernopa oficinacunapi trabajajcunapash, chaishuj gentecunapash mitsacunami can. Imata charishpapash ashtahuanmi ansiarinajun. Chaimandami maqui ucuchinata yachajcuna tian. Corea del Surpi jatun edificio imamanda urmashcata ali yachajpica, chai edificiota  huasichijcunami municipiopi trabajajcunaman culquita maqui ucuchishcarca. Paicunapaca ali materialcunahuan, municipio mandashcashna huasichinapa randica culquita maqui ucuchinami ashtahuan barato carca.

Shinaca culquita maqui ucuchijcuna ama tiachunga, gentecunamanmi na ansiarishpa munanata, shujcunaman compartinata yachachina can. Shinapash gobiernocunaca gentecunaman chaita yachachitaca na atinanllu, yachachingapajpash na munanllu.

¿IMATATA DIOSPA REINOCA RURANGA? Diospa Reinoca gentecuna alicunatalla rurashpa causachunmi yachachin. Chaimandami culquita maqui ucuchijcuna tiachunga nimamanda na saquinga. * Ashtahuangarin, ‘yuyaipi mushujtalla yarishpa causachun’ yachachishpami ayudajun (Efesios 4:23). Mitsa canata, imata charishpapash ashtahuan ansiarijunata cungachishpami shujcunapi preocuparinata yachachin (Filipenses 2:4; 1 Timoteo 6:6).

¿IMA PROBLEMATA TIAN? Aliguta yachachijpipash, ali gentecunahuan causashpapash huaquingunaca honrado cangapaca na munanllu. Chaimandami ashtacata estudiashcacunaca nin, gentecunallata na honrado cangapaj munajpimi culquita maqui ucuchij gentecunaca na tucurin. Chai gentecuna na tucurijpipash ama ashtahuan llaquichishpa catichunllami imagutapash rurai usharin nishpa.

¿IMATATA DIOSPA REINOCA RURANGA? Convención de las Naciones Unidasca ninmi, maqui ucuchij gentecuna ama tiachunga gobiernocunami “na shuhuanata, honrado canata, responsable canata” yachachina can nishpa. Gobiernocuna na ushajpipash Diospa Reinoca ali gentecuna cachunmi yachachin, mandanbash. Bibliapi yachachishca shinaca, charishpapash ashtahuan ansiarijcuna, llullacunapash Diospa Reinopi caitaca na ushangachu (1 Corintios 6:9-11; Apocalipsis 21:8).

Tucuicunallatami Jesusta punda catijcunapa ejemplota catishpa Diospa Reinopi leycunata cazui ushanchi. Apostolcunapa punllacunapica Simón nishca runaca paita imapipash ayudachun nishpami apostolcunamanga imagutapash carangapaj munarca. Chaita ninanda nalicachishpami apostolcunaca nirca: ‘Cashna jatun nalita yarijushcamandaca llaquiriyari’ nishpa. Shina nijpimi Simonga nalita munajushcata cuenta japishpa chai nali munaita ama charingapaj apostolcunataca ñucamanda mañanguichi nirca (Hechos 8:18-24).

Maijan llactamanda cashpapash, Diospa Reino mandajpi causaita ushanguimi (Hechos 10:34, 35). Chai Reino mandajujpi causachunmi testigo de Jehovacunaca muyundi Alpapi Diospa Reinomanda yachachinajun. Cada semana asha tiempoguta charijpica cushijushpami paicunaca Diospa Reinomanda ‘ali villaicunata’ Bibliapi imashina yachajunata ricuchinga. Ashtahuangarin, maqui ucuchij gentecunata Taita Dios imashina tucuchinatami yachachinga (Lucas 4:43). Yachajungapaj munashpaca quiquinba llactapi Testigocunahuan parlapangui o Internetpi jw.org direccionda ricupangui.