CALLARI TEMA | HUAÑUSHPACA ¿IMATA TUCUNCHI?
¿Ciertopachachu huañushcacunaca causaringa?
Huaquingunaca ninmi, imatapash yangata crijcunallami huañushcacuna causarinataca crin nishpa. Shinapash apóstol Pabloca nircami: “Cai pachapi causaipajlla Cristota crinimi nishpa shuyanajushpaca, tucui gentecunatapash yali ashtahuan llaquinayaimi canchiman. Ashtahuangarin cunanga Cristoca, huañushcacunapaj chaupimandami causarirca. Paica punda causarishpami, paita crij huañushcacuna causarinata ricuchijun” nishpa (1 Corintios 15:19, 20). ¿Imamandata apóstol Pabloca huañushcacuna ciertopacha causarinata crirca? Jesús causarishcata yachashpami huañushcacuna causarinata crirca (Hechos 17:31). * Chaimandami, apóstol Pabloca Jesusca “punda causarishcami can” nirca. Jesús punda causarishcamandami shujcunapash causarinata intindinchi.
Jobca nircami: ‘Canba maquihuan rurashcataca juyanguimi’ nishpa. (Job 14:14, 15)
Jehová Diosca “na llullaj Taita Diosmi” can (Tito 1:2). Chaimandapashmi huañushcacuna ciertopacha causarinata crinchi. Huañushcacunata causachita na ushashpaca, Taita Diosca ¿huañushcacunata causachishami ninmanllu carca? Taita Diosca imata rurasha nishpapash pactachingami.
Jehová Diosca juyaimandami huañushcacunataca causachinga. Jobca nircami: “¿Runa huañushpaca, cutin causaringachu? Ñuca causai punllacunapica, ñucapaj quishpirina chayamungacamanmi shuyajushalla. Chashna shuyajujpi can cayajpimi tigrachisha. Chaipica, cambaj maquihuan rurashcataca juyanguimi” nishpa (Job 14:14, 15). Jobca paita juyaimanda Taita Dios causachina munaita charishcataca alimi yacharca. ¿Cunangamanllu Taita Diosca chai munaita charin? Bibliapica ninmi: “Mandaj Dios ñucaca, napacha shuj tucunichu” nishpa (Malaquías 3:6). Taita Diosca gentecuna cushilla causachunmi munan. Imashinami shuj taitaca paipa churigu huañujpica causarichun munan, shinallatami Taita Diospash huañushcacunata causachingapaj munan. Chaita rurangapaj poderta charinmi (Salmo 135:6).
Taita Diosca huañuita tucuchishpami tucuicunata cushichinga
Jehová Diosca huañushcacunata causachichunmi paipa Churiman poderta cunga. Huañushca familiacuna causarijpica ninandami cushijushun, Jesuspash cushijungami. ¿Imamandata shina ninchi? Lázaro huañujpi paipa panicuna, amigocuna llaquilla cajta ricushpaca ‘Jesuspash huacarcami’ (Juan 11:35). Shuj punllapash, shuj viuda huarmigupa shujlla churi huañushcata ricushpami, Jesusca ‘ninanda llaquishpa ama huacaichu’ nirca. Jipaca chai huambraguta causachircami (Lucas 7:13). Imashinami yachajushcanchi, gentecuna huañujpica Jesuspash ninandami llaquirin. Chaimandami huañushcacuna causarijpica paipash ninanda cushijunga.
Pipash quiquinba familiamanda huañujpica, ima horapash shina llaquica na tucuringachu nipanguichari. Shinapash Taita Diosca paipa Churimanmi huañushcacunata causachichun poderta cushca. Taita Diosca quiquinba familia causarijpi paicunata chasquingapaj quiquinbash chaipi cachunmi munan. Chaipica cushijushpami paicunahuan para siempre causashun.
Punda temapica Lionelmandami parlarcanchi, paica ninmi: “Huañushcacuna causarinamanda parlajpica llullajun yashpami na crircani. Shinapash Bibliapi ñucallata ricushpami cierto cashcata intindircani. Cunanga ñuca abuelota ricungapami munani” nishpa.
¿Ashtahuan yachajungapaj munapanguimanllu? Testigo de Jehovacunaca cushijushpami huañushcacuna causarinamanda Biblia ima nijta yachachinga. *
^ par. 3 Jesús ciertopacha causarishcamanda ashtahuan yachangapaca, La Biblia... ¿la Palabra de Dios, o palabra del hombre? libropi 78-86 paginata ricupangui. Caitaca testigo de Jehovacunami llujchishca.
^ par. 9 Taita Diosmanda ali villaigucuna nishca folletopi 14, 15 paginacunata ricupangui. Caitaca testigo de Jehovacunami llujchishca.
