Preocupadolla causashpaca ñucanchitallatami nanaicunaca japita ushan, shinallata ashtahuan llaquillami sintirishun. Yapata preocuparijushcamandami ashtahuan llaquicunata charishun.

•  Mashna tiempota nali noticiacunata ricushpa yalinata ricupangui. Noticiacunamanda tucuita yachanaca na minishtirinllu. Noticiacunata yapata ricushpa yalijushpaca ñucanchillatami llaquirishpa ashtahuan manllarishun.

   Bibliapica ninmi: “Llaquilla shunguhuan causashpaca tullucamanmi chaquichijun” (Proverbios 17:22).

   Johnga ninmi: “Chairalla llujshishca noticiacunata ricushpa yalinaca, facilmi can, shinapash chaica nalichu can. Nali noticiacunata na yapata ricushpaca tranquilomi sintirini”.

   Caipi yuyapai: Noticiacunataca ¿imashna tiempotata ricuna capangui?

•  Punllapi imata ruranata ricupangui. Ima horas jatarinata, ima horas micugrinata, ima horas huasipa ruraicunata ruranata, ima horas puñugrinatami aliguta ricuna capangui. Punllapi imata ruranata ali yachashpaca na yapata preocuparishunllu.

   Bibliapica ninmi: “Imatapash ucha rurajcuna aliguta yarishcahuanga ashtacatapachami charinga” (Proverbios 21:5).

   Jhosepca ninmi: “COVID-19 ungui callarijpica punda rurashcacunata ruranata saquishpami, yanga cosascunatara rurai callarircani. Chaimi tiempota aliguta aprovechangapaj munaimanda, punllapi imatalla rurana cashcataca shuj cuadernopi anotarcani”.

   Caipi yuyapai: ¿Punllapi quiquin imatalla ruranataca yachapanguichu? ¿Punllapi imatalla ruranata yachanaca ayudanllu?

•  Ima ali cosascuna pasashcapi pensaripai. Imatapash rurajushpaca cashna ruraiman carcani o chashnami ruraiman carcani nishpa pensarijushpaca quiquinllatami ashtahuan preocuparipangui. Shamuj punllapi imachari pasanga nishpa yapata preocuparishpaca, quiquinllatami ashtahuan llaquiyapangui. Nali cosascunapi pensarijunapa randica ali cosascuna pasashcapimi pensarina capangui.

   Bibliapica ninmi: “Pagui ninajuna canguichi” (Colosenses 3:15).

   Lisaca ninmi: “Bibliata liijushpaca nali noticiacunapi pensarijunapa randica ali cosascunapimi pensarini”.

   Caipi yuyapai: ¿Ali cosascuna pasashcata cungashpachu nali cosascuna pasajushcapilla pensaripangui?

•  Shujcunapi yuyapai. Llaquilla cashpa sololla cangapaj munanapa randica shujcunata ayudanapi yuyapai.

   Bibliapica ninmi: “Quiquinballa ali cachunga na yarinachu canguichi, ashtahuangarin shujcunapapash ali cachunmi tucuicunallata yarina canguichi” (Filipenses 2:4).

   Mariaca ninmi: “Shujcunamanda imatapash rurashpaca ninandami cushijunchi, shujcunamanda imagutapash rurashpaca paicunatapashmi cushichingui. Shinami quiquinbillaca ña na yapata preocuparingui”.

   Caipi yuyapai: ¿Quiquinba rijsishcacunamandaca pipash ayudachun minishtinllu? Paitaca ¿imashina ayudaita ushapangui?

•  Imapash unguicuna ama japichunmi, quiquinllata cuidarina capangui. Unguicuna ama japichunga ejerciciotami rurana capangui, alimi samana capangui, shinallata ali micunatapashmi micuna capangui. Quiquinllata aliguta cuidarishpaca quiquinllatami ashtahuan ali sintiripangui, shinallata na yapata preocuparinguichu.

   Bibliapica ninmi: ‘Cuerpo shinlliyachun pugllanaca alimi’ can (1 Timoteo 4:8).

   Catherineca ninmi: “Ñuca churihuan ejerciciota rurangapaj na llujshi ushashpapash huasipillata rurangapajmi quidashcanchi. Chashna ruranami ñucanchillata ali sintirichun, ashtahuan ali llevarichunbash ayudashca”.

   Caipi yuyapai: Ashtahuan ali cangapaca ¿aliguta micuna, ashtahuan ejerciciota ruranatachu minishtipangui?

 Ashtacacunataca cai temapi parlashca yuyaicunata pactachinami ama yapata preocuparichun ayudashca. Shinallata Bibliapi jipa punllacunapi ali causaigu tianata yachajunami ayudashca. “Taita Diospa Gobiernoca ¿imacunatallata ruranga?” nishca temata liipangui.