29 de octubre de 2023​tami Kerala, India llactapica shuj asambleata charigrinajuras huaquin bombacuna tujyarca. Chaitaca jw.org paginapi última noticiapi villarca. Chaipica ishcai panigucuna shinallata 12 huatacunata charij huarmi huambragumi huañurca. Cutin 55 huauquipanigucunaca chugrishca o gravemi can.

Quimsa panigucuna y ishcai huauquicunami hospitalpi grave can. Autoridadcunaca más o menos 9:40​tami quimsa bombacuna tujyashca nin. Caita rurashca jaritaca policiacunaca ñami japishca y cuna horasca shuj investigacionbimi can.

Llaqui apashca pushtuman ñapash chayashcamandami bomberocunata, ambulanciacunata y policiacunataca agradicipanchi. Shinallata llaqui apashcacunata hospitalpi cuidanajushcamandaca ninandami agradicipanchi.

Llaqui apashcacunaca, huauquipanigucuna juyaimanda apoyangapaj listo cashcata ricushpaca ninandami cushijunajurca. Bombacuna tujya horas chaipi cashca shuj paniguca cashnami nin: “Ñapashmi Jehová Diosta mañai callarircani. Acomodador huauquicuna y shuj huauquicunapash ñucanchita cuidangapami ñapash shuj seguro pushtuman aparca. Chaita ricushpami cada unota Jehová Dios cuidajushcata cuenta japiparcanchi”.

Llaqui apashcacunataca India llactapa sucursalmanda representantecuna, superintendentecuna y ancianocunami espiritualmente y imagutapash rurashpa ayudanajun. Keralda llactaman huauquipanicunata animangapaj rishca shuj anciano huauquica cashnami nin: “Llaqui apashca huauquipanigucuna cushilla cajta ricushpami ninanda animarircani. Paicunahuan parlajpi paicuna Jehová Diospi confiajta ricushpami ñucapa feca ashtahuan shinlliyarca” nircami.

Mundo enteromanda huauquipanigucunami India llactapi llaqui apashca huauquipanicunamanda y paicunapa familiamandapash Jehovata mañanajupanchi. Bibliapi nishcashna shamuj punllacunapi llaquicuna illaj, huañuj illaj causanata yachanami tranquilo sintirichun ayudan. Jehovapi confiashpa catingapami decidido capanchi (Salmo 56:3).