Huahuata charina cushi ashahuas tarabus man. Huahuata cuiranaga ashca timpu minishtirin, sallata sambayana man. Sambayashca asha maicanbi piñanacui tianga. Chimandami ishcandi alita apanacungahua huahuata imasa cuiranata cuintanacuna anguichi. Biblia cunaigunaga imasata yanapanga.

BIBLIAGA NINMI: ‘Llaquiu runaga ahuantagmi an, alita yanapan, mana paihuagllata yuyarisha mitsanzhu, mana piñasha causanzhu’ (1 Corintios 13:​4, 5). Punda huahua ashcamanda paillata cuirasha ninguimi. Chasna acpis camba carihuas canda minishtinmi. Chiraicu paita ama cunganguichu. Huahuata cuirangahua cari yanapai minishtirishcata rimai.

“Canguna huarmita llaquisha paihuan causaichi” (1 Pedro 3:​7). Can punda yaya ashaga, huahuata huarmi cuirana ashcata intindi, cuiraushahuas sambayangami. Canhuan piñaricpi sumaglla rimangui, “ama yanga piñanguichichu” (Colosenses 3:19). Camba huarmita intindisha ima minishtishcai yanapai (Proverbios 14:29).

CAITA RAI:

• Yaya ashaga: Tuta imahuas huahuata cuirasha yanapai. Ima rana munashcatas saquisha camba huarmihuan, huahuahuan pariu angahua lugarta surcui

• Mama ashaga: Cari yanapasha nicpiga yanapachun saquilla. Imata mana alita racpi, piñana randiga alimanda yachachi

BIBLIAGA NINMI: “Ishcandi shuc aichalla tucungami” (Mateo 19:5). Huahua shamucpihuas canguna “shuc aichalla” ashcata ama cunganguichichu. Ishcandi alita apanacusha catichi.

Camba cari canda yanapacpi pagrachuna mangui. Sumaglla pagrachusha “ali shimigunallata” rimai (Efesios 4:29). Camba huarmi imasa ailluta cuirashcamanda paita llaquisha balichishcata rimai (Proverbios 31:​10, 28).

“Pihuas amu ali tucunallata mana yuyarinachu, astahuanbas shuccuna ali tucunata yuyarisha causashun” (1 Corintios 10:24). Caranbaraicu alita raichi. Chasnallata ima rashcagunatas balichinacuichi. Ishcandilla cuintanacungahua lugaryaichi. Carihuan, huarmihuan puñuusha camba aichata ama mitsaichu. Canguna ishcandipura munashcata asirtaichi. Bibliaga ninmi: “Cangunapura ama mitsanacunguichichu” (1 Corintios 7:​3-5). Chasna acpiga pagllai mana pingasha cuintanacuichi. Caita alita pactachishaga sumacta causanguichi.

CAITA RAI:

• Lugar ishcaipuralla pasanata ama cungarichu

• Imatas cumbiranacusha llaquinacushcata ricuchinacuichi

BIBLIAGA NINMI: “Canga huahua urasmandami Diospa shimita yachashcangui. Chi shimiga canda yuyaita cunmi” (2 Timoteo 3:​15). Imasa camba huahuata yachachinata yuyai. Canga yuyarina mangui, huahuaguna mana pagarishallata imatahuas intindic acta. Can ima rimashcata ña huicsa ucumanda musiarinmi. Mana intindina acpihuas pagarishcamanda leinata yachachi, chasna racpimi huiñashaga leinata gustac tucunga.

Bibliamanda yachachingahua, ñuca huahua chara llullu man ama nichu. Paihua ñaupacpi Jehovata mañai (Efesios 6:4). Ishcandilla pugllaushaga Jehova rashcagunata cuintai (Salmo 78:​3, 4). Can Jehovata llaquishcata ricushaga, paihuas atunyasha Jehovata llaquingami.

CAITA RAI:

• Huahuata yachachingahua ali yuyaita cuhuai nisha Jehovata mañai

• Chi balishca yuyaigunata camba huahuama caran uras yachachi