Kosa i ve dir « donn loneur out papa é out momon » ?
Sak la Bib i di
Le komannman « donn loneur out papa é out momon » i trouv in bonpe foi dan la Bib (Égzod 20:12 ; Detéronom 5:16 ; Matieu 15:4 ; Éfézien 6:2, 3). Sa i ve dir ke néna kat zafèr inportan i fo fé :
Èm azot. Ou donn loneur out bann paran kan ou fémont out rekonésans pou tout sak banna la fé pou ou. Ou pe mont out lamour pou banna kan ou aksèp zot bann konsèy (Provèrb 7:1, 2 ; 23:26). La Bib i ankouraj aou konsidèr banna kom out « gloir », sa i ve dir èt fièr de zot (Provèrb 17:6, Bible de Darby).
Aksèp zot lotorité. Nou donn loneur nout bann paran kan nou fémont ke nou lé dakor èk lotorité Bondieu la donn azot, surtou si nou lé jeun. Ala kosa Kolosien 3:20 i demann sad lé jeun : « Obéi zot bann paran dan tout zafèr, parske sa i fé plézir le Sénieur. » Mèm Jézu kan té marmay, la obéi èk gran keur son bann paran (Luk 2:51).
Trèt azot èk réspé (Lévitik 19:3 ; Ébreu 12:9). Souvandéfoi, sé le fason nou koz èk nout bann paran mé osi sak nou di azot, ki mont si nou réspèk banna. Défoi lé vré, detroi paran néna in fason d’fèr ki fé ke lé difisil réspèk azot. Mé mèm kan lé kom sa, bann zanfan i pe donn loneur zot paran san mank azot réspé dan zot manièr kozé, ou dan zot fason trèt banna (Provèrb 30:17). La Bib i di ke koz an mal su son papa ou su son momon lé vréman tré grav (Matieu 15:4).
Pran soin banna. Kan nout bann paran i viéyi, zot i pe avoir bezoin in koudmin. Nou donn azot loneur, kan nou fé tout nout posib pou ke zot néna sak zot la bezoin (1 Timoté 5:4, 8). Par égzanp, jus avan li mor, Jésus la fé an sort ke in moun i okup son momon (Jan 19:25-27).
Sak désertin i pans su loneur ke bann zanfan i doi donn zot bann paran
Sak domoun i pans : Donn loneur out paran, sé lès azot dirij out ménaj.
An vré : La Bib i ansègn ke le lien ke néna ant deu moun maryé i pas avan tout lien ke i pe avoir avèk le rès la fami. Jenèz 2:24 i di : « Le bonom va kit son papa é son momon, é li va rès avèk son madam » (Matieu 19:4, 5). Lé vré, deu moun maryé i pe ékout bann konsèy paran inn é lot (Provèrb 23:22). Mé in mari èk son madam na le droi désid fé ansort ke zot fami i may pa tro dan zot ménaj (Matieu 19:6).
Sak domoun i pans : Zot paran néna lotorité su tout.
An vré : Mèm si Bondieu la donn bann paran lotorité su la fami, kan in moun néna in lotorité, li néna osi bann limit : jamé son lotorité va pas pard’su sak Bondieu. Par égzanp, kan in tribunal la demann bann disip Jézu dézobéi Bondieu, banna la réponn : « Nou doi obéi Bondieu olèrk bann zom » (Akt 5:27-29). Lé parèy, bann zanfan i obéi zot paran « an akor avèk sak le Sénieur i demann ». An klèr, zot i obéi tank zot paran i demann pa zot fé in nafèr ke lé kontrèr bann loi Bondieu (Éfézien 6:1).
Sak domoun i pans : Donn loneur out paran, sé suiv le mèm relijion ke zot.
An vré : La Bib i di anou, alé gard par nou mèm, si sak nou la aprann, lé bien la vérité (Akt 17:11 ; 1 Jan 4:1). Sa i pe amèn in moun suiv in ot relijion ke sad son bann paran. La Bib i koz su désèrtin sèrviteur fidèl Bondieu ke la pa suiv le religion zot bann paran. Anparmi zot néna Abraam, Rut èk lapot Pol (Jozué 24:2, 14, 15 ; Rut 1:15, 16 ; Galat 1:14-16, 22-24).
Sak domoun i pans : Pou donn loneur out bann paran, i fo suiv bann tradision é fé sérémoni pou ador bann zansèt.
An vré : La Bib i di : « Sé Jéova out Bondieu ke ou doi adoré, é sé rienk a li seulman ke ou doi sèrvir » (Luk 4:8). Sak i rann in ladorasion son bann zansèt i fé pa plézir Bondieu. An plus ke sa, la Bib i ansègn ke « bann mor i koné pu rien ». Kan i fé sèrvis pou zot, zot i koné mèm pa, é zot i pe pu fé rien pou bann vivan, ni an bien ni an mal (Éklézias 9:5, 10 ; Izai 8:19).
Agard sa osi…
BANN KÉSTION LA BIB I RÉPONN
Okup nout bann paran ke lé finn vieu : kosa la Bib i di ?
La Bib i koz su bann bonom èk bann madam ke lavé foi dann Bondieu é ke la okup zot bann paran ke té finn vieu. Li donn anou osi bann konsèy util ke va èd anou pou okup nout bann paran.
KISA NOU LÉ ?
Asis in rénion
Vien oir kosa i éspas dann nout bann rénion. Trouv ousa i fé sa pa tro loin out kaz.