Non, Bondié i aksèp pa tout bann rolijion. Dan la Bib néna bonpé zégzanp rolijion Bondié i èm pa. I pé mèt azot dann dé group.

Group 1 : Bann rolijion k’i ador bann fo bondié

 La Bib i apèl ladorasion bann fo bondié in « rèv », « pur mansonjri » é « bann zafèr na poin la valèr é k’i aport pa rien »(Jérémi 10:3-5; 16:19, 20). Jéova a la done lord la nasion Israèl : « Ou doi pa ador dot bondié ké moin » (Égzod 20:3, 23; 23:24). A chak foi la nasion Israèl la ador dot bondié, « la raj Jéova la mont kont Israèl » (Nonm 25:3; Lévitik 20:2; Juj 2:13, 14).

 Bondié la pa chanj son fason oir ladorasion bann « soidizan bondié » (1 Korintien 8:5, 6; Galat 4:8). Li done lord la, bann domoun k’i vé ador ali, frékant pu bann domoun k’i ador bann fo bondié : « Kit bann domoun la é sort koté zot ! » (2 Korintien 6:14-17, Parole de Vie). Poukosa Bondié noré done in lord komsa si tout bann rolijion té parèy é ké li té aksèp tout banna ?

Group 2 : Bann rolijion k’i ador lo vré Bondié mé d’in fason k’li lé pa dakor avèk

 Nadfoi, bann Zisraélit, pou ador Bondié, té suiv bann kroiyans é bann fason d’fé ké té sort dann fo rolijion. Zot té ésèy mélanj lo vré èk lo fo rolijion mé Jéova té rojèt sa (Égzod 32:8 ; Détéronom 12:2-4). Jézu la korij bann chèf rolijié ipokrit son lépok, akoz zot fason ador Bondié. Zot té fé komsi zot té i èm vréman Bondié alor k’an vré zot lavé « lès su koté bann zafèr pli inportan dan la Loi, sétadir, la justis, la mizérikord é la fidélité » (Matié 23:23).

 Lé parèy osi jordi, sé rienk la rolijion k’i baz su la vérité k’i amèn domoun juska Bondié. I trouv vérité la dan la Bib. (Jan 4:24 ; 17:17 ; 2 Timoté 3:16, 17) Bann rolijion k’i di lo kontrèr sak la Bib i di, i amèn domoun loin d’Bondié. Bonpé domoun i pans ké détroi lamontraj i sort dan la Bib—kom la trinité, lam k’i mor pa, é lanfèr dofé—an vré i sort dan bann fo rolijion. In ladorasion k’i mèt anlèr bann lamontraj komsa i « sèrv pa rien », parské li mèt bann tradision domoun a la plas bann komandman Bondié. (Mark 7:7, 8).

 Bondié i détès bann rolijion ipokrit. (Tit 1:16) Pou èd bann domoun kos koté Bondié, in rolijion i doi pa jus suiv bann tradision oubien bann règ. Mé okontrèr i fo tou lé jour sa néna in léfé su zot vi. Par égzanp, la bib i di : « Si in moun i pans ador Bondié, mé k’li gingn pa ramas son lang, li tronp son prop kèr, é son ladorasion i vo pa rien. Ala ladorasion ké nout Bondié é Papa i konsidèr kom pur é prop : okip bien sak na pu papa momon èk bann vèv dan zot malizé, é kontinié fé atansion lo monn i tach azot » (Jak 1:26, 27) La Bible en français courant i ansèrv lo bann mo « rolijion pa trafiké » pou koz dési lo ladorasion lé pa ipokrit.