Amaro Del hino bachtalo, vašoda kamel, hoj te aven savore fameľiji bachtale. Ada hin lačho hiros. (1. Timotejovi 1:11) Ov sas peršo, ko solachardžas le muršes la romňaha, čiže sphandľas peršo manželstvo. Hoj te avel e fameľija bachtaľi, mušinel o rom la romňaha te sphandel peskro dživipen pro viboris. Ča akor šaj bararen avri peskre čhaven so nekfeder. Kresťanska manželstva hine sphandle avka, sar phenel o zakonos andro štatos, kaj dživen. Pregenen Lukáš 2:1, 4, 5.

So o Del vakerel pal o manželstvo? O Del kamel, hoj o manželija jekhetane te dživen calo dživipen. Zakazinel, hoj o rom te phirel pal aver džuvľa a e romňi te phirel pal aver murša. (Hebrejom 13:4) Andre le Devleskre jakha hin o rozvod igen nalačho. (Malachiáš 2:16) Domukhel le kresťanenge te rozvedzinel pes ča akor, te lakro rom vaj leskri romňi scudzoložindžas. Pregenen Matúš 19:3–6, 9.

O Jehovas kerdžas le romes la romňa avka, hoj jekh avreske te pomožinen. (1. Mojžišova 2:18) O rom pes starinel pal peskri romňi the čhave, hoj len te avel, kaj te bešel, so te chal the so te urel. Leskri buči hin thiš, hoj te sikavel len pal o Del. Mušinel te kamel peskra romňa buter sar pes. O rom e romňi mušinen pes andal calo jilo te kamel a te del jekh avreske pačiv. Vašoda, hoj hine ňedokonala, mušinen te sikhľol, te odmukhel jekh avreske peskre chibi. Ada hin o drom kijo bachtalo dživipen andro manželstvo. Pregenen Efezanom 4:31, 32; 5:22–25, 33; 1. Petra 3:7.

Te pes o rom la romňaha imar na kamen sar varekana the avka mušinen pes te snažinel jekh avreha te dživel šukares. (1. Korinťanom 13:4, 5) E Biblija na phenel, hoj jekh lendar te džan te bešel avrether, hoj len te el smirom le problemendar. Pregenen 1. Korinťanom 7:10–13.

O Jehovas kamel, hoj te aven bachtale. Sikavel tumenge nekfeder drom, sar te dživel. Phenel, hoj tumen te sikhľon tumara dajoratar the dadestar. (Kolosanom 3:20) O Jehovas rado dikhel, te keren lačhe veci prekal leste the prekal Ježiš, leskro čhavo. Pregenen Kazateľ 11:9–12:1; Matúš 19:13–15; 21:15, 16.

Starinen pes, hoj len te avel, so te chal, so te urel the kaj te sovel. (1. Timotejovi 5:8) Služinen le Devleske the avka dživen. Sikaven len ada! (Efezanom 6:4) Te kamena le Devles andal calo jilo, tumare čhave ada sikhľona tumendar. Avka, šaj lendar baron igen lačhe manuša. Pregenen 5. Mojžišova 6:4–7; Príslovia 22:6.

Chvaľinen peskre čhaven the povzbudzinen len. Kampel lenge mek, hoj lenge te sikaven, so hin lačho a so nalačho. Te lenca avka kerena, šaj len ochraňinen le nalačhipnastar. (Príslovia 22:15) Ma maren peskre čhaven zorales, aňi len ma košen. Pregenen Kolosanom 3:21.

Jehovaskre svedki dine avri kňižki, save tumenge pomožinen mište te bararel avri peskre čhaven. Andre kala kňižki hin godži andal e Biblija. Pregenen Žalmy 19:7, 11.