Кеда дуј џене ка лен пе, ко брако ка икљон ленге разна проблемија. Адава шај те овел аѓаар адалеске со ола различно размислинена, различно осетинена хем јавер чхане дикхена ко буќа. Некогаш о проблемија шај те авен авријалдан или таро буќа со нане планириме.

Шај ка овел полокхо те наша таро проблемија, ама и Библија советинела амен те решина лен (Матеј 5:23, 24). Најшукар шај те решинен пе о проблемија ако икерена пе о советија тари Библија.

СО ВАКЕРЕЛА И БИБЛИЈА: „Иси. . . време кеда керела пе лафи“ (Проповедник 3:1, 7). Одвојнен туменге време те керен лафи башо проблеми. Искрено вакер сар осетинеа ту или со мислинеа баши несави бути. Секова пути вакер о буќа сар со и чаче (Ефешаните 4:25). Чак кеда сиан бут хољамо, ма акош ту. Кеда смиримо кереа лафи, тегани нане таро тикно те икљол баро — те авел џи ко акошибе (Изреки 15:4; 26:20).

Кеда нане те согласинен тумен да, ачхов љубезно, хем никогаш ма бистре те сикаве кај мангеа хем ценинеа те ромња или те роме (Колошаните 4:6). Дикх те решине со посигате о проблеми хем ма чхинав те кере лафи лаја или леа (Ефешаните 4:26).

СО ШАЈ ТЕ КЕРЕ:

• Аракх шукар моменти хем бешен те керен лафи башо проблеми.

• Кеда шунеа е јавере, ма чхинав ле џикоте керела лафи. Ка авел то редо да те кере лафи.

СО ВАКЕРЕЛА И БИБЛИЈА: „Манген тумен таро вило јекх јекхеа. Овен прва те сикавен поштовање јекх јекхеске“ (Римјаните 12:10). Бут тано важно сар шунеа. Ов понизно хем сочувствително кеда трудинеа ту те хаљове сар о јавер дикхела ко буќа (1. Петрово 3:8; Јаков 1:19). Ма кер ту само кај шунеа. Ако кереа несави бути, мукх ла ки страна хем шун со мангела то брачно партнери. Ако нашти, пуч дали шај покасно те керен лафи. Кеда дикхеа те ромња или те роме сар некој со и туја, а на против туте, нане сигате те хољане (Проповедник 7:9).

СО ШАЈ ТЕ КЕРЕ:

• Ов спремно те шуне со мислинела о јавер, чак кеда адава нане туке ко ќефи.

• Шун хем хаљов со мангела те вакерел туке ти ромни или то ром. Приметин саве гласоја вакерела туке адава хем дикх о гестија со керела.

СО ВАКЕРЕЛА И БИБЛИЈА: „Тари секоја пхари бути со керела пе иси корист, а о чуче лафија анена ко чоролипе“ (Изреки 14:23). Нане доволно само те џанен сар те решинен о проблеми. Ваљани о солдуј џене те икерен тумен ко адава. Шај нане те овел локхо хем ка ваљани бут те трудинен тумен, ама ко крајо ка овел тумен корист (Изреки 10:4). Ако поможинена тумен јекх јекхеа, козом те овел пхаро, ко крајо ка овел тумен награда (Проповедник 4:9).

СО ШАЈ ТЕ КЕРЕ:

• Одлучинен со ваљани те керен те шај те решинен тумаро проблеми.

• Сар со накхела о време, понекогаш бешен керен лафи башо адава џи кај реслен ко решибе е проблемеа.