2 ЛЕКЦИЈА
Кој тано о Девел?
1. Соске ваљани те служина е Девлеске?
О чачутно Девел керѓа са. Лесте нане ле почеток хем никед нане те овел ле крај (Псалм 90:2). Лестар авела о шукар хабери тари Библија (1. Тимотеј 1:11). Адалеске со о Девел денѓа амен џивдипе, ваљани само леске те служина. Читин Откровение 4:11.
2. Саво тано о Девел?
Нијекх мануш на дикхља е Девле соске ов тано Духо, адава значинела кај лескоро џивдипе тано поупредер таро е манушескоро, кова со џивдинела ки Пхув (Јован 1:18; 4:24). Шај те дикха саво тано о Девел таро буќа со керѓа лен. На пример, адава со иси различна овошја хем лулуѓа сикавела аменге лескоро мангипе хем мудрост. Адава кобор тано баро о небо хем и Пхув сикавена кај иси ле бари сила. Читин Римјаните 1:20.
Панда побутер шај те џана башо Девел ако читинаја и Библија. На пример, ој вакерела аменге со мангела о Девел а со на мангела, сар постапинела е манушенцар хем со керела ко различна ситуацие. Читин Псалм 103:7-10.
3. Иси ли е Девле анав?
О Исус вакерѓа: ‚Амаро Дад со сиан ко небо, те славинел пе тло свето анав‘ (Матеј 6:9). Иако е Девле иси ле бут титуле, лесте иси ле само јекх анав. Ки секоја чхиб, ов различно вакерела пе. Ко романе тано „Јехова“, или палем „Јахве“. Читин Псалм 83:18.
Е Девлескоро анав сине икалдо таро бут Библие хем ко лескоро тхан бешена о титуле Господ или Бог. Ама, кеда сине пишими и Библија, ки лате паше 7.000 пути бешела сине е Девлескоро анав. О Исус вакерела сине е Девлескоро анав е манушенге кеда сикавела лен сине. Читин Јован 17:26.
Дикх о видеоклипи Дали е Девле иси ле анав?
4. Дали о Јехова грижинела пе аменге?
Сар акава загрижимо дад, о Девел грижинела пе кеда аменге пхаро
Дали адава со иси бут проблемија хем пхарипе сикавела кај о Јехова тано Девел со на грижинела пе аменге? Несаве мислинена кај ов мукхела те мучина амен адалеске со мангела те искушинел амен, ама адава нане чаче. Читин Јаков 1:13.
О Девел денѓа е манушеске коркори те биринел со те керел. Зарем на ваљани те ценина акава право со шај коркори те бирина те служина е Девлеске? (Исус Навин 24:15). Ама, бут џене биринена те керен лошнипе е јаверенге, адалеске бут мануша цидена. Е Јеховаске тано бут пхаро со дикхела асавки неправда. Читин 1. Мојсеева 6:5, 6.
О Јехова тано Девел со грижинела пе аменге. Ов мангела те уживина ко џивдипе. Панда хари ов ка цидел са о дукха хем околен со керена о јавера те циден. Џикоте на керела адава, е Девле иси ле шукар причина со аџикерела несаво време. Ки 8-то лекција ка сикљова која тани адаја причина. Читин 2. Петрово 2:9; 3:7, 13.
5. Сар шај те ова паше е Девлеа?
О Јехова мангела те ова леа паше аѓаар со ка кера леа лафи ки молитва. Ов интересинела пе секоле манушеске (Псалм 65:2; 145:18). Ов тано спремно те простинел. О Девел дикхела кобор мангаја те кера адава со ов родела, чак кеда дисаво пути грешинаја. Иако сием несовршена, амен шај те ова паше леа. Читин Псалм 103:12-14; Јаков 4:8.
Адалеске со о Јехова денѓа амен џивдипе, ваљани те манга ле побутер таро са (Марко 12:30). Ка сикава кај мангаја ле ако сикљоваја баши лесте хем кераја са со родела амендар хем тегани ка ова са попаше леа. Читин 1. Тимотеј 2:4; 1. Јованово 5:3.
