1. Со шај мислинена несаве башо вечно живото?

 БУТ мануша пазинена ко хајбе хем трудинена пе редовно те вежбинен те шај те ачховен састе. Сепак, ола на очекујнена кај ка живинен вечно. Адава на само со шај нане ленге реално него хем шај на мангена те живинен вечно башо проблемија со анела лен о пхурипе. Ама о Исус спомнинѓа о „вечно живото“ ки позитивно смисла, сар со сикавела о Јован 3:16 хем 5:24.

2. Сој тано пишимо ко Јован 6 поглавје башо вечно живото? (Јован 6:39, 40).

² Ки јекх прилика о Исус преку јекх чудо со керѓа ле мареа хем мачхенцар, денѓа хајбаске повише милје манушенге. a Адава сине нешто бут чудно. Ама, адава со вакерѓа о тајсутното диве сине панда по чудно. О мануша геле пали лесте џи ко Капернаум, паше ко брего таро Галилејско Море, коте со ов вакерѓа кај о мануша шај те воскреснинен хем те овел лен вечно живото. (Читин Јован 6:39, 40.) Размислин со значинела акава некаске тари тли фамилија хем некаске таро тле амала кола со муле. Е Исусескере лафија сикавена кај бут џене кола со муле шај те воскреснинен хем кај ту хем тле најпаше шај вечно те живинен. Сепак, адава со о Исус вакерѓа ле понадари ко Јован 6 поглавје, буте џененге сине хем понадари да тано пхаро те хаљовел пе. Те дикха акала лафија.

3. Спрема Јован 6:51, со откринѓа о Исус баши песте?

³ О мануша ко Капернаум поврзинѓе песке о чудо е маренцар кова со о Исус англедер керѓа ле, е манаја која со о Јехова денѓа ла е Израелцонге ки пустина. Уствари, и Библија баши мана вакерела кај тани „маро таро небо“ (Пс. 105:40; Јован 6:31). О Исус користинѓа и мана сар темели  те шај те сикавел лен нешто бут важно. Иако ој сине чудо таро Девел, окола со хале латар ко крајо сепак муле (Јован 6:49). Поразлично таро акава, о Исус баши песте вакерѓа кај тано „о чачутно маро таро небо“, „е Девлескоро маро“ хем „о маро со дела живото“ (Јован 6:32, 33, 35). О Исус сикавѓа кај иси јекх важно разлика машкар и мана хем лесте. О Исус вакерѓа: „Ме сиум о маро со дела живото кова со хулило таро небо. Ако некој хала таро акава маро, ка живинел вечно“. (Читин Јован 6:51.) Акава бунинѓа адале Евреен. Сар шај сине о Исус те вакерел кај ало таро небо сар „маро“ кова сој пошукар тари мана кова со о Девел чудоја денѓа ленгере парапапонге? Пало адава, о Исус вакерѓа нешто со шај сине те поможинел ленге те хаљон акава: „О маро со ка дав ле ме тано мло тело“. Ко со шај мислинѓа акалеа? Важно тано те џана о одговор адалеске со адава ка сикавел аменге сар шај амен хем амаре паше те живина вечно. Те дикха ко со мислинѓа о Исус.

О ЏИВДО МАРО ХЕМ ЛЕСКОРО ТЕЛО

4. Соске несаве сине шокириме таро адава со вакерѓа о Исус?

⁴ Несаве таро адала со шунѓе е Исусе сине шокириме кеда ов вакерѓа кај ка дел пло тело „те шај о мануша те живинен“. Дали ола шај мислинѓе песке кај ов ка дел лен пло дословно тело те шај ола те хан ле? (Јован 6:52). Ама тегани о Исус вакерѓа нешто со панда повише шокиринѓа лен: „Ако на хана о тело е манушикане Чхавескоро хем на пиена лескоро рат, нане те добинен живото“ (Јован 6:53).

5. Соске шај те ова сигурна кај о Исус на мислинѓа кај о мануша ваљани те пиен лескоро дословно рат?

⁵ Ко е Ноескоро време, о Девел забранинѓа е манушенге те хан рат (1. Мој. 9:3, 4). О Јехова повторинѓа акаја забрана ко Закони со денѓа ле е Израелцонге. Секова јекх со ка хал сине рат ваљани сине те овел мудардо (3. Мој. 7:27). О Исус сикавела сине е Евреен те икерен са о заповедија таро е Мојсеескоро закони (Мат. 5:17-19). Значи, нашти те замислина аменге кај о Исус би поттикнинела сине са адале Евреен те хан лескоро дословно тело или те пиен лескоро дословно рат. Ама, акале необична лафенцар, о Исус уствари сикавѓа е манушен сар те добинен живото — „вечно живото“ (Јован 6:54).

6. Ки која смисла о Исус спомнинѓа пло тело хем пло рат?

⁶ Со мангља те вакерел о Исус? Јасно тано кај о Исус керела сине лафи ки симболично смисла, исто сар англедер кеда керѓа лафи јекхе Самарјанкаја: „Кој пиела таро пани со ка дав ле ме, никогаш нане те овел жедно, него о пани со ка дав ле ме ка овел ки лесте сар извор пањеа кова со ка анел леске вечно живото“ (Јован 4:7, 14). b О Исус на мангља те вакерел кај и Самарјанка ка добинел вечно живото аѓаар со ка пиел таро несаво дословно пани. Слично, о Исус на мангља те вакерел кај о мануша ко Капернаум коленге со вакерѓа акала лафија, ка живинен вечно ако хана таро лескоро дословно тело хем пиена таро лескоро дословно рат.

ЈАВЕР ПРИЛИКА КОТЕ СО О ИСУС КОРИСТИНЃА СЛИЧНА ЛАФИЈА

7. Со вакерена несаве башо лафија е Исусескере кола сој пишиме ко Јован 6:53?

⁷ Несаве религиозна мануша вакерена кај о лафија е Исусескере таро Јован 6:53 башо  адава те хал пе лескоро тело хем те пиел пе лескоро рат, сикавена сар ваљани те икерел пе е Господарескири вечера. Соске вакерена акава? Адалеске со покасно ки е Господарескири вечера, о Исус вакерѓа нешто слично (Мат. 26:26-28). Ола вакерена кај секова јекх со присуствујнела ки е Господарескири вечера ваљани те лел таро маро хем тари мол кола со пхиравена пе таро вас ко вас. Ама дали тане ко право? Важно тано те џана о одговор адалеске со секова берш милионија мануша ко цело свето кхедена пе аменцар ко акава настан. Те дикха кола тане о разлике машкар е Исусескере лафија сој пишиме ко Јован 6:53 хем адава со вакерѓа ле ки е Господарескири вечера.

8. Кола тане несаве буќа ко со разликујнена пе акала дуј прилике? (Дикх хем о слике.)

⁸ Те дикха дуј разлике со сине ко акала дуј прилике. Прво, кеда хем коте о Исус вакерѓа о лафија сој тане пишиме ко Јован 6:53-56? Вакерѓа лен е Евреенге ки Галилеја ко 32 берш тари а.е. Адава сине околу јекх берш англедер те воспоставинел е Господарескири вечера ко Ерусалим. Дујто, каске вакерѓа акала лафија? Повише џененге тари Галилеја сине поважно те задоволинен пумаре привремена телесна потребе него пумаре духовна потребе (Јован 6:26). Уствари, кеда о Исус вакерѓа нешто со сине ленге пхаро те хаљовен, ола бут сигате чхинавѓе те верујнен ки лесте. Чак  хем несаве таро лескере ученикија чхинавѓе те џан пали лесте (Јован 6:14, 36, 42, 60, 64, 66). Те споредина акава настан адалеа со случинѓа пе околу јекх берш покасно, ко 33 берш тари а.е., кеда о Исус воспоставинѓа е Господарескири вечера. Ки адаја прилика е Исусеа сине лескере 11 верна апостолија иако на халиле целосно са адава со сикавѓа лен. Сепак, поразлично таро повише џене со сине ки Галилеја, лескере верна апостолија сине увериме кај ов тано е Девлескоро Чхаво кова со ало таро небо (Мат. 16:16). Ов пофалинѓа лен: „Тумен ачхилен манцар ко мле искушенија“ (Лука 22:28). Чак само акала дуј разлике сикавена кај ко Јован 6:53 о Исус на мангља те објаснинел сар ваљани те икерел пе е Господарескири вечера. Ама иси панда повише разлике машкар акала дуј прилике.

СО ЗНАЧИНЕНА Е ИСУСЕСКЕРЕ ЛАФИЈА ТУКЕ

9. Коле група манушенге важинена о лафија со вакерѓа о Исус ки е Господарескири вечера?

⁹ Кеда о Исус воспоставинѓа е Господарескири вечера, ов пе апостоленге денѓа маро бизо квасацо хем вакерѓа ленге кај адава претставинела лескоро тело. Пало адава, денѓа лен и мол хем вакерѓа кај адава претставинела лескоро рат преку кова со почминѓа „те важинел јекх сојуз“ (Мар. 14:22-25; Лука 22:20; 1. Кор. 11:24). Адава со вакерѓа тано бут важно. Ко акава нево сојуз нане вклучиме са о мануша него само окола таро „кхер е [духовно] Израелескоро“, кола со ка владинен е Исусеа ко е Девлескоро Царство (Евр. 8:6, 10; 9:15). О апостолија тегани на халиле са башо сојуз, ама пало кратко време, сине помазиме е Девлескере силаја хем уле дело таро нево сојуз кова со денѓа лен прилика те овен е Исусеа ко небо (Јован 14:2, 3).

10. Која тани панда јекх разлика машкар адава со о Исус вакерѓа ки е Господарескири вечера хем адава со вакерѓа е манушенге паше узо Капернаум? (Дикх хем и слика.)

¹⁰ Приметин кај адава со вакерѓа о Исус ки е Господарескири вечера важинела сине башо „тикно стадо“. О прва со уле дело тари акаја тикни група, сине лескере верна апостолија кола со сине заедно леа ки адаја просторија (Лука 12:32). Ленге о Исус денѓа те хан таро маро хем те пиен тари мол адаја рат. О јавера со покасно ка овен сине дело тари адаја група, исто аѓаар ка ваљани сине те лен таро маро хем те пиен тари мол кеда ка икерен е Господарескири вечера. Адала тане окола со ка овен е Исусеа ко небо. Значи, акаја тани панда јекх разлика машкар е Господарескири вечера хем адава со англедер случинѓа пе ки Галилеја. Адава со ов вакерѓа пле апостоленге ки е Господарескири вечера, важинела јекхе тикне група манушенге, а адава со вакерѓа ле е манушенге паше узо Капернаум важинѓа повише манушенге.

11. Таро кола лафија со вакерѓа лен о Исус ки Галилеја дикхјола пе кај на керѓа лафи башо јекх ограничимо број мануша?

¹¹ Кеда сине ки Галилеја ко 32 берш тари а.е., о Исус најангле керѓа лафи е Евреенге кола со мангле те дел лен маро. Сепак, ов пробинѓа те поможинел ленге те хаљон кај иси нешто бут поважно таро дословно хајбе. Ов вакерѓа ленге сој тано адава со шај те дел лен вечно живото. О Исус чак вакерѓа кај окола со муле шај те овен воскресниме ко последно диве хем те живинен засекогаш. Ов на керѓа лафи само тикне група манушенге или башо јекх ограничимо број мануша, сар со сине случај покасно ки е Господарескири вечера. Наместо адава, ки Галилеја ов керѓа лафи башо  јекх благослов кова со са о мануша ка овел лен сине прилика те добинен ле. Уствари, о Исус вакерѓа: „Ако некој хала таро акава маро, ка живинел вечно... О маро со ка дав ле ме тано мло тело, кова со ка дав ле те шај о мануша те живинен“ (Јован 6:51). c

12. Со ваљани те шај некој те добинел вечно живото?

¹² О Исус на вакерѓа е Евреенге ки Галилеја кај акава благослов ка добинел ле секова мануш со некогаш живинѓа ки пхув или секој со ка бијанѓовел. Само окола со хана таро акава маро, јавере лафенцар окола со сикавена вера, ка овел лен корист. Бут џене кола со вакерена кај тане христијања мислинена кај ка овен спасиме само ако верујнена ко Исус хем ако ки лесте дикхена сар пло Спасители (Јован 6:29). Ама, несаве таро мануша ки Галилеја кола со англедер верујнѓе ко Исус чхинавѓе те џан пали лесте. Соске?

13. Со ваљани те шај некој те овел чачутно ученико е Христосескоро?

¹³ Повише џенен колен со о Исус денѓа хајбаске џана сине пали лесте адалеске со ов денѓа лен адава со ола мангле. Ленге сине важно ов те сасљарел лен, те дел лен хајбаске хем те вакерел ленге сине адава со ола мангена сине те шунен. Сепак, о Исус сикавѓа кај окола со мангена те овен лескере чачутне ученикија ваљани те керен нешто повише. Ов на ало ки пхув само те шај те задоволинел о телесна потребе е манушенгере. Ола ваљани сине те прифатинен лескири покана те авен ки лесте аѓаар со ка  шунен ле хем ка икерен са адава башо со сикавела сине (Јован 5:40; 6:44).

14. Со значинена о лафија е Исусескере сој пишиме ко Јован 6:53?

¹⁴ О Исус истакнинѓа е манушенге кај ваљани те сикавен вера. Вера ко со? Ки откупнина која со преку е Исусескоро тело хем лескоро рат, кола со ка жртвујнел лен сине, ка дел прилика е манушенге те живинен вечно. Асавки вера сине бут важно е Евреенге, а бут тани важно хем аменге да авдиве (Јован 6:40). Значи, адава со о Исус вакерѓа ко Јован 6:53 значинела кај ваљани те сикава вера ки откупнина те шај те добина вечно живото. Акаја прилика иси буте манушен (Еф. 1:7).

15-16. Кола важна буќа сиклилем таро 6 поглавје таро Јован?

¹⁵ О библиско извештај сој пишимо ко Јован 6 поглавје тано бут важно аменге авдиве хем башо амаре пашутне. Лестар сикљоваја кај ов бут мангела е манушен. Кеда сине ки Галилеја, сасљарѓа насвален, сикавѓа е манушен башо Царство хем денѓа лен хајбаске кеда ваљанѓа ленге (Лука 9:11; Јован 6:2, 11, 12). А сој панда поважно о Исус сикавѓа лен кај ов тано „о маро со дела живото“ (Јован 6:35, 48).

¹⁶ Окола сој ки група колен со о Исус викинѓа „јавера бакхре“, на лена хем на ваљани те лен таро маро хем тари мол кеда икерела пе јекх пути ко берш е Господарескири вечера (Јован 10:16). Сепак, ола хана таро „маро со дела живото“ аѓаар со сикавена вера ки откупно жртва е Исус Христосескири (Јован 6:53). Тари јавер страна, окола сој тане дело таро „тикно стадо“ ваљани те лен таро маро хем тари мол хем адалеа сикавена кај тане дело таро нево сојуз хем кај иси лен надеж те владинен е Исусеа ко небо. Бизи разлика дали сием дело таро помазаникија или таро јавера бакхре, о извештај таро Јован 6 поглавје тано аменге бут важно. Ов истакнинела кобор тано важно те сикава вера хем аѓаар те добина вечно живото.