КО БИБЛИСКО време, јекхе управителе сине ле задача те грижинел пе башо домаќинство или имот јавере манушескоро. О хебрејско хем о грчко лафи сој преведимо сар „управители“ понекогаш користинела пе башо надгледнико да.

Џикоте сине робо ко Египет, о Јосиф, о чхаво е Јаковескоро, уло управители упро имот пле господарескоро. Уствари, ов мукхља са е Јосифеске ко васта (1. Мој. 39:2-6). Покасно, кеда о Јосиф уло моќно владетели ко Египет, ов да чхивѓа управители ко пло кхер (1. Мој. 44:4).

Ко е Исусескоро време нормално сине окола со сине лен ниве те живинен ко дизја, дур таро пумаре ниве. Адалеске, ола чхивена сине управителија со надглединена сине е работникон кола со керена сине бути ко ленгоро имот.

Кој шај сине те служинел сар управители? Јекх римско писатели таро прво веко со викинела пе сине Колумела пишинѓа кај, те шај те овел надгледнико, или управители, јекх робо ваљани „шукар те пенџарел и бути ко имот“. Ов ваљани те дикхел „о работникија шукар те керен пли бути“, ама исто аѓаар ваљани сине те на понашинел пе ленцар грубо. О Колумела исто аѓаар пишинѓа: „Најважно услов те шај некој те овел управители тано те на мислинел кај џанела са, хем секогаш те овел спремно те сикљовел неве буќа“.

Ко е Девлескоро Лафи, о пример јекхе управителескоро хем лескири бути користинела пе те објаснинен пе несаве таро активностија со керена пе ко јекх собрание. На пример, о апостол Петар поттикнинѓа е христијанен те користинен пле способностија кола со добинѓе лен таро Девел те шај те служинен јекх јекхеске „сар шукар управителија кола со добинѓе е Девлескере шукарипаске со на заслужинаја ле“ (1. Пет. 4:10).

О Исус да користинѓа пример јекхе управителескоро ки споредба сој пишими ко Лука 16:1-8. Исто аѓаар, ко јекх пророштво башо знако тари пли присутност сар Цари, о Исус уверинѓа пле следбеникон кај ка чхивел „верно хем разборито робо“, јавере лафенцар „верно управители“. И главно задача адале управителескири ка овел секогаш те дел храна е Христосескере следбениконге џикоте трајнена о последна диве (Мат. 24:45-47; Лука 12:42). Сариненге аменге ко цело свето о верно управители спреминела публикацие кола со керена позорали амари вера. Амен сием бут благодарна баши адаја духовно храна!