О Девел грижинела пе туке
И БИБЛИЈА дела амен о најшукар советија, адалеске сој тани лил таро Девел. Ој нане медицинско прирачнико, ама шај те поможинел аменге кеда иси амен пхаре околностија, кеда вознемиринела амен о начин сар размислинаја, кеда иси амен негативна чувствија хем кеда иси амен проблемија амаре физичко или психичко састипаја.
Сој најважно, и Библија уверинела амен кај амаро Створители, о Јехова о Девел, a хаљола амаре мисле хем чувствија пошукар таро било кој јавер. Бизи разлика саве проблемеа боринаја амен ов тано спремно те поможинел аменге. На пример, размислин башо акала дуј утешна библиска стихија:
„О Јехова тано паше узо адала сој пхаге вилеа хем спасинела адален сој пхаге духоја“(ПСАЛМ 34:18).
„Ме, о Јехова, тло Девел, икерава тут таро тло десно вас хем вакерава туке: ’Ма дара! Ме ка поможинав туке‘“(ИСАИЈА 41:13).
Ама, сар о Јехова поможинела аменге те икљова ко крајо е проблеменцар сој тане поврзиме е емоционално састипаја? Сар со ка дикхе ко следна статие, о Јехова сикавела кај чаче грижинела пе аменге ко бут начинија.
a Јехова тано лично анав е Девлескоро (Псалм 83:18).
