„Пробинѓум те читинав и Библија некобор пути, ама секогаш кеда дикхава сине кобор тани бари откажинава ман сине“ (Бриана, 15).

 Дали туке да случинѓа пе акава? Акаја статија шај те поможинел туке!

•  Соске те читинав и Библија?

•  Сар те читинав и Библија?

•  Со вакерена јавера терне

 Шај нане туке интересно те читине и Библија. Ако оја, џи негде адава тано нормално. Шај дикхеа ла само сар јекх лил со иси ле повише таро милја странице, пишимо ситна буквенцар бизи нијекх слика. Сигурно мислинеа туке кај о читибе и Библија никогаш нашти те споредине ле дикхибаја телевизија.

 Ама, размислин башо акава: Ако случајно аракхеа јекх бут пурано сандуко барвалипаја, нане ли те манге те дикхе со са иси андре?

 И Библија тани баш сар јекх асавко сандуко. Ој тани пхерди мудра бисерија со ка поможинен туке

•   те ане шукар одлуке

•   те накхе шукар тле родителенцар

•   те аракхе чачутне амала

•   те икљове ко крајо кеда сиан ко стрес

 Сар шај јекх добором пурано лил те овел практично аменге авдиве? Адалеске со лакоро пишибе водинѓа ле о Девел преку о свети дух (2. Тимотеј 3:16). Адава значинела кај о советија ки Библија авена таро Девел, а ов шај те дел амен о најшукар советија.

 Јекх начин тано аѓаар со ка читине ла таро почеток џи ко крајо. Аѓаар ка џане кова тано лакоро хабери. Иси јавера да начинија сар те читине и Библија. Аке дуј предлогија:

•    Шај те читине цело Библија редоја тари 1. Мојсеева џи ко Откровение.

•    Шај те читине и Библија хронолошки — спрема адава сар случинѓе пе о настанија.

 Предлог: Ко превод Нов свет, ко Додаток 19 иси списако е главна настаненцар таро е Исусескоро живото ки Пхув ко хронолошко редо.

 Јавер начин сар шај те читине и Библија тано аѓаар со ка бирине несаво извештај кова со керела лафи баши адава со мучинела тут ко моменти. На пример:

•   Дали мангеа те аракхе туке чачутне амала? Читин о извештај башо Јонатан хем о Давид (1. Самоилова, поглавја 18- 20). Аракх о особине со сине е Давиде кола со веројатно привлекујнѓе е Јонатане.

•   Дали мангеа те сикљове сар те на пере ко искушенија? Читин о извештај башо адава сар о Јосиф на пело ко искушенија (1. Мојсеева, поглавје 39). Аракх котар о Јосиф добинѓа сила те на перел ко искушенија.

•   Дали мангеа те џане сар шај те поможинел туке и молитва? Читин е Неемијаскоро искуство (Неемија, поглавје 1 хем 2). Аракх доказија башо адава кобор моќна сине е Неемијаскере молитве.

 Предлог: Кеда читинеа и Библија аракх несаво мирно тхан коте со ка шај те концентририне тут.

 Панда јекх начин сар шај те читине и Библија тано те бирине несаво извештај или псалм, те читине ле, а пало адава те размислине сар шај те применине о поуке. Откеда ка читине, шај те пуче тут:

•    Соске о Јехова мукхља те овел пишимо акава ки Библија?

•    Со сикавела манге акава башо Јехова хем башо адава сар ов керела о буќа?

•    Сар шај те применинав акава ко мло живото?

 Предлог: Чхив туке цел! Пишин туке о датум кеда мангеа те почмине е читибаја и Библија.