Оја, ки Библија иси бут доказија кај постојнела Девел. Ој советинела амен те на верујна сигате ко религиозна сикајба, него те користина амаро разум те шај те овел амен вера ко Девел (Римјаните 12:1; 1. Јованово 5:20). Те дикха о следна библиска доказија кола со сикавена кај постојнела Девел:

•   О редо со владинела ко универзум хем о живото ки лесте сикавена кај постојнела Створители. И Библија вакерела: „Секова кхер некој керѓа ле, а окова со керѓа са тано о Девел“ (Евреите 3:4). Иако акава логично чачипе тано едноставно, бут учиме мануша мислинена кај акава тано силно доказ кај постојнела Девел. a

•   Освен со иси лен физичка потребе, е манушен иси лен природно желба те хаљовен и смисла хем и цел пле животоскири. И Библија потврдинела акава факти. Ки лате пишинела кај иси амен „духовна потребе“, коте сој вклучими и желба те пенџара е Девле хем те служина леске (Матеј 5:3; Откровение 4:11). Адава со иси амен духовна потребе тано доказ кај постојнела Девел, јекх грижливо Створители кова со мангела те поможинел аменге те задоволина адала потребе (Матеј 4:4).

•   О детална пророштвија кола со сине пишиме ки Библија веконцар англедер исполнинѓе пе џи ко најтикно детали. Адава сикавела кај мора те авен некастар сој тано бут побаро таро мануш (2. Петрово 1:21).

•   О писателија е Библијакере џанена сине бут повише баши наука него о мануша со живинена сине ко ленгоро време. На пример, ко пурано време бут мануша мислинѓе кај и Пхув икерела пе упро несаво животно, сар сој слони или желка. Спротивно таро адава, ки Библија пишинела кај и Пхув на икерела пе ко ништо (Јов 26:7). Исто аѓаар, ки лате пишинела кај е Пхувјакири форма тани округласто (Исаија 40:22). Бут мануша мислинена кај о најлогично заклучок тано кај о библиска писателија добинѓе акала информацие таро Девел.

•   Ки Библија иси одговорија башо бут важна пучиба. На пример, несаве таро адала пучиба тане: Ако о Девел мангела амен хем иси ле моќ соске иси мукхе хем лошнипе? Соске и религија, наместо шукар, бут пути иси ла лошно влијание упро мануша? (Тит 1:16). Бут мануша со нашти те аракхен о соодветна одговорија ко акала пучиба, шај локхесте те почминен те на верујнен ко Девел.