Keda duj džene ka len pe, ko brako ka ikljon lenge razna problemija. Adava šaj te ovel agjaar adaleske so ola različno razmislinena, različno osetinena hem javer čhane dikhena ko bukja. Nekogaš o problemija šaj te aven avrijaldan ili taro bukja so nane planirime.

Šaj ka ovel polokho te naša taro problemija, ama i Biblija sovetinela amen te rešina len (Matej 5:23, 24). Najšukar šaj te rešinen pe o problemija ako ikerena pe o sovetija tari Biblija.

SO VAKERELA I BIBLIJA: „Isi. . . vreme keda kerela pe lafi“ (Propovednik 3:1, 7). Odvojnen tumenge vreme te keren lafi bašo problemi. Iskreno vaker sar osetinea tu ili so mislinea baši nesavi buti. Sekova puti vaker o bukja sar so i čače (Efešanite 4:25). Čak keda sian but holjamo, ma akoš tu. Keda smirimo kerea lafi, tegani nane taro tikno te ikljol baro — te avel dži ko akošibe (Izreki 15:4; 26:20).

Keda nane te soglasinen tumen da, ačhov ljubezno, hem nikogaš ma bistre te sikave kaj mangea hem ceninea te romnja ili te rome (Kološanite 4:6). Dikh te rešine so posigate o problemi hem ma čhinav te kere lafi laja ili lea (Efešanite 4:26).

SO ŠAJ TE KERE:

• Arakh šukar momenti hem bešen te keren lafi bašo problemi.

• Keda šunea e javere, ma čhinav le džikote kerela lafi. Ka avel to redo da te kere lafi.

SO VAKERELA I BIBLIJA: „Mangen tumen taro vilo jekh jekhea. Oven prva te sikaven poštovanje jekh jekheske“ (Rimjanite 12:10). But tano važno sar šunea. Ov ponizno hem sočuvstvitelno keda trudinea tu te haljove sar o javer dikhela ko bukja (1. Petrovo 3:8; Jakov 1:19). Ma ker tu samo kaj šunea. Ako kerea nesavi buti, mukh la ki strana hem šun so mangela to bračno partneri. Ako našti, puč dali šaj pokasno te keren lafi. Keda dikhea te romnja ili te rome sar nekoj so i tuja, a na protiv tute, nane sigate te holjane (Propovednik 7:9).

SO ŠAJ TE KERE:

• Ov spremno te šune so mislinela o javer, čak keda adava nane tuke ko kjefi.

• Šun hem haljov so mangela te vakerel tuke ti romni ili to rom. Primetin save glasoja vakerela tuke adava hem dikh o gestija so kerela.

SO VAKERELA I BIBLIJA: „Tari sekoja phari buti so kerela pe isi korist, a o čuče lafija anena ko čorolipe“ (Izreki 14:23). Nane dovolno samo te džanen sar te rešinen o problemi. Valjani o solduj džene te ikeren tumen ko adava. Šaj nane te ovel lokho hem ka valjani but te trudinen tumen, ama ko krajo ka ovel tumen korist (Izreki 10:4). Ako pomožinena tumen jekh jekhea, kozom te ovel pharo, ko krajo ka ovel tumen nagrada (Propovednik 4:9).

SO ŠAJ TE KERE:

• Odlučinen so valjani te keren te šaj te rešinen tumaro problemi.

• Sar so nakhela o vreme, ponekogaš bešen keren lafi bašo adava dži kaj reslen ko rešibe e problemea.