6 LEKCIJA
Isi li nadež bašo mule?
1. Kova tano o šukar haberi bašo mule?
Džikote sine o Isus ki Phuv, leskoro amal o Lazar mulo. Ov dživdinela sine ki Vitanija, jekh than paše Erusalim. Džikote o Isus reslja ko adava than, nakhle štar dive sar so o Lazar mulo. Keda reslja, o Isus barabar e Lazareskere phenjencar, e Martaja hem e Marijaja, gelo ko than kote so parunge le. Adari sigate khedinge pe javera da manuša. Zamislin tuke kobor sine radosna i Marta hem i Marija keda o Isus vazdingja e Lazare taro mule! Čitin Jovan 11:21-24, 38-44.
I Marta džanela sine o šukar haberi bašo mule. Oj džanela sine kaj o Jehova ka vazdel e mulen palem te dživdinen ki Phuv. Čitin Jov 14:14, 15.
2. So ovela e manušencar palo meribe?
O Devel vakergja e Adameske: ,Tari phuv sian, ki phuv ka irane tu‘ (1. MOJSEEVA 3:19)
O manuša tane kerde tari phuv (1. Mojseeva 2:7; 3:19). Ki amende na dživdinela nesavo duho hem ništo amendar na ačhovela te dživdinel palo meribe. Keda ka mera, amari godi na kerela buti hem pobuter našti te mislina. Adaleske, keda voskresningja, o Lazar na vakergja kaj sine negde ili kaj kergja nešto džikote sine mulo, soske o mule nane svesna bašo ništo. Čitin Psalm 146:4; Propovednik 9:5, 6, 10.
Keda nekoj merela, dali o Devel mučinela le ki jag? Adaleske so i Biblija sikavela kaj o mule nane svesna bašo ništo, o sikljojbe bašo pekol tano čisto hovajbe hem ladžakerela e Devle. E Devleske ,niked ni na alo ki godi‘ te mučinel e manušen ki jag. Čitin Eremija 7:31.
Dikh o videoklipi So ovela e manušencar palo meribe?
3. Šaj li o mule te keren amencar lafi?
O mule našti ni te keren lafi ni te šunen (Psalm 115:17). Ama nesave angelija tane lošna hem šaj te keren e manušencar lafi agjaar so kerena pe kaj tane adala so mule (2. Petrovo 2:4). O Jehova zabraninela te kerel pe lafi e mulencar. Čitin 5. Mojseeva 18:10, 11.
4. Koj ka voskresninel?
Milionija manuša so mule šaj palem te dživdinen ki Phuv. Ka oven voskresnime čak nesave manuša so kerena sine lošna bukja soske na pendžarena sine e Devle. Čitin Luka 23:43; Dela 24:15.
Okola so ka voskresninen ka šaj te sikljon o čačipe bašo Devel hem te sikaven vera ko Isus adalea so ka oven leske poslušna (Otkrovenie 20:11-13). Ola ka šaj te dživdinen večno ki Phuv samo ako kerena adava so i šukar. Čitin Jovan 5:28, 29.
5. So sikavela o voskresenie bašo Jehova?
Ka ovel voskresenie adaleske so o Devel bičhalgja ple Čhave te del plo dživdipe amenge. O voskresenie sikavela kobor but o Jehova mangela amen hem kobor tano šukar amencar. Keda ka voskresninen o mule, kaste mangea tu te dikhe? Čitin Jovan 3:16; Rimjanite 6:23.
