KO PURANO vreme o džamutro ili leskiri familija dena sine babahako e bojrakere familijake keda phandena sine pumare lafija te šaj te len pe. Šaj sine te del pe sar babahako skapocena bukja, životne ili pare. Ponekogaš o babahako dela pe sine agjaar so o džamutro valjani sine te kerel buti. Adava šaj te dikha le taro e Jakoveskoro slučaj kova so sine spremno te kerel buti efta berš e Rahelakere dadeske te šaj te lel la (1. Moj. 29:17, 18, 20). Soske kerela pe sine adava?

I biblisko izučuvačka i Kerol Maers, vakerela: „O babahako sine dendo e bojrakere familijake soske lengiri čhaj našti sine više te pomožinel len okolu i niva hem o životne“. O babahako šaj isto agjaar pomožinela sine e duje familienge te oven popaše, hem agjaar šaj sine o familie te pomožinen jekh jekheske keda ka oven len sine problemija. Osven adava, o babahako sikavela sine kaj i čhaj tani verimi hem kaj panda hari ka džal peske taro ple dadeskoro kher hem ottegani ka zaštitinel la hem ka grižinel pe lake o rom namesto o dad.

O babahako na značinela sine kaj i romni tani nesavo predmeti kova so šaj sine te kinel pe ili te bikinel pe. Ko jekh lil bašo životo ko purano Izrael pišinela: „I obvrska te del pe babahako e čhajakere familijake šaj te izgledinel sar te phene kinela pe e čhaja. Ama o babahako dela pe sine te šaj te učharel pe adava so našavela i familija — jekh členi kova so pomožinela len sine — a na sar cena so platinela pe te šaj te lel pe romni“ (Ancient Israel—Its Life and Institutions).

Avdive, ko nesave phuvja o manuša ponadari da dena babahako. Keda o roditelija soj tane Svedokija rodena babahako, valjani lengiri „razumnost te ovel pendžardi sarinenge“, agjaar so nane te roden poviše taro adava soj razumno (Fil. 4:5; 1. Kor. 10:32, 33). Agjaar, ka sikaven kaj na mangena o pare hem kaj nane alčna (2. Tim. 3:2). Isto agjaar, keda o roditelija soj Svedokija na rodena baro babahako, tegani o džamutro na ka valjani te odložinel o brako te šaj te zarabotinel bašo babahako. Ili na ka valjani te čhinavel e pionersko službaja te šaj te ovel le dovolno pare bašo babahako.

Ko nesave phuvja o zakoni rodela te del pe babahako. Ko asavke thana o roditelija soj Svedokija tane poslušna bašo asavke zakonija. Soske? Adaleske so o Devel rodela taro ple sluge te oven poslušna e vlastenge hem te ikeren o zakonija kola so nane protiv e Jehovaskere zakonija (Rim. 13:1; Dela 5:29).