O sveti duh tano i sila so koristinela la o Devel (Mihej 3:8; Luka 1:35). O Devel koristinela plo duho agjaar so dela pli energija adari kote so valjani te šaj te kerel adava so mangela (Psalm 104:30; 139:7).

 Ki Biblija o hebrejsko lafi bašo „duho“ tano ruah, a o grčko pnevma. Najčesto akale lafencar mislinela pe ki e Devleskiri sila, javere lafencar ko sveti duh (1. Mojseeva 1:2). Sepak, ki Biblija akale lafen isi len javer da značenje:

•   zdiv (Avakum 2:19; Otkrovenie 13:15)

•   bavlal (1. Mojseeva 8:1; Jovan 3:8)

•   životno sila (Jov 34:14, 15)

•   nekaskoro narav ili stavi (4. Mojseeva 14:24)

•   duhovna suštestvija sar, na primer, o Devel hem o angelija (1. Carevite 22:21; Jovan 4:24)

 Sa akala značenja sikavena ko nešto so manuš našti te dikhel le, ama o rezultatija lendar dikhena pe. Jekh rečniko sporedinela e Devleskoro duho „bavlalaja soske na dikhela pe, nane materijalno hem tani mokjno“ (An Expository Dictionary of New Testament Words, taro W. E. Vine).

 Isto agjaar, i Biblija bašo e Devleskoro duho vakerela kaj tano leskere „vasta“ ili „naja“ (Psalm 8:3; 19:1; Luka 11:20; sporedin hem Matej 12:28). Isto sar jekh majstori so koristinela pe vasta hem pe naja džikote kerela buti, agjaar o Devel koristingja plo duho bašo bukja sar soj:

•   te stvorinel o univerzum (Psalm 33.6; Isaija 66:1, 2)

•   te pišinel pe i Biblija (2. Petrovo 1:20, 21)

•   te pomožinel ple slugenge taro purano vreme te keren čudija hem te propovedinen (Luka 4:18; Dela 1:8 1. Korinkjanite 12:4-11)

•   te pomožinel okolenge so šunena le te oven len šukar osobine (Galatite 5:22, 23)

O sveti duh nane ličnost

 Adalea so i Biblija bašo e Devleskoro duho vakerela kaj tano sar „vasta“, „naja“ ili „zdiv“, sikavela kaj o sveti duh nane ličnost (2. Mojseeva 15:8, 10). E majstoreskere vasta našti korkori pestar te funkcionirinen, bizi leskiri godi hem telo. Slično, e Devleskoro sveti duh vlijajnela samo keda tano vodimo taro Devel (Luka 11:13). Isto agjaar, i Biblija sporedinela e Devleskoro duho panjea hem povrzinela le veraja hem pendžaribaja. Asavke sporedbe sikavena kaj o sveti duh nane ličnost (Isaija 44:3; Dela 6:5; 2. Korinkjanite 6:6).

 Ki Biblija tano pišimo e Devleskoro anav — Jehova, hem leskere Čhaveskoro — Isus Hristos; ama nigde na pišinela kaj o sveti duh isi le anav (Isaija 42:8; Luka 1:31). Angleder te ovel mudardo baši pli vera, o hristijani o Stefan dobingja vizija taro nebo kote so dikhlja samo duje dženen, a na trinen. I Biblija vakerela: „A ov, pherdo sveti duhoja, dikhlja ko nebo hem dikhlja e Devleskiri slava hem e Isuse sar tergjola tari e Devleskiri desno strana“ (Dela 7:55). O Stefan dikhlja akaja vizija preku o sveti duh, javere lafencar e Devleskiri sila.

 Pogrešno haljojbe: O sveti duh tano ličnost hem delo taro Trojstvo, sar so pišinela ko 1. Jovanovo 5:7, 8 ko Prevod taro MPC.

 Čačipe: Ko 1. Jovanovo 5:7, 8 ko Prevod taro MPC tane čhivde hem o lafija: ko nebo o Dad, o Lafi hem o Sveti Duh, sotrin tane jekh. Hem trin tane so svedočinena ki phuv. Ama o istražuvačija otkringje kaj o apostol Jovan na pišingja akala lafija hem sprema adava nane delo tari Biblija. O profesori Brus Mecger pišingja: „Akala lafija tane dodajme hem na valjani te oven delo taro Nevo Zavet“ (A Textual Commentary on the Greek New Testament).

 Pogrešno haljojbe: I Biblija dela manušikane karakteristike e sveti duhoske, a adava sikavela kaj tano ličnost.

 Čačipe: Nesave bibliska stihija dena manušikane karakteristike e sveti duhoske. Na primer, o Isus bašo sveti duh vakergja kaj tano „pomošniko“ kova so valjani sine te sikavel soj o grevo, te vodinel, te kerel lafi, te šunel, te objavinel, te slavinel hem te priminel (Jovan 16:7-15). Ama adava na značinela kaj o sveti duh tano ličnost. Ki Biblija isto agjaar dena pe asavke karakteristike baši mudrost, o meribe hem o grevo (Izreki 1:20; Rimjanite 5:17, 21). Na primer, baši mudrost vakerela pe kaj isi la „postapke“ hem „čhave“, a bašo grevo vakerela pe kaj hovavela, mudarela hem kerela pogrešna želbe (Matej 11:19; Luka 7:35; Rimjanite 7:8, 11).

 Pogrešno haljojbe: Adava so krstinaja amen ko anav e sveti duhoskoro sikavela kaj tano ličnost.

 Čačipe: Ponekogaš ki Biblija koristinela pe o lafi „anav“ te šaj te istakninel pe nekaskiri mokj hem avtoriteti (5. Mojseeva 18:5, 19-22; Estira 8:10). Na primer, keda vakerela pe „ko anav e zakoneskoro“ na značinela kaj o zakoni tano ličnost. Okova so krstingja pe „ko anav“ e sveti duhoskoro priznajnela i mokj hem i uloga so isi e sveti duho ki e Devleskiri namera (Matej 28:19).

 Pogrešno haljojbe: E Isuseskere apostolija hem o javera prva hristijanja verujnena sine kaj o sveti duh tano ličnost.

 Čačipe: Ni i Biblija ni i istorija na potvrdinena akava. Ki Encyclopædia Britannica pišinela: „O sveti duh sine definirimo sar Devel ... ko Vselensko sobor ko Konstantinopol ko 381 berš“. Akava slučingja pe poviše taro 250 berš palo meribe e posledno apostoleskoro.