E Jehovaskere svedokija na mešinena pe ki politika a bašo adava isi len temeli ki Biblija. Na trudinaja amen te menina o vlade ili te vlijajna upro političarija. Osven adava, na kandidirinaja amen hem na glasinaja keda isi politička izborija. I Biblija dela silna pričine bašo akava.

•   Amen džaja palo primer e Isuseskoro, ov na manglja te ovel le nisavi političko funkcija (Jovan 6:15). Ov sikavela sine ple učenikon te na oven delo taro akava sveto hem jasno vakergja lenge kaj ola na valjani te len nekaskiri strana ki politika (Jovan 17:14, 16; 18:36; Marko 12:13-17).

•   Amen siem verna e Devleskere Carstvoske. O Isus mislingja ki leste keda vakergja: „Akava šukar haberi bašo carstvo ka propovedinel pe ko celo sveto“ (Matej 24:14). Sar pretstavnikija taro e Devleskoro Carstvo, kola so isi len zadača te vakeren kaj ov ka avel, amen na mešinaja amen ki politika ki nijekh phuv, a ni ki amari kote so živinaja (2. Korinkjanite 5:20; Efešanite 6:20).

•   Adaleske so na mešinaja amen ki politika, amen šaj te vakera o šukar haberi bašo e Devleskoro Carstvo sa e manušenge bizi razlika save politička stavija isi len. Taro amare lafija hem postapke trudinaja amen te sikava kaj verujnaja kaj samo e Devleskoro Carstvo ka anel krajo sa e problemenge (Psalm 56:11).

•   Siem ko jekhipe ko celo sveto, adaleske so maškar amende nane amen politička podelbe (Kološanite 3:14; 1. Petrovo 2:17). Tari javer strana, ko religie kote so lengere členija mešinena pe ki politika isi podelbe (1. Korinkjanite 1:10).

 Poštujnaja e vladen. Iako na mešinaja amen ki politika, amen poštujnaja e vlasten ki phuv kote so živinaja. Amen ikeraja i biblisko zapoved: „Sekova manuš neka ovel podložno e vlastenge soj upreder leste“ (Rimjanite 13:1). Amen poštujnaja o zakoni, platinaja danok hem poddržinaja adava so o vlastija kerena bašo šukaripe e manušengoro. Na učestvujnaja ko ništo so šaj te peravel nekaskiri vlast, nego ikeraja amen ko biblisko sovet te molina amen bašo „carija hem adalenge soj tane ki vlast“, posebno keda valjani te anel pe nesavi odluka so ka vlijajnel upri amari služba e Devleske (1. Timotej 2:1, 2).

 Isto agjaar, amen poštujnaja e javerengoro pravo dali ka mešinen pe ki politika ili na. Na primer, na keraja problemija keda isi izborija hem na čhivaja e manušen te na glasinen.

 Dali adava so na mešinaja amen ki politika tano nešto nevo? Na. O apostolija hem o javera hristijanja ko prvo veko sine len isto stavi sprema o vlastija. Ko lil Beyond Good Intentions pišinela: „Iako verujnena sine kaj mora te poštujnen e vlasten, o prva hristijanja verujnena sine kaj na valjani te mešinen pe ki politika“. Isto agjaar, ko lil On the Road to Civilization pišinela kaj o prva hristijanja „na prifatingje politička položbe“.

 Dali adava so na mešinaja amen ki politika tano opasno baši bezbednost e državakiri? Na. Amen siem manuša so mangena o mir hem adaleske o vlastija na valjani te daran amendar. Interesno tano adava so bešela ko jekh izveštaj so objavingja le i Nacionalno ukrainsko akademija baši nauka ko 2001 berš. Kerela pe lafi baši amari neutralnost, ki leste pišinela: „Avdive nekaske na svidžinela pe akava stavi so isi len e Jehovaskere svedokija; adaja tani i glavno pričina soske sine obvinime ko vreme keda sine o totalitarno nacističko hem komunističko režim“. Iako e Jehovaskere svedokija sine ugnetime ko vreme keda živinena sine ko Sovetsko Sojuz, ola „palem poštujnena sien e vlasten. Ola česno hem nesebično kerena sine buti ko zemjodelska zadruge hem ko fabrike hem na sine opasna bašo komunističko režim“. Avdive da adava so verujnena hem adava sar ponašinena pe e Jehovaskere svedokija nane opasno baši „bezbednost e državakiri“, bešela ko zaklučok taro akava izveštaj.