Sar o Isus izgledinđa?
So phenela i Biblija?
Niko na đanela tačno sar izgledinđa o Isus sose ki Biblija na vaćeri pe ando oleso izgled. Odova mothovi so nane najvažno sar o Isus izgledinđa. Ama, ando disave e biblijake izveštaja šaj te pretpostavina sar o Isus izgledinđa.
Oleso muj: Sebepi so e Isusesi daj hine Jevrejka, o Isus verovatno izgledinđa sar sa avera Jevreja (Jevrejima 7:14). Ov na razlikujinđa pe but ando avera manuša. Jekhvar, ćorjalje đelo andi Galileja ko Jerusalim hem niko na penđarđa le (Jovan 7:10, 11). Isto ađahar, verovatno na razlikujinđa pe but ando pe najpaše učenikija. Ked o naoružana manuša alje te astaren le, o Juda Iskariotski morandilo te mothovi olenđe koj tano o Isus (Matej 26:47-49).
Olese bala: O Isus verovatno na hine le bare bala, sose i Biblija phenela so o bare bala tane lađ jekhe muršese (1. Korinćanima 11:14).
Olesi brada: O Isus hine le brada. Ov ićerđa pe ko jevrejsko zakoni premalo kova o murša na valjanđe te ćhinen o krajija andi pi brada hem ađahar te ruminen la (Levitska 19:27; Galatima 4:4). Isto ađahar, ko jekh e biblijako proročanstvo kova vaćeri ando Isusese muke, pomini pe olesi brada (Isaija 50:6).
Oleso telo: O Isus hine zoralo manuš. Ov phirindoj đelo ki služba hem nakhlja but baro drumo (Matej 9:35). Duj putija čistinđa o jevrejsko hram, irinđa o astalija okolenđe so menjinđe o pare hem bičeja fordinđa e životinjen ando hram (Luka 19:45, 46; Jovan 2:14, 15). Ki enciklopedija Maklintok hem Strong pisini: „Sa so pisini ko jevanđelja mothovi so o Isus hine zoralo hem sasto manuš“ (4. deo, strana 884).
So dićhilo ko oleso muj: O Isus hine ljubazno hem saosećajno hem odova dićhilo ko oleso muj (Matej 11:28, 29). Sa o manuša hine slobodna te roden olestar uteha hem pomoć (Luka 5:12, 13; 7:37, 38). Čak hem o ćhave osetinđe pe šukar ked hine oleja (Matej 19:13-15; Marko 9:35-37).
Disave hovajba ando Isuseso izgled
Hovajbe: Disave phenena so o Isus hine andi Afrika, sose ko Otkrivenje phenela pe so olese bala tane sar vuna, a olese pre sar bakar (Otkrivenje 1:14, 15).
Ćaćipe: I knjiga Otkrivenje tani pisimi „ko znakija“ (Otkrivenje 1:1). Odothe ko jekh slikovito način opisini pe sar o Isus izgledinđa palo odova so uskrsninđa. Ko odova stih na vaćeri pe sar o Isus izgledinđa đi hine ki phuv. Ked ko Otkrivenje 1:14 phenela pe so e Isuseso šero hem olese bala hine sar parni vuna, sar iv, odova šukar mothovi kobor tano o Isus mudro (Otkrivenje 3:14). Akava stih na vaćeri so e Isusese bala ćaće hine sar vuna niti sar iv.
E Isusese pre hine „sar o čisto bakar kova topini pe ki peć“ (Otkrivenje 1:15). Oleso muj hine „sar o kham ked najzorale sjajini“ (Otkrivenje 1:16). Nane nijekh narodo ki phuv kova isi le asavki boja andi koža. Odolese akija vizija tani samo simbolika hem mothovi e Isuse sar okole kova „tano ki svetlost kuri našti te resel pe“ (1. Timoteju 6:16).
Hovajbe: O Isus hine slabo hem nežno.
Ćaćipe: O Isus ponašinđa pe sar pravo murš. Na primer, ked o naoružana manuša alje te astaren le, ov hine but hrabro (Jovan 18:4-8). Isto ađahar, odova so hine tesari mothovi so hine but zoralo manuš (Marko 6:3).
Tegani, sose valjanđa lese pomoć te akhari po mučeničko stub? Hem sose mulo angleder so mulje o duj zločincija kola hine uzo leste? (Luka 23:26; Jovan 19:31-33). Angleder te ovel mudardo, o Isus doživinđa disave buća sebepi kola hine but ćhindo. Hine đangavdo celo rat. Jekh razlog hine sebepi so hine lese but pharo (Luka 22:42-44). Odija rat o Jevreja maltretirinđe le, a tajsato sabaj o Rimljanija mučinđe le (Matej 26:67, 68; Jovan 19:1-3). Sebepi sa odova, ov pana posigate mulo.
Hovajbe: O Isus uvek hine tužno.
Ćaćipe: O Isus hine sar po Dad. I Biblija phenela so o Jehova tano „bahtalo Devel“ (1. Timoteju 1:11; Jovan 14:9). O Isus sikavđa averen sar te oven bahtale (Matej 5:3-9; Luka 11:28). Sa odova mothovi so but putija ko Isuseso muj dićhilo soj tano bahtalo.
Dikhen hem akava
OSNOVNA BIBLIJAKE SIKLJOVIBA
Sar šaj te ova uverime so odova so pisini ki Biblija tano tačno?
Ako tano o Devel o autor andi Biblija, tegani oj valjani te razlikujini pe ando sa avera knjige.
AMENDAR
Rode neko te posetini tut
Vaćer ando e biblijake pućiba ili sikljov poviše ando Jehovase svedokija.