Ki Biblija, o lafi kova tano prevodimo sar „uskrsenje“ avela ando grčko lafi anastasis, kova značini „te vazdel pe“ ja „palem te uštel pe“. I uskrsnimi osoba tani vazdimi ando meribe hem irini pe ko životi sar osoba koja hine angleder (1. Korinćanima 15:12, 13).

 Iako o lafi „uskrsenje“ na pomini pe ko hebrejsko deo ando Devleso Lafi, kova tano penđardo sar Purano zavet, odova sikljovibe pomini pe odothe. Na primer, prekalo prorok Osija o Devel phenđa: „Me ka otkupinav me narodo andi e grobosi vlast, ka spasinav len ando meribe“ (Osija 13:14; Jov 14:13-15; Isaija 26:19; Danilo 12:2, 13).

 Kaj ka uskrsninen o manuša? Disave manuša ka uskrsninen ko životi ko nebo te vladinen sar kraljija e Hristeja (2. Korinćanima 5:1; Otkrivenje 5:9, 10). I Biblija phenela so odova tano „o prvo uskrsenje“ ja o uskrsenje kova ka ovel angleder. Odova mothovi so kasnije ka ovel pana jekh uskrsenje (Otkrivenje 20:6; Filipljanima 3:11). Odova uskrsenje ka ovel akate ki phuv hem but manuša ka ovel len prilika zauvek te živinen (Psalam 37:29).

 Sar ka uskrsninen o manuša? O Devel dinđa e Isusese moć te vazdel e mulen (Jovan 11:25). O Isus ka vazdel „sarinen kola tane ano grobo“ hem on ka oven ista manuša, ka ovel len ista osobine hem uspomene kola hine len angleder (Jovan 5:28, 29). Okola so ka uskrsninen ko nebo ka dobinen duhovno telo, a okola so ka uskrsninen ko životi ki phuv ka dobinen sasto fizičko telo (Isaija 33:24; 35:5, 6; 1. Korinćanima 15:42-44, 50).

 Ko ka uskrsnini? I Biblija phenela „so o Devel ka uskrsnini hem okolen soj tane pravedna hem okolen soj tane nepravedna“ (Dela apostolska 24:15). O pravedna manuša tane o verna manuša sar soj tane o Noje, i Sara hem o Avraham (Postanak 6:9; Jevrejima 11:11; Jakovljeva 2:21). O nepravedna manuša tane okola so na ićerđe pe ko e Devlese zakonija hem kola na hine len prilika te sikljon olestar.

 Ama, okola soj tane odobor lošna hem so našti te popravinen pe na ka uskrsninen. Ked asavke manuša merena, on nane len prilika te irinen pe ko životi (Matej 23:33; Jevrejima 10:26, 27).

 Ked ka ovel o uskrsenje? Ki Biblija pisini so o uskrsenje ko nebo ka ovel ko period andi Hristesi prisutnost. Odova period počminđa ando 1914. berš (1. Korinćanima 15:21-23). O uskrsenje ko životi ki phuv ka ovel ko period andi Hristesi vladavina koja ka trajini 1000 berš, ked celo phuv ka ovel raj (Luka 23:43; Otkrivenje 20:6, 12, 13).

 Sose tano razumno te verujina ko uskrsenje? Ki Biblija vaćeri pe ando enja uskrsenja hem aso svako uskrsenje hine manuša kola šaj hine te potvrdinen so odova ćaće ulo (1. Kraljevima 17:17-24; 2. Kraljevima 4:32-37; 13:20, 21; Luka 7:11-17; 8:40-56; Jovan 11:38-44; Dela apostolska 9:36-42; Dela apostolska 20:7-12; 1. Korinćanima 15:3-6). Posebno tano važno e Lazareso uskrsenje sose o Lazar štar dive hine ko grobo, a o Isus uskrsninđa le anglo but manuša (Jovan 11:39, 42). Čak hem e Isusese protivnikija naštine te phenen so na hine ađahar. Umesto odova, on manglje te mudaren hem e Isuse hem e Lazare (Jovan 11:47, 53; 12:9-11).

 I Biblija mothovi so o Devel isi le moć hem želja te vazdel e mulen. Sebepi soj tano but moćno, ov pamtini sa o buća ando svako manuš kas ka uskrsnini (Jov 37:23; Matej 10:30; Luka 20:37, 38). O Devel šaj te irini e mulen ko životi hem mangela odova te ćerel! Ked vaćeri ando uskrsenje kova ka ovel pana hari, i Biblija phenela so o Devel jedva ađićeri te dikhel odova so ćerđa pe vastencar (Jov 14:15).

Disave hovajba ando uskrsenje

 Hovajbe: O uskrsenje tano ked spojinena pe i duša hem o telo.

 Ćaćipe: I Biblija sikavi so i duša tani o manuš, a na disavo deo amendar kova nastavini te živini palo amaro meribe (Postanak 2:7, fusnota; Jezekilj 18:4). O manuš kova ka uskrsnini na spojini pe pekle dušaja, nego ov palem ovela đivdi duša.

 Hovajbe: Disave manuša ka uskrsninen hem odmah palo odova ka oven uništime.

 Ćaćipe: I Biblija phenela so „okola so ćerđe lošno“ ka dobinen o „uskrsenje andi osuda“ (Jovan 5:29). Asavki osuda ka dobinen premalo odova so ka ćeren palo uskrsenje, a na premalo odova so angleder ćerđe. O Isus phenđa: „O mule ka šunen e Devlese Ćhaveso glaso. Hem okola so ka šunen le, ka živinen“ (Jovan 5:25). Ako okola so ka uskrsninen ka ićeren pe ko odova so sikljona, olengo anav ka ovel zapisimo ko „svitko ando životi“ (Otkrivenje 20:12, 13).

 Hovajbe: Okola so ka uskrsninen ka ovel len isto telo sar angleder.

 Ćaćipe: Palo meribe, e manušengo telo raspadini pe (Propovednik 3:19, 20).