Disave manuša mislinena soj tano e Devleso Lafi menjimo. O prorok Isaija pisinđa so e Devleso Lafi „aćhola večno“ (Isaija 40:8). Sar šaj te ova sigurna so e Devlesi poruka nane menjimi?

O Devel isi le moć te arakhi po Lafi te na bi ovela menjimo. Ko purano vreme, hine ćerde prepisija ko lil hem o manuša kola prepisinđe đenđe svako slovo ando e Devleso Lafi. Ađahar hine sigurna so ništa na hine dodajimo, menjimo ili ikaldo. Ama, o manuša tane nesavršena hem odolese okola kola prepisinđe o lila podijekh puti ćerđe tikne greške.

Avdije isi hiljada purane prepisija kotar e Devleso Lafi. Ked uporedinaja o razna prepisija šaj lokho te arakha svako tikni greška ko tekst. Ako mangeja te đane pobuter, dikh o članko „Da li je tekst Svetog pisma promenjen?“ ko sajt jw.org.

Razmislin, na primer, ando purane lila soj tane penđarutne sar svitkija ando Mrtvo more. Olen arakhlje o beduinija ki jekh pećina paše uzo Mrtvo more ko 1947. berš. Ko akala purane svitkija nalazinena pe o delovija ando e Devleso Lafi kola tane purane pobuter ando duj hiljada berša. O izučavaocija uporedinđe akala purane lila e Devlese Lafeja kova isi amen avdije. So arakhlje?

On pažljivo istražujinđe hem arakhlje so odova so čitinaja ko e Devleso Lafi avdije ćaće tano e Devlesi poruka e manušenđe. a Šaj te ova sigurna so o Devel pobrininđa pe oleso Lafi te na ovel menjimo.

Odolese ked čitinaja e Devleso Lafi šaj ćaće te ova sigurna so nane menjimo. Ked đanaja sa akava, hajde te dikha so šaj te sikljova e Devlestar ando olese prorokija.