Sar te mothova mangipe premalo amare pašutne?
Sare amen hijam jekh porodica odolese so hijam e Adamese potomkija. Iako sare ki porodica valjani te mangen hem te poštujinen jekh jekhe, avdije tano but pharo te mothovi pe asavko mangipe. Ama, o Devel na mangela te ovel amenđe odova pharo.
SO PHENELA E DEVLESO LAFI ANDO MANGIPE?
„Mang te pašutne sar kokri tut.“ (LEVITSKA 19:18)
„Mangen tumare dušmanen.“ (MATEJ 5:44)
SO ZNAČINI TE MANGE TE PAŠUTNEN?
Dikh so o Devel phenela ando mangipe ko poklo Lafi ki 1. Korinćanima 13:4-7:
„O mangipe tano strpljivo hem šukar.“
Razmislin: Sar osetineja tut ked tane avera tuvaja strpljiva hem šukar hem na holjanena upro tute ked grešineja?
„O mangipe nane zavidno.“
Razmislin: Sar osetineja tut ked avera na verujinena tuće ili tane zavidna?
O mangipe „na dikhela samo pi korist.“
Razmislin: Sar osetineja tut ked avera mangena te poštujinen to mišljenje hem na mangena uvek te ovel sar so on mislinena?
O mangipe „na pamtini o lošnipe.“
Razmislin: O Devel mangela te oprostini e manušenđe kola kajinena pe aso pe greške. „Na ka ukorini amen zauvek sebepi amare greške niti zauvek ka holjani upro amende“ (Psalam 103:9). Amen hijam zahvalna ako neko oprostini amenđe ked povredinđam le. Isto ađahar hem amen valjani spremno te oprostina averenđe ked povredinena amen (Psalam 86:5).
O mangipe „na radujini pe ked isi nepravda.“
Razmislin: Ked ovela amenđe diso lošno, amen na mangaja avera te radujinen pe odolese so amen patinaja. Odolese amen na mangaja te radujina amen ked avera patinena, čak hem ako on povredinđe amen.
Te bi ovela amen e Devleso blagoslov, valjani te manga averen bizo obzir kobor berša isi len, kotar koja nacija ili religija avena. Jekh način sar šaj te mothova mangipe tano te pomožina averenđe ked odova valjani lenđe.
