So pobuter sikljovaja save osobine neko isi le, pana pošukar penđaraja le hem ovaja pana popaše amala. Isto ađahar, so pobuter sikljovaja ando Jehovase osobine, pana pošukar ka haljova savo tano hem amaro amalipe oleja ka ovel pana pozoralo. Kotar sa e Devlese šuže osobine, štar tane posebna: i moć, i mudrost, i pravda hem o mangipe.

„O Jehova, tu kova hijan Najbaro Gospod! Tu ćerđan o nebo hem i phuv te bare silaja“ (JEREMIJA 32:17).

Kobor tano o Devel moćno dićhola ko sa so ćerđa. Na primer, nilajese ked ikljoveja ko Kham, so osetineja ki ti koža? Osetineja sar o Kham taćari tut. U stvari, tegani tu osetineja samo jekh tikno deo andi Devlesi moć. Kobor bari energija isi le o Kham? Andre ko oleso jezgro i temperatura tani oko 15 000 000 °C. Svako sekunda, o Kham dela odobor bari energija sar ked bi eksplodirinena stotine milionija nuklearna bombe.

Ama, amaro Kham tano samo jekh ando bilionija ćerenja ko amaro svemir hem but tano tikno ked uporedini pe averencar. O naučnikija phenena so i najbari ćereni UY Scuti tani oko 1 700 putija pobari ando Kham. Ked bi akija ćereni bešela ko than kaj tano o Kham, oj na samo so bi ućhari amari planeta, već bi ovela sa đi o Jupiter. Možda akava šaj te pomožini amenđe te haljova okova so  o Jeremija phenđa ando Jehova, so ov pe bare silaja ćerđa o nebo hem i phuv.

Kobor značini amenđe e Devlesi moć? Amaro životi zavisini ando okova so o Devel ćerđa, sar soj tano o Kham hem avera buća kola tane ki phuv. Ama, o Devel koristini pi moć hem te pomožini e manušenđe. Sar? Ko prvo veko, o Devel dinđa e Isusese moć te ćerel čudija. Sebepi odova, ulo okova so pisini ko Matej 11:5: „O korore dikhena, o sakatija phirena, o gubava čistinena pe, o kašuke šunena, o mulje uštena“. Ama, so desini pe avdije? Ki Biblija pisini so o Devel „e umorno manušese irini i snaga“ hem so „okola kola uzdajinena pe upro Jehova ka dobinen nevi snaga“ (Isaija 40:29, 31). O Devel šaj te del amen snaga te šaj te ikljova ko krajo amare problemencar (2. Korinćanima 4:7). Sar osetineja tut ked đaneja so o Devel koristini pi moć aso to šukaripe? Da li mangeja te ove popaše oleja?

„Kobor tane but te delija, Jehova! Sa ćerđan len mudro“ (PSALAM 104:24).

So pobuter sikljovaja ando buća kola o Devel ćerđa, pana pobuter ka haljova kobor tani bari olesi mudrost. U stvari, avdije disave naučnikija proučinena o buća kola o Jehova ćerđa hem kopirinena odola ideje. Asavke primerija isi but, kotar jekh obično čičak-traka pa sa đi odova sar te ćerel pe o avioni.

O manušikano telo najšukar mothovi kobor tani bari e Devlesi mudrost. Na primer, te razmislina sar barjola jekh beba. Sa počmini ki jekh oplodimi jajno ćelija. Ano late tane sa o genetska uputstvija. Palo odova, o ćelije počminena te delinen pe hem ađahar ovena but slična ćelije. Ama, ko tačno odredimo vreme on počminena te delinen pe ko stotine različita vrste ando ćelije, sar soj tane e ratese ćelije, e kokalenge ćelije hem o nervna ćelije. Sigate palo odova, formirinena pe o organija. Aso samo enja masek, andi jekh ćelija ovela jekh tikni beba koja isi la milijarde ćelije. Ked dikhena asavki mudrost, but manuša slažinena pe odoleja so e biblijako pisco phenđa e Devlese: „Hvalinava tut hem but poštujinava tut, sose hijum but šukar ćerdo“ (Psalam 139:14).

Kobor značini amenđe e Devlesi mudrost? Amaro Stvoritelj đanela so valjani amenđe te bi ovaja bahtale. Sebepi so ov sa đanela hem sa haljola, ov prekalo po Lafi, i Biblija, dela amen mudra savetija. Na primer, ov phenela amenđe: „Ando vilo oprostinen jekh jekhese“ (Kološanima 3:13). Da li tano odova mudro savet? Ja. O doktorija phenena so ako oprostinaja averenđe pošukar ka sova, na ka ovel amen baro pritisak, na ka pera ki depresija hem na ka ovel amen avera problemija sastipaja. O Devel tano sar jekh mudro amal kova brinini pe amendar hem kova dela amen savetija aso amaro šukaripe (2. Timoteju 3:16, 17). Da li mangeja te ovel tut asavko amal?

„O Jehova mangela i pravda“ (PSALAM 37:28).

O Devel uvek ćerela okova soj tano pravedno. Ki Biblija pisini: „Dur tano kotar ćaćutno Devel te ćerel lošnipe, hem o Svemoćno te ćerel diso nepravedno!“ (Jov 34:10). Ov uvek sudini pravedno sar so mothovena o lafija ando jekh biblijako pisco: „Tu pravedno ka sudine [e manušenđe]“ (Psalam 67:4). Sebepi so „o Jehova dikhela odova soj tano ko vilo“, ole o manuša našti te prevarinen. Ov ko svako trenutko đanela soj tano o ćaćipe hem odolese šaj ispravno te sudini (1. Samuilova 16:7). Uzo odova, ov dikhela svako nepravda hem o lošnipe kova ovela ki phuv hem obećini so pana hari „o lošna ka oven uništime“ (Poslovice 2:22).

Ama, o Devel nane sar jekh strogo sudija kova jedva ađićeri te kaznini nekas. Ov mothovi milosrđe ked god odova tano moguće. Ki Biblija pisini: „O Jehova tano milosrdno hem samilosno“ čak hem premalo okola kola ćerđe diso lošno, ama kajinena pe celone vileja. Nane li odija ćaćutni pravda? (Psalam 103:8; 2. Petrova 3:9).

Kobor značini amenđe e Devlesi pravda? O apostol Petar phenđa: „O Devel na dikhela koj tano ko, nego kotar svako narodo prihvatini sarinen kola darana olestar hem ćerena odova soj tano pravedno“ (Dela apostolska 10:34, 35). Sebepi so o Devel na ćerela razlika maškaro manuša, olesi pravednost but koristini amenđe. Amen šaj te ova paše oleja hem te služina lese bizo obzir ando kova narodo avaja, da li hijam školujime, da li hijam barvale ja ćorore.

O Devel dinđa amen savest te šaj te haljova olesi pravda. Ki Biblija, i savest tani opisimi sar zakon kova tano „pisimo“ ko amaro vilo hem kova mothovi da li odova so ćerđam tano šukar ja lošno (Rimljanima 2:15). Sar odova koristini amenđe? Ked tani šukar oblikujimi, i savest šaj te ćhinavi amen te ćera diso lošno. Ama, ako ćerđam disavi  greška, i savest šaj te podstaknini amen te pokajina amen hem te irina amen ko šukar drumo. Odova so o Devel sarinenđe dinđa savest, a na mukhlja amen kokri te odredina soj tano šukar, a soj tano lošno, mothovi so ov tano pravedno hem so na ćerela razlika maškaro manuša.

„O Devel tano mangipe“ (1. JOVANOVA 4:8).

Iako o Devel tano moćno, mudro hem pravedno, i Biblija na phenela so o Devel tano moć, mudrost ja pravda. Oj phenela so ov tano mangipe. Sose? Olesi moć pomožini lese te ćerel sa so mangela, i pravda hem i mudrost vodinena le, ama o mangipe ćhivela le te ćerel diso hem utičini ko sa so ćerela.

Ked o Jehova stvorinđa e anđelen hem e manušen, ov odova na ćerđa sose diso falinđa lese, već odova ćerđa ando mangipe. Ov manglja sare te osetinen so brinini pe olendar hem so mangela len. Isto ađahar, pripreminđa i phuv te šaj o manuša te uživinen ano late. Avdije, ov hem ponodri mothovi mangipe sa e manušenđe ađahar so „dela oleso kham te ikljol hem aso lošna hem aso šukar hem o boršim te perel hem aso pravedna hem aso nepravedna“ (Matej 5:45).

Uzo odova, „o Jehova tano but samilosno hem milosrdno“ (Jakovljeva 5:11). Ov mothovi mangipe premalo okola so mangena te penđaren le hem te oven paše oleja. O Devel dikhela svakone manuše hem brinini pe svakonese (1. Petrova 5:7).

Kobor značini amenđe e Devleso mangipe? Amen uživinaja ked dikhaja sar perela o kham. Ked šunaja sar jekh beba asala, amaro vilo tano pherdo. But značini amenđe ked amari porodica mangela amen. Iako šaj te živina bizo sa akala buća, on ipak ćerena amaro životi te ovel pošužo.

Pana jekh način sar o Devel mothovi amenđe po mangipe tano i molitva. Ki Biblija pisini: „Ma brininen tumen nisose, nego sa tumare brige vaćeren e Devlese ki molitva, celone vileja molinen tumen olese hem zahvalinen tumen olese“. Sar jekh dad pherdo mangipaja, ov mangela phravdo te phena lese sa amare brige. Ov obećini amenđe so tegani ka del amen „mir, kova tano upreder odova so o manuš šaj te haljol“ (Filipljanima 4:6, 7).

Akana hari vaćerđam ando Devlese štar osobine – andi olesi moć, mudrost, pravda hem ando mangipe. Da li odova pomožinđa tuće pošukar te haljove savo tano? Te šaj pana pošukar te penđare le, sikljov so ov već ćerđa hem so pana ka ćerel.