51. ČLANKO PROUČIBASE
ĐILI 3 O Jehova tano amari nada
O Jehova niked na bistrela te asva
Ćede me asva ko to meh. Nane li on pisime ki ti knjiga? (PS. 56:8)
SO KA SIKLJOVA?
Ka dikha so o Jehova uvek đanela sar tano amenđe bizo obzir savo pharipe isi amen hem so ka del amen odova so valjani te šaj te ovel amenđe pošukar.
1-2. Sebepi kola buća šaj te rova?
SARE amen podijekh puti rovaja. Disavo puti rovaja sose hijam bahtale. Na primer, šaj runđan ked bijandilji ti beba. Ja šaj ked setinđan tut ko diso šukar so desinđa pe tuće ja ked palo but berša dikhljan te amale.
2 Ama, but putija rovaja sose isi amen disavi dukh ko vilo. Na primer, rovaja ked neko but razočarinđa amen. Šaj te rova ked isi amen bare dukha sebepi so hijam naborme ili ked merela amendar neko kas mangljam. Tegani šaj te osetina amen sar o Jeremija ked o Vaviloncija uništinđe o Jerusalim. Ov phenđa: „O asva kotar me jaćha đana sar pani odolese so propadinđa mi ćhaj, mo narodo. Dive rat kotar me jaćha perena o asva hem nisar na ćhinavđona“ (Tužb. 3:48, 49).
3. Sar tano e Jehovase ked dikhela so olese sluge patinena? (Isaija 63:9)
3 O Jehova đanela kobor asva ćhorđam sebepi amare pharipa. I Biblija uverini amen so ov uvek đanela save pharipa isi amen hem šunela amen ked asvencar rodaja olestar pomoć (Ps. 34:15). Ama, ov na samo so dikhela hem šunela. Ov tano amaro Dad hem but mangela amen. Odolese, ked dikhela so rovaja, ov sigate ćerela diso te pomožini amen. (Čitin Isaija 63:9.)
4. Kastar ka vaćera ko akava članko hem so ka sikljova ando Jehova?
4 Ko po Lafi, o Jehova mothovđa sar reagujinđa ked olese sluge ćhorđe asva. Na primer, i Ana, o David hem o Jezekija. Ko akava članko ka dikha sose runđe? Sar o Jehova pomožinđa lenđe? Sar olengo primer utešini amen ked rovaja sose mulo amendar neko kas mangljam, sose neko povredinđa amen ja sose hijam naborme?
KED NEKO MULO TUTAR
5. Sar i Ana osetinđa pe sebepi pi situacija?
5 I Ana hine la nekobor pharipa sebepi kola hine but tužno hem runđa. Olako rom hine le pana jekh romni koja vićinđa pe Fenina hem koja hine but lošno premali Ana. Ama, hine pana diso. Oj našti hine te bijani, a i Fenina hine la nekobor ćhave (1. Sam. 1:1, 2). I Fenina marđa laće muj sose na hine la ćhave. Sar bi tuće ovela te ove ko Anako than? Odobor hine tužno so „runđa hem ništa na halja“ hem hine la „bari dukh ko vilo“ (1. Sam. 1:6, 7, 10).
6. So ćerđa i Ana ked hine laće but pharo?
6 So i Ana ćerđa te šaj te ovel laće pošukar? Jekh buti koja pomožinđa laće tani so đelji ko sveto šatori. Uduri, verovatno negde paše uzo ulaz ando dvorište, oj „počminđa rovindoj te molini pe e Jehovase“. Oj molinđa e Jehova te dikhel ki olaki nevolja hem te setini pe koro late (1. Sam. 1:10b, 11). I Ana ćućarđa lese po vilo. Ked dikhlja la sar rovela, e Jehovase hine but pharo sose but manglja la.
7. Sar i Ana osetinđa pe palo odova so molinđa pe?
7 Palo odova so ćućarđa po vilo e Jehovase, o prvosveštenik Ilije uverinđa la so o Jehova ka odgovorini ki olaki molitva. Sar osetinđa pe? Ki Biblija pisini: „Palo odova, oj đelji pe drumoja, halja hem na hine više tužno“ (1. Sam. 1:17, 18). Iako pana hine la problemija, hine la hem mir. I Ana hine la poverenje upro Jehova so haljola ola hem olake problemija hem so ka pomožini laće. Ov dikhlja olake pharipa, šunđa la sar rovela hem kasnije blagoslovinđa la ađahar so aćhilji khamni (1. Sam. 1:19, 20; 2:21).
8-9. Sose tano but važno te đa ko sastankija? (Jevrejima 10:24, 25; dikh i slika.)
8 So sikljovaja? Da li hem tu isi tut disavo baro pharipe? Šaj mulo neko andi ti porodica ja to amal. Tegani, šaj mangeja te ove kokri hem odova tano normalno. Ama, ma bistri so ćerđa i Ana. Oj đelji ko sveto šatori hem o Jehova uduri ohrabrinđa la. Isto ađahar, o Jehova šaj te utešini tut hem te ohrabrini tut ako ka đa ko sastankija, iako hijan umorno hem isi tut bari dukh ko vilo. (Čitin Jevrejima 10:24, 25.) Ko sastankija šunaja o stihija andi Biblija kola šaj but te ohrabrinen amen. Ađahar o Jehova pomožini amen te na razmislina ando buća kola ćhivena amen te ova tužna. Iako amari situacija na ka menini pe odmah, odova šaj te del amen snaga te istrajina.
9 Ko sastankija, amare phralja hem phenja šaj te ohrabrinen amen hem te mothoven amenđe kobor mangena amen. Sebepi odova, šaj te osetina amen pošukar (1. Sol. 5:11, 14). Te dikha o primer ando jekh specijalno pioniri kova našalđa pe romnja. Ov phenela: „Disavo puti maje potrebno te ovav kokri sose odobor maje pharo so našti te ćhinavav te rovav. Ama, ked đava ko sastankija but maje pošukar. E phralenge hem e phenjenge lafija hem komentarija but ohrabrinena man. Bizo obzir kobor hijum uznemirimo ja tužno angleder o sastanak, othe uvek osetinava man pošukar.“ Ked hijam ko sastankija, o Jehova šaj prekalo amare phralja hem phenja but te pomožini amen.
Amare phralja hem phenja šaj but te utešinen amen (Dikh o 8. hem o 9. odlomko)
10. Sar šaj te oponašine e Anako primer ked isi tut disavo baro pharipe?
10 I Ana osetinđa pe but pošukar ked ćućarđa po vilo e Jehovase. Isto ađahar, hem tu šaj te forde te brige ko Jehova hem ov sigurno so ka šunel tut hem ka pomožini tuće (1. Petr. 5:7). Jekh phen kase rome mudarđe disave naoružime ćora phenela: „Osetinđum man ka phene mo vilo phađilo ko tikne kotora hem mislinđum so odija dukh niked na ka nakhel. Ama, ked god molinđum man me Dadese, e Jehovase, kova but mangela man, hine maje but pošukar. Disavo puti na đanđum sar te phenav lese kobor maje pharo, ama ov haljilo man. Ked osetinđum so više našti, me molinđum man hem ov dinđa man mir. Palo odova hine maje pošukar hem šaj hine te ćerav sa so valjani aso odova dive.“ Ked o Jehova dikhela so roveja đi vaćereja lese sar osetineja tut, hem ov tano but tužno hem haljola ti dukh. Iako o problemi tano pana othe, o Jehova šaj te utešini tut hem te del tut mir (Ps. 94:19; Fil. 4:6, 7). Ov dikhela so deja sa tutar te aćhove lese verno hem odolese ka blagoslovini tut (Jevr. 11:6).
KED NEKO BUT POVREDINĐA TUT
11. Sar o David osetinđa pe ked avera povredinđe le?
11 O David hine le nekobor phare situacije sebepi kola runđa. Hine but manuša kola mrzinđe le. Čak disave andi olesi porodica hem olese amala na hine lese verna hem manglje te povredinen le (1. Sam. 19:10, 11; 2. Sam. 15:10-14, 30). Jekh puti ked hine lese but pharo, ov pisinđa: „Odobor maje pharo so više nane man snaga. Po celo rat samo rovava, me asvencar sapanćerava mi postelja.“ Sose osetinđa pe ađahar? „Sebepi me dušmanija“, phenđa o David (Ps. 6:6, 7). Ked avera ponašinđe pe but lošno premalo leste, odobor hine lese pharo so runđa.
12. Premalo Psalam 56:8, ko so o David hine sigurno?
12 Iako o David hine le but pharipa, ov hine sigurno so o Jehova mangela le. Ov pisinđa: „O Jehova ka šunel man sar rovava“ (Ps. 6:8). Jekh aver puti ov pisinđa disave but šuže lafija ko Psalam 56:8. (Čitin.) Akala lafija mothovena amenđe so o Jehova but mangela amen hem so brinini pe ando odova sar osetinaja amen. O David phenđa so osetinđa pe samći o Jehova ćedela olese asva ko meh ja so pisini len ki jekh knjiga. Ov hine sigurno so o Jehova dikhela hem na bistrela olesi dukh. O David hine uverimo na samo so o Jehova đanela olese pharipa, već hem sar on utičinena upro leste.
13. So šaj te utešini tut ked avera razočarinena tut? (Dikh i slika.)
13 So sikljovaja? Da li isi tut dukh ko vilo sose neko kase but verujinđan razočarinđa tut ja but povredinđa tut? Šaj patineja sose aćhavđa tut neko kasa mangljan te khuve ko brak, ja šaj aćhavđa tut to rom ja ti romni ja šaj neko kas mangeja ćhinavđa te služini e Jehovase. Jekh phral kasi romni ćerđa preljuba hem aćhavđa le, phenđa: „Hijum le šokirimo hem naštine te verujinav so desinđa pe. Hijum le tužno, holjamo hem mislinđum so na vredinava.“ Ako neko but razočarinđa tut hem povredinđa tut, ma bistri so o Jehova niked na ka aćhavi tut. Odova phral phenela: „Haljiljum so o manuša šaj na ka oven tuće uvek verno, ama o Jehova uvek ka ovel othe. Bizo obzir so te ovel, ov uvek ka pomožini tut. Ov na ka aćhavi pe verna slugen“ (Ps. 37:28). Isto ađahar, ma bistri so o Jehova mangela tut pobuter ando bilo kova manuš. Ked aćhavi tut neko kas but mangljan, odova šaj but te dukhal. Ama, o Jehova na ćhinavi te mangel tut. Tu hijan lese but važno (Rimlj. 8:38, 39). Jekh buti niked ma bistri: Bizo obzir sar neko ponašinđa pe premalo tute, to nebesko Dad but mangela tut.
I knjiga ando Psalmija uverini amen so o Jehova tano uzo okola soj tane phage vileja (Dikh o 13. odlomko)
14. Ko so uverinena amen o lafija ando Psalam 34:18?
14 Ako neko but povredinđa tut, šaj te utešinen tut e Davidese lafija ando Psalam 34:18. (Čitin.) Ki jekh knjiga pisini so okola kola tane „phage vileja“ šaj osetinena pe so „nane sose te radujinen pe“. Sar o Jehova pomožini okolenđe kola ađahar osetinena pe? O Jehova tano paše uzo amende. Ov tano sar jekh roditelj kova ićeri hem utešini pe ćhave kova rovela. Ked patinaja sose neko povredinđa amen ja aćhavđa amen, o Jehova osetini amari dukh hem odmah pomožini amenđe. Ov tano spremno te utešini amen ako tano amaro vilo phago ja ako mislinaja so na hijam vredna. Ov dinđa amen but buća kola šaj te radujinen amen hem pomožini amen te istrajina ko amare kušnje (Is. 65:17).
KED HIJAM NABORME
15. Sose o Jezekija runđa?
15 Ked hine le 39 berš, o kralj Jezekija but naborsalo. O Jehova prekalo prorok Isaija phenđa so ka merel (2. Kralj. 20:1). Ked o Jezekija šunđa odova, odobor hine lese pharo so počminđa te rovel. Ando vilo molinđa e Jehova te pomožini lese (2. Kralj. 20:2, 3).
16. Sar o Jehova odgovorinđa ki Jezekijasi molitva?
16 Ked o Jehova šunđa sar o Jezekija rovela hem molini pe, hine lese but žao. Ov phenđa: „Šunđum ti molitva hem dikhljum te asva. Aće, ka saćarav tut.“ Prekalo Isaija, o Jehova obećinđa so ka del le pana te živini hem so ka izbavini o Jerusalim kotar Asircija (2. Kralj. 20:4-6).
17. Sar o Jehova pomožini amen ked hijam but naborme? (Psalam 41:3; dikh i slika.)
17 So sikljovaja? So šaj te ćere ako đaneja so isi tut disavo nabormipe aso kova nane leko? Vaćer e Jehovase sar tano tuće. Ov ka šunel tut čak iako ka rove đi ka vaćere oleja. I Biblija uverini amen so „o Dad ando milosrđe hem o Devel andi svako uteha“ ka utešini amen ko sa amare pharipa (2. Kor. 1:3, 4). Avdije našti te očekujina o Jehova te rešini amare problemija, ama uvek šaj te pomožini amen. (Čitin Psalam 41:3.) Prekalo po sveti duh šaj te del amen snaga, mudrost hem mir (Posl. 18:14; Fil. 4:13). Isto ađahar, ov utešini amen hem prekali Biblija sose othe pisini so ki budućnost nijekh manuš više na ka ovel nabormo (Is. 33:24).
O Jehova ka odgovorini ko amare molitve ađahar so ka del amen snaga, mudrost hem mir (Dikh o 17. odlomko)
18. Kova stih dela tut snaga ked hijan ko disavo but baro pharipe? (Dikh o okvir „ O stihija kola utešinena amen ked rovaja“.)
18 E Jehovase lafija but ohrabrinđe e Jezekija. Isto ađahar, hem amen šaj te utešini e Devleso Lafi. Ked hijam uznemirime, e Jehovase lafija ki Biblija šaj te utešinen amen hem te den amen mir (Rimlj. 15:4). Amari phen kotar Zapadno Afrika but runđa ked o doktorija phenđe laće so isi la rak. Oj phenela: „Jekh stih kova posebno ohrabrinđa man hine ando Isaija 26:3. Iako but putija našti te rešina o problemi, akava stih obećini so o Jehova šaj te del amen mir hem te pomožini amen te istrajina ko amare pharipa.“ Da li isi tut disavo stih kova dela tut snaga ked hijan ki situacija koja našti te rešini pe?
19. Savi budućnost ađićeri amen?
19 O kraj tano but paše hem očekujinaja pana pobare pharipa kola ka anen amenđe bari dukh hem asva. Ama, sar so dikhljam ko Anako, Davideso hem Jezekijaso primer, o Jehova dikhela amare asva hem olese tano but pharo. Ov mangela amen sose aćhovaja lese verna hem niked na ka bistrel nijekh amari asvi. Odolese, ked hijam ko disavo pharipe, amen valjani te ćućara amaro vilo e Jehovase. Niked na valjani te cida amen ando phralja hem phenja. O Jehova šaj hem ponodri te utešini amen ako čitinaja oleso Lafi. Šaj te ova sigurna so ako aćhovaja lese verna, ov ka blagoslovini amen. Odova značini so o Jehova ka ispunini po obećanje so ka kosel svako asvi kotar amare jaćha koja anela amenđe dukh (Otkr. 21:4). Tegani, ka rova samo sose hijam bahtale.
ĐILI 4 „O Jehova tano mo pastiri“
