1-2. Premalo Dela apostolska 8:27-31, 35-38, so podstaknindža e etiopsko dvoranine te krstini pe?

DA LI mangeja te ove krstimo e Hristeso učenik? O mangipe hem i zahvalnost podstaknindže buten manušen te anen asavki odluka. Hajde te dikha o primer kotar jekh dvoranin kova služindža ko dvoro andi etiopsko kraljica.

² Ked ando spisija sikljilo so valjani te krstini pe, o Etiopljanin odmah čerdža odova. (Čitinen Dela apostolska 8:27-31, 35-38.) So podstaknindža le čerel odova? Akava manuš cenindža e Devleso Lafi. Odova dičhola sose dži vozindža pe ki pi kočija ov čitindža disave stihija kotar i knjiga Isaija. Ked o Filip vačerdža oleja, o Etiopljanin počmindža te cenini sa so o Isus čerdža lese. Ama, sose o dvoranin hine ko Jerusalim? Odolese so ov već počmindža te mangel e Jehova. Sar džanaja odova? Ov hine ko Jerusalim te obožavini e Jehova. Izgleda so akava manuš menindža pi religija hem počmindža te služini e čačutne Devlese zajedno e narodoja kova hine predano e Devlese. O mangipe premalo Jehova podstaknindža le te anel pana jekh važno odluka – te krstini pe hem te ovel e Hristeso učeniko (Mat. 28:19).

3. So šaj te sprečini nekas te krstini pe? (Dikh o okvir „ Savo tano to vilo?“)

³ O mangipe premalo Jehova šaj te podstaknini tut te krstine tut. Ama, o mangipe šaj hem te sprečini tut te čere odova. Sar odova? Razmislin kotar disave primerija. Iako ti porodica hem te amala na verujinena ko ista buča sar tu, tu ipak mangeja len. Sebepi odova, brinineja tut so on na ka mangen tut ako krstineja tut (Mat. 10:37). Ja šaj isi  tut disave navike kola mangeja iako džaneja so o Devel mrzini len. Ama, šaj tano tuče pharo te čhinave te čere odola lošna navike (Ps. 97:10). Šaj celo to dživdipe slavindžan disave praznikija kola avena andi hovavni religija. Šaj ačhilje tuče šuže uspomene kotar odova vreme. Sebepi odova, tuče šaj te ovel pharo te čhinave te čere o običaja kola o Devel na mangela (1. Kor. 10:20, 21). Odolese, važno tano te puče tut: „Kas hem so najviše mangava“?

4. Kova tano najvažno razlog sebepi kova valjani te krstine tut?

⁴ Isi but buča kola mangeja hem cenineja, a kola avena ando verovanja kola hine tut angleder. Šaj but poštujindžan odova so pisini ki Biblija hem angleder so počmindžan te proučine nekasa kotar e Jehovase svedokija. Šaj hem tegani cenindžan e Isuse. Akana ked dikhljan koj tane e Jehovase svedokija hem save manuša tane on, šaj sviđini pe tuče te družine tut olencar. Ama, odova so mangeja sa odola šukar buča na značini so sebepi odova ka predajine to dživdipe e Jehovase hem so ka krstine tut. O najvažno razlog sebepi kova valjani te krstine tut tano o mangipe premalo o Devel, o Jehova. Ked mangeja e Jehova pobuter nego bilo so aver, tu na ka mukhe nikase hem nisose te sprečini tut te služine lese. O mangipe premalo Jehova ka podstaknini tut te krstine tut hem ka pomožini tut te ačhove verno olese hem palo to krštenje.

5. Kotar kola pučiba ka vačera?

⁵ O Isus phendža so amen valjani te manga e Jehova celone vileja, dušaja, godžaja hem snagaja (Mar. 12:30). Sar šaj to mangipe hem to poštovanje premalo Jehova te ovel odobor hor? Ako razmislineja kobor o Jehova mangela tut odova ka podstaknini tut hem tu te mange ole (1. Jov. 4:19). Ked jekhvar počmindžan te mange e Jehova, kola osećanja pana ka ovel tut hem so ka mange pana te čere? *

6. Premalo Rimljanima 1:20, ko kova način šaj pobuter te sikljove ando Jehova?

⁶ Sikljov pobuter ando Jehova prekalo odova so stvorindža. (Čitinen Rimljanima 1:20; Otkr. 4:11.) Razmislin sar o biljke hem o životinje kola o Jehova stvorindža mothovena kobor tano ov mudro. Sikljov hari odolestar sar tano čerdo toklo telo (Ps. 139:14). Razmislin kobor bari energija isi le amaro kham, a o kham tano samo jekh kotar o milijarde zvezde kola o Jehova stvorindža * (Is. 40:26). So pobuter razmislineja ando sa so o Jehova stvorindža, pobuter ka poštujine le. But tano važno te džane so o Jehova tano mudro hem moćno Devel. Ama, te šaj te barjačere to mangipe premalo Jehova hem te ove paše amal oleja, valjani te džane pobuter olestar.

7. Ko so valjani te ove uverimo te šaj hor te mange e Jehova?

⁷ Valjani te ove uverimo so o Jehova brinini pe lično tuče. Da li tano tuče pharo te verujine so o Devel kova stvorindža o nebo hem i phuv obratini pažnja upro tute hem so brinini pe tuče? Ako tano adžahar, ma bistri so o Jehova „nane dur nikastar amendar“ (Dela 17:26-28). Ov „ispitini svakoneso vilo“ hem dela po lafi so „ako rodeja le, ka mukhel tut te arakhe le“ (1. Let. 28:9). U stvari, tu akana proučineja i Biblija odolese so o Jehova privucindža  tut koro peste (Jer. 31:3). So pošukar haljoveja hem so pobuter cenineja sa so o Jehova čerdža tuče, to mangipe premalo oleste ka ovel sa pobaro.

8. Sar šaj te mothove so hijan zahvalno aso e Jehovaso mangipe?

⁸ Tu šaj te mothove so hijan zahvalno aso e Jehovaso mangipe, adžahar so ka moline tut lese. To mangipe premalo Devel ka ovel pobaro dži vačereja lese sa so brinini tut hem dži zahvalineja tut lese aso sa so čerela tuče. Ked dikheja sar o Jehova odgovorini ko te molitve, to amalipe e Jehovaja ka ovel pana pozoralo (Ps. 116:1). Tegani ka ove uverimo so ov haljola tut. Te šaj te ove pana popaše e Jehovaja, valjani te haljove sar ov razmislini. Valjani te džane so ov rodela tutar. Jedino način te džane odova tano adžahar so ka proučine oleso Lafi, i Biblija.

9. Sar šaj te mothove so cenineja i Biblija?

⁹ Mothov so cenineja e Devleso Lafi, i Biblija. Jedino ki Biblija arakhi pe o čačipe kotar Jehova hem jedino koro late pisini koja tani e Devlesi namera tuvaja. Tu mothoveja so cenineja i Biblija adžahar so čitineja la svako dive, pripremineja tut aso to kurs hem ked primenineja odova so sikljiljan (Ps. 119:97, 99; Jov. 17:17). Da li isi tut raspored aso e biblijako čitibe? Da li ičereja tut ko odova raspored?

10. Sose i Biblija tani jekh posebno knjiga?

¹⁰ I Biblija tani jekh posebno knjiga sose koro late arakhena pe o izveštaija kotar o manuša kola dikhlje e Isuse. Oj tani jedino tačno knjiga koja objasnini so o Isus čerdža tuče. Dži sikljoveja kotar odova so o Isus phendža hem čerdža, verovatno ka mange te ove amal oleja.

11. So ka pomožini tuče pana pobuter te mange e Jehova?

¹¹ Barjačer to mangipe premalo Isus, hem to mangipe premalo Jehova ka ovel pobaro. Sose? Odolese so o Isus savršeno oponašindža pe Dadese osobine (Jov. 14:9). So pobuter sikljoveja kotar o Isus, pana pošukar ka haljove e Jehova hem pana pobuter ka cenine le. Razmislin kobor o Isus hine saosećajno premalo manuša kolen avera mrzindže sebepi so  hine čorore, naborme hem bespomoćna. Isto adžahar, razmislin kotar o praktična savetija kola ov dela tuče hem sar to dživdipe ovela pošukar keda šuneja le (Mat. 5:1-11; 7:24-27).

12. Dži sikljoveja kotar o Isus, ko so ka ove podstaknimo?

¹² To mangipe premalo Isus verovatno ka ovel pana pobaro dži razmislineja kotar i otkupno žrtva koja o Isus dindža te šaj te oven oprostime amare grehija (Mat. 20:28). Ked haljoveja so o Isus hine spremno te merel tuče, odova ka podstaknini tut te pokajine tut hem te rode oproštaj kotar o Jehova (Dela 3:19, 20; 1. Jov. 1:9). So pobuter mangeja e Isuse hem e Jehova, sa pobuter ka mange te ove e manušencar kola isto adžahar mangena len.

13. So o Jehova dindža tuče?

¹³ Mang okolen kola mangena e Jehova. Šaj te bivša amala ja neko kotar ti porodica na ka haljol sose mangeja te služine e Jehovase. Čak šaj ka protivinen pe tuče. Ama, o Jehova ka pomožini tuče ki skupština te arakhe e phraljen hem e phenjen kola ka oven sar tikli porodica. Ako ačhoveja paše olencar, tu ka dobine o mangipe hem i podrška koja valjani tuče (Mar. 10:29, 30; Jevr. 10:24, 25). Šaj palo disavo vreme neko kotar ti porodica ka počmini te služini e Jehovase hem te šunel olese načelija (1. Petr. 2:12).

14. Premalo 1. Jovanova 5:3, so mislineja ando e Jehovase merilija?

¹⁴ Barjačer to cenjenje premalo e Jehovase merilija hem sikljov sar te primenine len. Angleder so pendžardžan e Jehova šaj kokri tuče odlučindžan soj tano ispravno, a soj tano pogrešno. Ama, akana dikheja so e Jehovase merilija tane pošukar. (Ps. 1:1-3; čitinen 1. Jovanova 5:3.) Razmislin kotar o savetija andi Biblija kola tane dinde e romendže, e romnjendže, e roditeljendže hem e čhavendže (Ef. 5:22–6:4). Da li ti porodica tani pobahtali sebepi so primenindžan odola savetija? Da li hijan pošukar manuš sebepi so šuneja e Jehovaso savet mudro te birine te amalen? Da li hijan pobahtalo manuš? (Posl. 13:20; 1. Kor. 15:33). Verovatno to odgovor ko akala pučiba tano ja.

15. So šaj te čere te šaj te haljove sar te primenine e biblijake načelija?

¹⁵ Podijekh puti, šaj te ovel tuče pharo te džane sar te primenine e biblijake načelija. Odolese, o Jehova prekali pi organizacija dela tuče o publikacije kola pomožinena tut pošukar te haljove i Biblija hem te džane soj tano šukar, a soj tano lošno (Jevr. 5:13, 14). Ked ka čitine hem ked ka proučine odola publikacije, tu ka dikhe so e biblijake načelija tane korisna hem ka haljove ko kola situacije šaj te koristine len. Sebepi odova, tu verovatno ka mange te ove deo andi e Jehovasi organizacija.

16. Sar o Jehova organizujindža pe narodo?

¹⁶ Barjačer to mangipe premali e Jehovasi organizacija hem mothov so podržineja la. O Jehova organizujindža pe narodo ko skupštine. Pekle čhave e Isuse čhivdža te ovel poglavari kotar i skupština (Ef. 1:22; 5:23). O Isus čhivdža jekh tikni grupa ando naimenujime murša te organizujinen sa i buti koja avdije valjani te završini pe. Akija grupa o Isus vičindža „o verno hem o razborito robo.“ Olengi uloga tani te pomožinen tut te ove paše e Devleja hem te ačhove amal oleja. On ozbiljno dikhena ki pi odgovornost (Mat. 24:45-47). Jekh način sar o verni rob brinini pe tutar tano adžahar so postavindža e starešinen te brininen pe tutar hem te arakhen tut (Is. 32:1, 2; Jevr. 13:17; 1. Petr. 5:2, 3). O starešine ka čeren sa so šaj te utešinen  tut hem te pomožinen tuče te ove popaše e Jehovaja. Ama, on ka čeren pana jekh važno buti. On ka pomožinen tuče te sikave averen kotar o Jehova (Ef. 4:11-13).

17. Premalo Rimljanima 10:10, 13, 14, sose valjani te vačera averendže kotar o Jehova?

¹⁷ Pomožin averendže te barjačeren po mangipe premalo Jehova. O Isus phendža pe učenikonendže te sikaven averen ando Jehova (Mat. 28:19, 20). Šaj šunaja odija zapovest samo odolese so isi amen osećaj so hijam dužna te čera odova. Ama, sar barjola to mangipe premalo Jehova, hem tu ka osetine tut sar o apostolija o Petar hem o Jovan, kola phendže: „Amen našti a te na vačera ando odova so dikhljam hem so šundžam“ (Dela 4:20). Nane but buča kola čerena amen odobor bahtale sar soj tano ked nekase pomožinaja te počmini te mangel e Jehova. Zamislin kobor hine bahtalo o Filip ked pomožindža e etiopsko evnuhese te sikljol o čačipe hem te krstini pe. Ked oponašineja e Filipe hem ked šuneja e Isusesi zapovest te propovedine, tu ka mothove so mangeja te ove jekh kotar e Jehovase svedokija. (Čitinen Rimljanima 10:10, 13, 14.) Tegani verovatno hem tu ka puče tut isto so pučlja pe o etiopsko evnuh: „So sprečini man te krstinav man?“ (Dela 8:36).

18. So ka dikha ko aver članko?

¹⁸ Ked ka odlučine te krstine tut, odova ka ovel najvažno odluka koja andžan ko to dživdipe. Odolese so odova tano odobor važno, valjani pažljivo te razmisline so značini odija odluka. So valjani te džane ando krštenje? So valjani te čere angleder hem palo krštenje? Ko akala pučiba ka dobina odgovor ko aver članko.