28. ČLANKO PROUČIBASE
ĐILI 123 Verno te ićera amen ko teokratsko redo
Da li đaneja i razlika maškaro ćaćipe hem o hovajbe?
Oven zorale. Okolo struko phanen tumen o pojas ando ćaćipe (EF. 6:14)
SO KA SIKLJOVA?
Ka sikljova te razlikujina o ćaćipe kova sikljiljam ando Jehova hem o hovajba kola vaćerena o Satana hem amare protivnikija.
1. So mislineja ando ćaćipe?
E JEHOVASO narodo mangela o ćaćipe ando oleso Lafi. Odova ćaćipe tano temelji asi amari vera (Rimlj. 10:17). Amen hijam uverime so o Jehova ćhivđa i hrišćansko skupština „sar stubo hem oslonac ando ćaćipe“ (1. Tim. 3:15). Isto ađahar, amen hijam podložna okolenđe kola predvodinena maškaro amende. On pomožinena amen pošukar te haljova o ćaćipe andi Biblija hem dena amen uputstvija kola pomožinena amen te ćera e Devlesi volja (Jevr. 13:17).
2. Premali Jakovljeva 5:19, so šaj te ovel amencar palo odova so prihvatinđam o ćaćipe?
2 Ama, čak hem palo odova so prihvatinđam o ćaćipe hem so haljiljam kobor tano važno te sledina o vođstvo andi Jehovasi organizacija, šaj te desini pe te cida amen ando pravo drumo. (Čitin Jakovljeva 5:19.) O Beng bi najviše mangela te našala amaro poverenje ki Biblija ja te sumnjina ko uputstvija kola dobinaja andi Devlesi organizacija (Ef. 4:14).
3. Sose valjani te ićera amen ko ćaćipe? (Efešanima 6:13, 14)
3 Čitin Efešanima 6:13, 14. Pana hari, o Beng ka koristini jekh but opasno propaganda te ćhivel e manušen te irinen pe protiv o Jehova (Otkr. 16:13, 14). Isto ađahar, o Satana sigurno ka mangel hem amen te prevarini (Otkr. 12:9). Odolese tano važno te haljova koja tani i razlika maškaro ćaćipe hem o hovajbe hem te trudina amen uvek te ićera amen ko ćaćipe (Rimlj. 6:17; 1. Petr. 1:22). Amaro spasenje ki bari nevolja ka zavisini odolestar!
4. Sostar ka vaćera ko akava članko?
4 Ko akava članko ka razmotrina duj osobine kola ka pomožinen amen te penđara o ćaćipe kova avela ando Devleso Lafi hem te prihvatina o uputstvija kola avena andi Devlesi organizacija. Isto ađahar, ka dikha trin buća kola valjani te ćera te šaj hem ponodri te aćhova ko ćaćipe.
OSOBINE KOLA VALJANENA AMENĐE TE ŠAJ TE PENĐARA O ĆAĆIPE
5. Sar i dar ando Jehova pomožini amen te penđara o ćaćipe?
5 Dar ando Jehova. Ako isi amen ispravno dar ando Jehova amen odobor ka manga le so niked na ka ćera nešto so ka razočarini le. Odolese so mangaja te ugodina e Jehovase, amen hijam spremna te sikljova koja tani razlika maškaro odova soj tano šukar hem lošno hem maškaro ćaćipe hem o hovajbe (Posl. 2:3-6; Jevr. 5:14). Amen niked na valjani te mukha i dar ando manuš te ovel pobari ando amaro mangipe premalo Jehova, sose često odova soj tano ugodno anglo manuša nane ugodno anglo Jehovase jaćha.
6. Sar i dar ando manuša utičinđa upro deš uhodija?
6 Ako daraja pobuter ando manuša nego ando Jehova, tegani šaj te cida amen ando ćaćipe. Te razmotrina o primer kotar 12 poglavarija kola hine bićhalde te dikhen i Obećimi phuv koja o Jehova phenđa so ka del e Izraelcenđe. Deš đene olendar but darandilje. Olengi dar kotar Hanancija hine pobari nego olengo mangipe premalo Jehova. On phenđe e Izraelcenđe: „Amen našti te borina amen odole narodoja, sose tano pozoralo amendar“ (Br. 13:27-31). Anglo manušenge jaćha, o Hanancija izgledinđe but pozorale. Ama, ako bi bilo ko phenela so o Izraelcija našti te pobedinen pe dušmanen, tegani odija osoba na razmislinđa kobor tano zoralo o Jehova. Odola deš uhodija valjanđe te razmislinen ando odova so o Jehova manglja o Izraelcija te ćeren. Isto ađahar, on valjanđe te razmislinen ando odova sar o Jehova već pomožinđa lenđe. Tegani bi haljona so o Hanancija nane ništa ked uporedinena pe odoleja kobor tano o Jehova moćno. Ama, ki aver strana o Isus Navin hem o Halev na manglje te razočarinen e Jehova. Odolese phenđe e narodose: „Ako hijam pali Jehovasi volja, ov sigurno ka anel amen ki odija phuv ki koja thavdela avđin hem thud, hem ka del amen odija phuv“ (Br. 14:6-9).
7. So valjani te ćera te šaj te ovel amen dar ando Jehova? (Dikh i slika.)
7 Te šaj te ovel amen dar ando Jehova, angleder te ana disavi odluka valjani te razmislina so bi o Jehova mangela te ćera (Ps. 16:8). Đi čitineja disave izveštaija andi Biblija, puć tut: „Ked bi me ovava ki odija situacija, so bi ćerava?“ Na primer, zamislin so šuneja sar o deš uhodija vaćerena so o Izraelcija na ka uspinen te osvojinen i phuv Hanan. Da li bi verujineja lenđe hem počmineja te dara ando manuša? Ili to mangipe premalo Jehova hem i želja te ugodine lese bi pobedini ti dar? Nažalost, jekh celo generacija ando Izraelcija na verujinđe so o Isus Navin hem o Halev vaćerđe o ćaćipe hem odolese našalđe i prilika te khuven ki Obećimi phuv (Br. 14:10, 22, 23).
Kase bi verujineja? (Dikh o 7. odlomko)
8. Koja osobina valjani te da sa amendar te razvijina hem sose?
8 Poniznost. O Jehova mothovi o ćaćipe okolenđe soj tane ponizna (Mat. 11:25). Amen ponizno prihvatinđam avera te pomožinen amen te sikljova o ćaćipe (Dela 8:30, 31). Ama, valjani te pazina te na ova ponosna. Ako hijam ponosna, šaj te počmina te mislina so amaro mišljenje tano važno isto kobor hem e biblijake načelija hem o uputstvija andi Jehovasi organizacija.
9. Sar šaj te aćhova ponizna?
9 Te šaj te aćhova ponizna, na valjani niked te bistra kobor hijam tikne ked uporedinaja amen e Jehovaja (Ps. 8:3, 4). Isto ađahar, šaj te molina amen lese te aćhova ponizna hem te ova spremna te sikljova ando avera. O Jehova ka pomožini amenđe olese mislija te oven amenđe považna ando amaro mišljenje. Ov pe mislija otkrijini amenđe prekali Biblija hem i organizacija. Đi čitinaja i Biblija, valjani te dikha sar o Jehova mothovđa so mangela i poniznost, a mrzini o ponos hem i oholost. Posebno valjani te pazina te aćhova ponizna ked dobinaja disavo važno zadatko sebepi kova isi amen disavo autoritet.
SAR ŠAJ HEM PONODRI TE IĆERA AMEN KO ĆAĆIPE?
10. Prekalo kaste o Jehova dela smernice hem uputstvija pe narodose?
10 Hem ponodri nek ovel tut poverenje ko uputstvija andi Jehovasi organizacija. Ko purano vreme, o Jehova prekalo Mojsije hem palo odova prekalo Isus Navin dinđa uputstvija pe narodose (Is. Nav. 1:16, 17). O Izraelcija hine blagoslovime ked upro akala manuša dikhlje sar e Jehovase predstavnikija. Beršencar palo odova, ked hine formirimi i hrišćansko skupština, o 12 apostolija dinđe uputstvija (Dela 8:14, 15). Palo odova, ki odija grupa isto hine hem o starešine ko Jerusalim. Odolese so šunđe o uputstvija kola dobinđe, „o skupštine zorjaćerđe pe ki vera hem barilje ando dive ko dive“ (Dela 16:4, 5). Ko amaro vreme, hem amen šaj te ovel amen e Jehovaso blagoslov ked ićeraja amen ko uputstvija kola dobinaja andi Jehovasi organizacija. Ama, sar o Jehova osetini pe ako na prihvatinaja okolen kas ov ćhivđa te predvodinen? Te šaj te dobina odgovor ko odova pućibe, hajde najangleder te dikha so ulo e Izraelcencar ked valjanđe te đan ki Obećimi phuv.
11. So ulo okolencar kola na poštujinđe e Mojsije kole o Jehova ćhivđa te predvodini? (Dikh i slika.)
11 Đi hine ko drumo premali Obećimi phuv, disave manuša kola hine ko položaj na manglje te prihvatinen e Mojsije hem i uloga koja o Jehova dinđa le. On phenđe: „Celo akava narodo [a na samo o Mojsije] tano sveto, sa o manuša, hem o Jehova tano maškaro olende“ (Br. 16:1-3). Iako anglo Jehovase jaćha celo narodo hine sveto, o Jehova birinđa e Mojsije te predvodini maškaro oleso narodo (Br. 16:28). Odolese, ked kritikujinđe e Mojsije, on u stvari kritikujinđe e Jehova. On na razmislinđe odolestar so o Jehova mangela, već razmislinđe ando odova so on mangena – pobari moć hem pobaro položaj. O Devel uništinđa odole manušen hem sa okolen kola hine ki olengi strana (Br. 16:30-35, 41, 49). Amen šaj te ova sigurna so o Jehova ni avdije na prihvatini okolen kola na mothovena poštovanje premalo smernice kola dobinena andi olesi organizacija.
Kas bi podržineja? (Dikh o 11. odlomko)
12. Sose šaj te ovel amen poverenje ki Jehovasi organizacija?
12 Amen šaj te barjaćera amaro poverenje ki Jehovasi organizacija. Ked haljovaja so valjani te menina amaro razumevanje ando disavo biblijako ćaćipe ili diso ko način sar organizujinena pe amare aktivnostija, okola kola predvodinena odmah ćerena odova (Posl. 4:18). Odova ćerena odolese so mangena te ugodinen e Jehovase. On dena sa pestar olengi odluka te temeljini pe ko Devleso Lafi, kova tano merilo ko kova sa e Jehovase sluge valjani te ićeren pe.
13. Soj tano amenđe merilo ko sa hem sar odova pomožini amen te ićera amen ko ćaćipe?
13 „Ko sa nek ovel tuće merilo o ispravno sikljovibe“ (2. Tim. 1:13). „O ispravno sikljovibe“ odnosini pe ko sa odova so o Isus sikavđa amen hem nalazini pe ki Biblija (Jov. 17:17). Ov tano temelji aso sa odova ko so verujinaja. E Jehovasi organizacija podstaknini amen te ićera amen ko odova merilo. Sa đi ćeraja odova, ka ova blagoslovime.
14. Sose disave hrišćanija ćhinavđe te ićeren pe ko „ispravno sikljovibe“?
14 So šaj te desini pe ako „o ispravno sikljovibe“ nane amenđe merilo aso sa? Razmislin ando jekh primer. Ko prvo veko disave hrišćanija počminđe te širinen o hovajbe so e Jehovaso dive već reslja. Šaj postojinđa hem jekh lil ko kova hine phendo odova, a but manuša mislinđe so o Pavle pisinđa le. O hrišćanija ko Solun na izdvojinđe vreme te ispitinen o činjenice nego verujinđe ko odova hovajbe hem čak širinđe le. Ked ne bi bistrena o buća kola o Pavle sikavđa len đi hine olencar, on ne bi ovena prevarime (2. Sol. 2:1-5). O Pavle dinđa len savet te na verujinen ko sa so šunena. A te bi pomožini len‚ ko po dujto lil e hrišćanenđe ko Solun ov pisinđa: „Me, o Pavle, pisinava tumenđe akava pozdrav me vasteja. Odova tano mo potpis ko sa me lila – odova tano mo rukopis“ (2. Sol. 3:17).
15. Sar šaj te zaštitina amen ando hovajba kola šaj te dićhon soj tane tačna? Vaćer jekh primer. (Dikh o slike.)
15 So šaj te sikljova ando Pavlese lafija kola pisinđa e phralenđe ko Solun? Ked šunaja diso so na složini pe odoleja so sikljiljam ando Devleso Lafi ja ked šunaja disavi priča koja šokirini amen, valjani te mothova so hijam mudra. Ko bivšo Sovjetsko Savez, amare dušmanija dinđe e phralenđe jekh lil kova izgledinđa so avela ando phralja kotar glavno sedište. Odova lil podstakninđa disave phralen te odvojinen pe andi organizacija hem te ćeren jekh posebno organizacija. O lil izgledinđa ka phene ćaće avela ando phralja. Ama, amare phralen odova na prevarinđa. On haljilje so odova lil na složini pe odoleja so đi akana sikljilje. Avdije, amare dušmanija šaj te koristinen o internet ja o društvena mreže te buninen amen ja te ćeren podele maškaro amende. Odolese, umesto sigate te verujina, amen valjani pažljivo te razmislina da li odova so šunaja ili čitinaja složini pe odoleja so sikljiljam ando Devleso Lafi (2. Sol. 2:2; 1. Jov. 4:1).
Ma dozvolin te prevarinen tut o hovajba kola dićhona soj tane ćaće (Dikh o 15. odlomko) a
16. Premalo Rimljanima 16:17, 18, so valjani te ćera ako neko cidela pe ando ćaćipe?
16 Aćhov ko jekhipe okolencar soj tane verna e Jehovase. O Devel mangela te ova ko jekhipe. Amen šaj te aćhova ko jekhipe ako ićeraja amen ko ćaćipe. Svako ko cidela pe ando ćaćipe ćerela podele ki skupština. O Devel phenela amenđe: „Ciden tumen olendar“. Ako na cidaja amen olendar, šaj te počmina te verujina ko olenge hovajba hem te na verujina e Jehovase. (Čitin Rimljanima 16:17, 18.)
17. Sose tano šukar te penđara o ćaćipe hem te ićera amen ko odova so sikljovaja?
17 Ako penđaraja o ćaćipe hem ićeraja amen ko odova so sikljovaja, amen ka aćhova paše e Jehovaja hem amari vera ka ovel zorali (Ef. 4:15, 16). Na ka pera ki zamka te verujina ko Satanase hovajba. Isto ađahar, ked ka avel i bari nevolja ka ova bezbedna sose o Jehova ka brinini pe amendar. Odolese, ićer tut ko odova so sikljoveja ando Devleso Lafi hem „o Devel ando mir“ ka ovel tuvaja (Fil. 4:8, 9).
ĐILI 122 Oven zorale!
a SO DIKHAJA KI SLIKA: Jekh glumimi scena sar o phralja angleder but berša ko Sovjetsko Savez dobinđe jekh lil kova dićhilo ka phene avela ando glavno sedište, a u stvari hine ando dušmanija. Avdije, amare dušmanija šaj prekalo internet te širinen hovajbe andi Jehovasi organizacija.
