Pol: Ko novembar, ko 1985. berš hijam le ko drumo te đa ki Liberija, ki Zapadno Afrika, kuri hijam le bićhalde te služina sar misionarija. Amaro avioni terdilo ko Senegal. Tegani, i En phenđa: „Aso jekh sati resaja ki Liberija.“ Palo odova, šunđam jekh obaveštenje: „O manuša kola đana ki Liberija valjani te ikljon ando avioni. Disave manuša mangena te peraven i vlada uduri hem odolese našti te letina ki Liberija.“ Deš dive hijam le e misionarencar ko Senegal. Ko vestija šunđam so but manuša hine mudarde, so hine policijski čas hem so ako tegani hijan ki ulica o vlastija šaj hine te mudaren tut.

En: Amen hijam but oprezna. U stvari, kotar tiknipe, me hijum le penđardi sar darutni En. Darava hine čak ked bi nakhava i ulica. Ama, hijam le odlučna te đa ki Liberija, iako uduri hine but opasno.

Pol: I En hem me bariljam ko isto than, ki severno Engleska. Me roditeljija hem olaki daj uvek ohrabrinđe amen te ova pionirija. Odolese, samo so završinđam i srednjo škola uljam pionirija. On hine but bahtale so mangljam i pionirsko služba te ovel amari karijera. Ked hine man 19 berš, đeljum ko Betel. A ked venčinđam amen, alji hem i En ko 1982. berš.

En: Amen mangljam i betelsko služba, ama pobuter mangljam te služina uduri kaj tani pobari potreba. Ko Betel, ćerđam buti okolencar kola angleder služinđe sar misionarija. Olengo šukar primer hem olenge iskustvija barjaćerđe amari želja hem amen te ova misionarija. Trin berš svako rat molinđam amen aso odova. Odolese, hijam le but bahtale ked ko 1985. berš dobinđam poziv te đa ko 79. razred ki škola Galad. Dobinđam te đa ki Liberija, ki Zapadno Afrika.

Pol: Khuvđam ko prvo avioni kova đelo ki Liberija. Uduri o manuša darandilje hem pana hine policijski čas. O zvuk ando vorda hine dovoljno te daravi e manušen. Te šaj te ovel amen mir, svako rat čitinđam o Psalmija. Ama, ćaće mangljam amaro zadatko. I En svako dive đelji ki služba, a me ćerđum buti ko Betel e phraleja Džon Čaruk. a But  buća sikljiljum olestar sose but berša živinđa ki Liberija. Ov but šukar đanđa save okolnostija hem pharipa isi len amare phralja.

En: Sose odobor sigate zamangljam i Liberija? Sebepi amare phralja hem phenja. On mothovđe amenđe baro mangipe hem hine len bari vera. Uljam but paše olencar hem ulje amenđe sar porodica. Dinđe amen šuže savetija hem ohrabrinđe amen. I služba hine but šukar. O manuša bi hine holjanena ked na bi aćhovaja koro lende odobor kobor bi on mangena. Kotar god te irine tut, šaj hine te dikhe sar o manuša vaćerena andi Biblija. Odolese, hine amenđe lokho te vaćera olencar. Hine amen odobor kursija so našti hine te resa te proučina sarinencar. Ćaće hine but šužo područje.

Pol: Štar berš, ki odija phuv šaj te phena so hine mir. Ama, ko 1989. berš počminđa o građansko maribe. Ko 2. jul, ko 1990. berš okola so buninđe pe protiv i vlada osvojinđe o thana paše uzo Betel. Trin masek našti hine nikasa te ova ko kontakt, ni amare porodicaja ni e phralencar ando glavno sedište. Svugde hine nasilje, na hine amen so te ha hem but romnja hine silujime. Odija situacija trajinđa 14 berš.

En: O manuša ando disave plemenija borinđe pe hem mudarđe e manušen ando avera plemenija. Ki svako strana hine vojnikija. On hine čudno uravde, naoružime, khuvđe ko sa o ćhere hem lelje sa so manglje. Disavenđe odova so mudarđe e manušen hine ka phene mudarena e khanjen. O drumija hine blokirime hem često mudarđe okolen so manglje te nakhen. Palo odova, olenge telija ćhivđe jekh upro jekh. Odova čak desinđa pe paše uzo Betel. Amare verna phralja hine mudarde, maškaro lende hine hem duj misionarija.

Amare phralja rizikujinđe po životi ađahar so garavđe e phralen kola hine ando plemenija kolen o vojnikija manglje te mudaren. Odova isto ćerđe hem o betelitija hem o misionarija. Disave phralja kola morandilje te našen suće ko Betel. Disave ko prvo sprat ko hodnikija hem ko kancelarije, a disave amencar ko amare sobe ko dujto sprat. Ki amari soba suća jekh porodica ando efta đene.

Pol: Svako dive, o vojnikija alje ko Betel te dikhen da li nekas garavaja. Ked alje, duj đene đelje đi i kapija te vaćeren olencar, a duj ando prozori posmatrinđe. Ako okola duj kola đelje ki kapija ćhivđe pe vasta anglal, odova značinđa so o vojnikija na ka khuven andre. Ama, ako ćhivđe pe vasta  ko dumo, odova značinđa so o vojnikija tane agresivna. Odolese, okola so posmatrinđe ando prozori valjanđe sigate te garaven e phralen.

En: Jekh dive o phralja našti hine te ćhinaven e vojnikonen te khuven andre. Me hem jekh phen phanljam amen ko kupatilo. Odothe hine jekh ormari kova hine le jekh deo kaj šaj hine te garava amen. I phen garavđa pe othe. O vojnikija pištoljencar alje upre. On hine but holjame hem khuvđe ko udar. O Pol manglja te sprečini len te khuven hem phenđa lenđe: „Mi romni tani ko kupatilo.“ Me phanljum o deo ko ormari kaj i phen garavđa pe, ama odova but šundilo. Valjanđa maje vreme te irinav sa o buća andre. Hijum le sigurno so o vojnikija pućena pe so ćerava hem odolese počminđum te tresinav ando pro đi o šero. Sar te phravav o udar? Molinđum man ano mande hem rodinđum e Jehovastar te pomožini maje. Palo odova, phravđum o udara hem smireno pozdravinđum len. Jekh olendar gurinđa man ki strana hem đelo pravo ko ormari, phravđa le hem cidinđa sa so hine andre. Našti hine te verujini so ništa na arakhlja. Palo odova, rodinđe ko avera sobe hem ko tavani. Ama, ni uduri ništa na arakhlje.

Pol: Masekoncar hine amen but hari hajbase. Ama, i duhovno hrana ićerđa amen ko životi. O jutarnjo program ko Betel hine amaro jedino „doručak“. Sare đanđam so ako ka čitina hem ka proučina i Biblija, odova ka del amen snaga te istrajina svako dive.

Đanđam so ako ka đa te la habe hem pani, onda na bi šaj te zaštitina e phralen hem on šaj hine te oven mudarde. But putija, o Jehova ko pravo vreme dinđa amen odova so valjani amenđe hem odova ko jekh neverovatno način. Ov brininđa pe ando amare potrebe hem pomožinđa amen te aćhova smirime.

I situacija ki phuv hine sa pološno, ama o ćaćipe dinđa amen snaga. But putija o phralja hem o phenja morandilje te našen te bi spasinena po životi. Ama, olengi vera hem ponodri hine zorali hem hine len mir. Disave phenđe so akija situacija „spreminđa len asi bari nevolja“. O starešine hem o terne phralja hine hrabra hem ćerđe sa so šaj te pomožinen e phralenđe hem e phenjenđe. Okola so našlje pomožinđe jekh jekhese hem počminđe te propovedinen ko odola thana kaj đelje. On koristinđe sa so arakhlje ki šuma te ćeren skromna dvorane kuri ićerđe o sastankija. Ko odova pharo vreme, odova so o phralja hem o phenja đelje ko sastankija hem propovedinđe, dinđa len snaga hem but ohrabrinđa len. Ked igarđam lenđe hrana, šeja hem avera buća, but đene olendar rodinđe torbe asi služba, a na šeja. But manuša kola dikhlje hem doživinđe strašna buća ko maribe, manglje te šunen i šukar vest. On hine oduševime kobor o Svedokija hine bahtale hem pozitivna. O phralja hem o phenja hine sar svetlo ki tomina (Mat. 5:14-16). Odolese  so amare phralja hine revna, disave vojnikija kola hine but okrutna kasnije ulje amare phralja.

Pol: Podijekh puti, valjanđam te ikljova andi phuv. Trin putija kratko period, a duj putija celo berš. Jekh misionarka šukar opisujinđa sar tegani osetinđam amen. Oj phenđa: „Ko Galad sikavđe amen celone vileja te manga e phralen hem e phenjen uduri kaj hijam bićhalde. Amen odova ćerđam. Odolese, hine amenđe but pharo te mukha e phralen ki odija situacija.“ Ama, hijam le bahtale so šaj hine pana te pomožina len ando avera phuvja kola hine paše uzi Liberija.

En: Ko maj ko 1996. berš, me, o Pol hem pana duj đene leljam o vorda kotar Betel hem disave važna dokumentija ko kola hine o informacije kotar delo andi Liberija. Mangljam te vozina ko jekh pobezbedno than ki aver strana andi diz, kova hine 16 kilometrija dur. Ama, baš tegani o vojnikija pucinđe ko vazduho hem terđarđe amen. Amen trinen ikalđe ando vorda, a e Pole aćhavđe andre hem lelje o vorda. Hijam le šokirime. Kotar jekhvar, dikhljam sar o Pol avela nakro amende. Oleso šero hine sa ko rat. Amen hijam le zbunime hem odolese mislinđam so neko pucinđa ano leste. Ama, posle haljiljam so ako tano odova ađahar, ov na bi šaj te phirel. So u stvari hine? Jekh vojniko khuvđa le ked fordinđa le ando vorda. Srećaće, odija hine samo jekh tikni rana.

Othe paše hine jekh vojno kamioni kova hine pherdo manušencar kola but darandilje hem samo so na pođinđa. Amen mangljam te khuva andre, ama na hine than. Odolese, dolinđam amen ki spoljašnjo strana ando kamioni, a jedva arakhljam ko so te ićera amen. O vozači but sigate vozinđa hem harićkase hine ka pera. Molinđam le te terđol, ama ov andi dar na ćerđa odova. Nesar uspinđam te na pera, ama ked resljam hijam le but umorna hem sa tresinđam andi dar.

Pol: Ked resljam, amare šeja hine sa melale hem pharavde. Dikhljam jekh jekhe hem našti hine te verujina so hijam pana đivde. Odija rat, sućam ki jekh njiva. Uzo amende hine jekh helikopteri ko kova odobor hine pucimo so izgledinđa so pana hari ka raspadini pe. Oleja tajsato dive đeljam ko Sijera Leone. Hijam le zahvalna so hijam đivde, ama but brininđam amen ando amare phralja hem phenja kolen aćhavđam ki Liberija.

En: Bezbedno resljam ko Betel ko Fritaun, ko Sijera Leone hem uduri o phralja but šukar brininđe pe amendar. Ama, kotar jekhvar počminđa te irini pe maje ki godi sa odova so doživinđum ki Liberija. Svako dive darandiljum so diso strašno ka desini pe hem našti hine jasno te razmislinav. Sa uzo mande hine maje sar suno. Raćate, često uštinđum hem počminđum te tresinav sose but darandiljum. Hine maje pharo čak te dišinav. O Pol ićerđa man ki pi angalja hem molinđa pe mancar. Đilabđam amare đilja sa đi na smirinđum man. Mislinđum so dilindiljum hem so našti više te služinav sar misionari.

Niked na ka bistrav so pana desinđa pe. Odova kurko dobinđam duj neve časopisija. Jekh hine o Probudite se! ando 8. jun 1996. berš. Koro leste hine jekh članko kova hine le naslov: „Boriti se s napadima panike“. Akana haljiljum so desini pe mancar. O dujto hine i Stražarsko kula ando 15. maj 1996. berš, koja hine la jekh članko e temaja: „Odakle dobijaju snagu?“ Ko odova članko hine jekh slika ando jekh povredimo leptiri. Othe hine objasnimo so jekh leptiri šaj hem ponodri te letini hem te hranini pe, iako olese phakha tane ozbiljno oštetime. Isto ađahar, uzo Jehovaso duho amen šaj hem ponodri te pomožina averenđe, iako našalđam amari snaga odolese so doživinđam but lošna buća ko životi. Prekalo akala člankija, o Jehova ko pravo vreme dinđa man odova so valjanđa maje (Mat. 24:45). Rodinđum pana disave slična člankija hem ćedinđum len ki jekh fascikla. On but pomožinđe maje. Palo disavo vreme uljum pošukar.

Pol: Ked god aljam palem ki Liberija, hijam le but bahtale. Ko krajo ando 2004. berš, uduri hijam le skoro 20 berš. Đi tegani o maribe završinđa pe hem hine planirimo te gradini pe i podružnica.  Ama, baš tegani o phralja zamolinđe amen te prihvatina jekh aver zadatko.

Odova hine amenđe but pharo. Odobor hijam le paše e phralencar odothe so hine amenđe sar porodica hem na hine amenđe lokho te mukha len. Ama, dikhljam sar o Jehova angleder pomožinđa amen ked morandiljam te aćhava amare porodicen te đa ko Galad. Odolese, prihvatinđam o nevo zadatko. Akana hijam le bićhalde ki Gana.

En: But runđam ked đeljam amenđe andi Liberija. Hijam le but iznenadime ked o Frenk, jekh mudro hem phuro phral, phenđa amenđe: „Valjani te bistren amen.“ Palo odova, objasninđa ko so mislinđa: „Đanaja so niked na ka bistren amen, ama akana celone vileja valjani te mangen e phralen hem e phenjen ki Gana. O Jehova ađahar mangela, odolese brininen tumen olendar.“ Olese lafija pomožinđe amen te ova spremna te arakha neve amalen ki phuv kuri samo nekobor manuša đanđe amen hem kuri hine amenđe sa nevo.

Pol: Ama, na valjanđa amenđe but vreme te zamanga e phralen ki Gana. Uduri hine but Svedokija. But buća sikljiljam olendar sose hine len bari hem zorali vera. Palo odova so 13 berš služinđam ki Gana, dobinđam aver zadatko. Hijam le zamolime te služina ki Istočno Afrika, ki podružnica ki Kenija. Iako but nedostajinđe amenđe o phralja andi Gana hem andi Liberija, sigate uljam but paše e phralencar andi Kenija. Uduri isto tani but bari potreba.

En: Ko životi nakhljum but pharipa hem podijekh puti osetinđum but bari dar. Ked živineja ko jekh opasno than, šaj te naborsaljove hem te našalje ti snaga. Našti te očekujina e Jehovastar te zaštitini amen ando odola buća. Čak hem akana ked šunava so neko pucini, dolela man i muka hem trnonena me vasta. Ama, sikljiljum te osloninav man ki Jehovasi pomoć, a ov but putija pomožini maje prekalo phralja hem phenja. Haljiljum so ako redovno proučinaja, molinaja amen, đaja ko sastankija hem ki služba, o Jehova šaj te pomožini amen te aćhova odothe kuri služinaja.

Pol: Disavo puti o manuša pućena amen: „Da li volinena tumaro zadatko?“ Amen mangaja o phuvja kaj služinaja sose tane but šuže, ama šaj te oven but nestabilna hem opasna. Odolese, odova so najviše mangaja tane amare phralja hem phenja. Iako avaja ando različita thana hem kulture, sare mangaja e Jehova. Amen mislinđam so hijam bićhalde te ohrabrina olen, ama u stvari on ohrabrinđe amen.

Amaro jekhipe tano sar čudo ando Jehova. Sa đi hijam deo andi jekh skupština isi amen porodica hem ćher. Uverime hijam so ako hem ponodri osloninaja amen upro Jehova, ov ka del amen snaga te istrajina bizo obzir so desini pe (Fil. 4:13).