O Devel vičini sa e manušen te moljinenpe te šaj te oven popaše oljeja (Psalam 65:2). Ama, Ov na mangela hem na šunela svako molitva, na primer o molitve ando jekh rom kova tano grubo ja marela pe romnja (1. Petareso 3:7). Isto adžahar, ked o Izraelcija čerdže lošnipe, o Devel na manglja te šunel oljenge molitve. Čače tani bari čast te moljinamen. Čak ked jekh manuš čerela baro greh, ama perela pišmani, o Devel ka šunel oljese molitve. Čitinen Isaija 1:15; 55:7.

Dikh o kratko film Da li Bog sluša sve molitve?

I molitva tani but važno te šaj te služina e Devljese, odoljese valjani te moljinamen samo e Jehovase sose ov čerdžamen (Matej 4:10; 6:9). Isto adžahar, amen hijam nesavršena. Odoljese valjani te moljinamen prekalo Isuseso nav, kova mulo amendže te šaj te oprostinenpe amare grehija (Jovan 14:6). O Jehova na mangela te sikljova amare molitve ki godi hem te vačera sa isto. Ov mangela viljestar te moljinamen. Čitinen Matej 6:7 hem Filipskonendže 4:6, 7.

Amaro Stvoritelj šaj te šunel čak ked moljinamen ano amende (1. Samueleso 1:12, 13). Ov mangela te moljinamen svako dive, na primer sabalje hem račate, angljeder te ha maro hem ked isimen pharipa. Čitinen Psalam 55:22 hem Matej 15:36.

Nane lokho te ova paše e Devljeja, sose živina maškaro manuša kola na verujinena koro oljeste. On marena muj ked šunena so Ov dija po lafi so ka ovel rahati ki Phuv (2. Timotejese 3:1, 4 hem 2. Petareso 3:3, 13). Odoljese  valjani te ova e manušenca kola isto sar amende verujinena ko Devel, te šaj te zorjačera jekh jekhe. Čitinen Jevrejendže 10:24, 25.

Ked hijam e manušenca kola mangena e Devlje, odova ka pomožinimen te ova popaše e Devljeja. Esavke manušen šaj te arakha ko Jehovase svedokonenge sastankija, on šaj te zorjačeren amari vera. Čitinen Rimskonendže 1:11, 12.

Amen ka ova popaše e Jehova ked hor razmislina ando sa so sikljiljam kotar oljeso Lafi. Tegani dikha sa so čerdža, sa oljese savetija hem sa so ka čerel ko vakti so avela. Ked hor razmislina dži moljinamen, odova šaj te pomožinimen viljestar te cenina e Devljeso mangipe hem oljesi mudrost. Čitinen Ješua 1:8 hem Psalam 1:1-3.

Amen šaj te ova popaše e Devljeja samo ako isimen vera koroljeste. I vera tani sar jekh luludi, olače valjani svako dive te čhorelpe pani te šaj te barjol. Adžahar hem amen šaj te bajačera amari vera, ked svako dive razmislina sose verujina ko Devel. Čitinen Matej 4:4 hem Jevrejendže 11:1, 6.

O Jehova akhari gajlja okoljendar kola mangenalje. Ov šaj te arakhiljen ando sa so šaj te našalji oljengi vera hem i nada te živinen večno (Psalam 91:1, 2, 7-10). O Jehova sikavimen sar pošukar te živina hem sar te arakhamen ando buča kola šaj te našaljen amaro bahtaljipe hem amaro sastipe. Čitinen Psalam 73:27, 28 hem Jakoveso 4:4, 8.