Να τθεράσα λόγος τι πακιάς ότι, σάντε επειδή να ισινέ οτθέ κάνα ο Ιησούς κερντάς πρώτη φαρ ο Δείπνος ι Κυριόσκο, ο 70 μαθητές να κερένας λέσκο γκι ή παρατιντέας-λες. Ο Ιησούς απλά μανγκέλας τι αβέλ πι αποστολόντζαρ ανταλέ περιπτωσιάτε.

Εμ ο 12 εμ ο 70 κερένας ι Ιησούσκο γκι. Τραμπιντάς πρώτα μπουτέ μαθητένταρ 12 μουρσέν, σο ντινάς-λεν ο ναβ απόστολοι. (Λουκ. 6:12-16) Ισινέ κι Γαλιλαία κάνα «ντινάς βίκος ι 12 αποστολόν» ντα «μπουτσσαντάς-λεν τι μουτθαβέν ο λατσσέ αμπέρια ι Ντεβλέσκε Βασιλειάκερε ντα τι σαστιαρέν». (Λουκ. 9:1-6) Πο σοράν, κι Ιουδαία, ο Ιησούς «τραμπιντάς 70 γιαβερέν ντα μπουτσσαντάς-λεν ντούι ντούι». (Λουκ. 9:51· 10:1) Άρα, ο Ιησούς τθερέλας μαθητέν σε διάφορα τθανά σο βακερένας ο λατσσέ αμπέρια.

Ο Ιουδαίοι σο αβιλέ μαθητές ι Ιησούσκε συνεχιντέ τι κερέν ο Πάσχας κάθε μπρες, λογικά πουμαρέ φαμιλίντζαρ. (Έξοδ. 12:6-11, 17-20) Χάνικ πριν τι μερέλ ο Ιησούς, βοβ ντα λέσκε απόστολοι γκιλέ κι Ιερουσαλήμ. Αλλά να μανγκλάς σαρέ πι μαθητένταρ τι αβέν κατά Ιουδαία, κατά Γαλιλαία ντα κατά Περαία για τι κερέν γιεκ λέσαρ ο Πάσχας. Ντικχίντιβελα ότι ο Ιησούς μανγκέλας τι αβέλ πι αποστολόντζαρ ανταλέ περιπτωσιάτε. Βακερντάς λένγκε: «Μπουτ μανγκάβας τι χαβ ανταβά Πάσχας τουμέντζαρ πριν τι τσσίνταβ μπουτ».—Λουκ. 22:15.

Τθερέλας πο λόγος ανταλέσκε. Ο Ιησούς ατζεχάνικ κα μερέλας σαρ «ο Μπρακό ι Ντεβλέσκο σο νασκιαρέλα ι αμαρτία ι ντουνιάσκι». (Ιωάν 1:29) Ανταβά κα αβέλας-πες κι Ιερουσαλήμ, σο οτθέ ντιντιόνας θυσίες κο Ντεβέλ κατά πουρανέ μπρεσά. Ο μεριπέ ι Ιησούσκο κα κερέλας κάτι πο μπαρό οντουλέσταρ σο αβιλό-πες κι ιράτ σο ο Ισραηλίτες χαλέ ο μπρακό ντα ο Ιεχωβά νικαντάς-λεν κατά Αίγυπτος. Ο Ιησούς κα νικαβέλας σαρέ ι ντουνιάς κατά αμαρτία ντα κατά μεριπέ! (1 Κορ. 5:7, 8) Επειδή ο Ιησούς ντινάς πι ζωή, ο δώδεκα απόστολοι κα μπορίνενας τι αβέν σαρ θεμέλιος ι Χριστιανικέ κχανγκιριάκο. (Εφεσ. 2:20-22) Ισί σουκάρ ότι η άγια πόλη Ιερουσαλήμ τθερέλα «12 μπαρά σαρ θεμέλιος» σο τθερένα γραμμέ οπρά-λέντε «ο 12 ναβά ι 12 αποστολόνγκε ι Μπρακέσκε». (Αποκ. 21:10-14) Βα, ο πιστοί απόστολοι κα τθερέν σημαντικός ρόλος για τι νικιόλ μπαγιά ο σκοπός ι Ντεβλέσκο. Αγαβάσα λοιπόν ότι ο Ιησούς μανγκέλας τι τθερέλ-λεν πέσαρ για τι κερέν γιεκ ο τελευταίος Πάσχας ντα οντουβά σο αβιλό-πες σοράν—ο Δείπνος ι Κυριόσκο.

Ο 70 ντα ο γιαβερά μαθητές να ισινέ οτθέ γιεκ ι Ιησούσαρ. Όμως, σαρέ ο μαθητές σο ισινέ πιστοί κα ντικχένας λατσσιπέ κατά Δείπνος ι Κυριόσκο. Σαρέ ο μαθητές σο αβιλέ σοράν χρισμέ Χριστιανοί κα λένας μέρος κι συμφωνία εκχέ βασιλειάκε, οντουλάτε σο βακερντάς ο Ιησούς κο απόστολοι οντιά ιράτ.—Λουκ. 22:29, 30.