LEKTIONA 44
Feste und Feiertage — Har dikell o Dewel ap lende?
O Jehowah kamell, kai hi menge o djipen shukar. Leske hi ninna shukar, te feirah un khelah. Aber dikell lo ap haki Festa und hako Feiertago latches? Har nai sikrah mer ninna pash sawo koowa maro kamlepen ap i Jehoweste?
1. Hoske dikell o Jehowah gar ap haki Feira un hako Feiertago latches?
Djineh tu, kai bud Feire und Feiertage dran o chocheno patsepen wenna? Oft djal kote ninna pral koowa, hoi gar dran i bibla wella, har kanna kai djiwell i djido ducho mendar pal o merepen dureder. An kowa, hoi ap sawe diwessa kerdo wella, hi ninna bengeskro koowa, Spiritismus un Aberglaube dre (Jesaja 65:11). O Jehowah penell doleske: “Djan kolendar krik, kai sharenn wawar koowa! Ma awenn lentsa khetne! Lenn tchi an tumare wasta, hoi hi pale-tchiddo glan mire jakka” (2. Korintarja 6:17). a
2. Har dikell o Jehowah ap Feiertage, te wenn menshe sharedo?
O Jehowah dell men trad, te ma tchiwas maro patsepen ap menshende (Dik pal an Jeremia 17:5). Kote denn ninna Nationalfeiertage un Feiertage, kai wenn raja, Nationalhelden un Nationalsymbole sharemen (1. Johanni 5:21). Pale wawar unterstützrenn politiktike oder sozialtike Bewegunge. Har wals i Jehoweske kowa, te sharams mer menshen oder organisatione, hoi genau o Gegenteil von kowa krenn, hoi job kamella?
3. Hoi krell, kai hi i Festo an i Jehoweskre jakka buder gar mishto?
I bibla dell men trad, te ma pijas men mates, un te kras kek wilde Partys (1. Petro 4:3). Pash sawo koowa nai dell wi-ladjedo koowa, hoi men an i Jehoweskre jakka tchikles krella. Mer te kamah mala i Jehowestar te atchell, hunte rikras mer men krik sawo koomastar.
RODAS DUREDER
Kanna dikeh, har te kress pash Feste und Feiertage i Entscheidunga, hoi i Jehowes bachteles krella.
4. Ma dja ap Feste und Feiertage, hoi an i Jehoweskre jakka tchilatcho hin
Dikenn pal an Remarja 12:2, un rakrenn khetne pral:
-
Hoi hunte djinas mer, te kamah ap i Festa te djal, oder i Feiertago te feirell?
-
Hawe Feste und Feiertage denna kote, kai tu djiweh?
-
Hoi penals tu: Dikell o Jehowah latches ap lende?
Djinal tu, kai i bibla kek lab pral i patsleste tchinella, kai peskro Geburtstago feiras? Pral kokres dui Geburtstage well an i bibla tchinlo, un kola dui mangan gar ap i Jehoweste. Dikenn pal an 1. Mose 40:20-22, un Mateo 14:6-10, un rakrenn khetne pral:
-
Hoi djas pash hake dui Geburtstage?
-
Te dikeh ap kola dui berichte: Har dikell o Jehowah ap Geburtstage?
Putcheh tu tut kanna: Hi i Jehoweske kowa tchatchepah jaake schlimm, te djau me ap i Geburtstago, oder i wawar Feira, hoi unbiblisch hi? Dikenn pal an 2. Mose 32:1-8, un dikenn o VIDEO, un rakrenn khetne pral:
-
Hoske hi kowa wichtig, te djinas, ob te akzeptierell o Jehowah sawe Feste und Feiertage?
-
Har nai hatsah kowa win?
Har te djiness nai, hoi o Dewel pral Feste und Feiertage denkrella
-
Djal kowa gegen kowa, hoi i bibla penella? Rode, hoi o Ursprung hi.
-
Wenn menshe, organisatione oder symbole sharemen? Mer sharah i Jehowes o budester. Mer patsah, kai lell job kola probleme mari phubjatar krik.
-
Hin kola, kai wenna, un ko Brauchtum, hoi kerdes wella, an i harmonia mit i bibla? Mer hunte atchas djudjes an mari morala.
5. Tu nai kreh, kai respektierenn wawar tiro patsepen
Ko nai well phares, te kamenn wawar, te feiress lentsa tchomone, ap hoi o Jehowah gar latches dikella. Hoi te kress palle? Penn lenge an o latchepen, hoi tu patseh — jaake har an ko video. Dikenn o VIDEO.
Dikenn pal an Mateo 7:12, un rakrenn khetne pral:
-
Wals kowa mishto, te penals tu ap tiri familjate, hoi jon derfte feirenn, un hoi te mukenn le hunte?
-
Har nai sikreh tu tiri familjake, kai kameh len o djiestar, ninna te feireh lentsa bude gar bestimmt Feste und Feiertage?
6. O Jehowah kamell, te was bachteles
O Jehowah kamell, kai hi men shukar momente mari familjah un mare malentsa. Dikenn pal an Sikepaskro 8:15, un rakrenn khetne pral:
-
Hoi kamell o Jehowah menge?
O Jehowah kamell, kai hin leskre menshe bachteles, un kai hi len i shukar tsiro. Dikenn o VIDEO, kote sikrell pes kowa ap mare Internationaltike Kongresse.
Dikenn pal an Galatarja 6:10, un rakrenn khetne pral:
-
Hunte well men i Feiertago, te nai “kras latcho koowa” wawarenge?
-
Hoi hi tuke shukeder: Te hunte dess tu jekeske tchomone, weil te hi i Feiertago, oder te deh jekeske tchomone, weil te kameh kowa?
-
Bud Rakepangre i Jehowestar organisierenn pengre tchawenge ab und zu tchomone besonderes. Te hi tut tchawe: Hoi nai krals lenge?
BUD PENENNA: “Ko hi jek, hawo Ursprung pash Feste und Feiertage hi. Ko djala kokres pral kowa, te was i familjah un malentsa khetne.”
-
Hoi penals tu ap kowa?
HOI KATE PENLO WAS
O Jehowah kamell, kai hi men i shukar tsiro mari familjah un mare malentsa, un te rikras men krik von sawe Feste und Feiertage, hoi an leskre jakka tchilatcho hin.
Hoi penals tu?
-
Hoi nai putchah mer men, te djinas, har o Jehowah ap Feste und Feiertage dikella?
-
Hoi nai krah, te haiwell mari familja un mare mala maro Standpunkt pral Feste und Feiertage feteder?
-
Hoske djinah mer, kai kamell o Jehowah, kai hi men wawarentsa shukar momente?
BUDEDER
Kate hatseh i tikni lista, hoi christe gar feirenna.
“Hoske krenn Jehoweskre Rakepangre bestimmt Feiertage gar?” (I artikla online)
Kate hatseh, hoske o Dewel gar mishto ap Geburtstage dikella.
“Hoske feirenn Jehoweskre Rakepangre kek Geburtstago?” (I artikla online)
Kate dikeh, har i terno tchawo an i sikepaskri pral peskro patsepen un i Weihnachte rakrella.
Kate drawereh nai, har kola bud millione christenge kowa hi, kai feirenn jon kek Weihnachte.
“Jon hatsan tchomone feteder” (O Gardeskro Kheer, Dezember 1, 2012)
a Dik ninna pal an O Palstuno Tchinepen 5, te djiness, har te reagieress nai, te hi i Festa oder i Feiertago.
