Иоано 11:1-57
11 Андэ кодэя время занасвайля ек мануш, савэс ақарэнас Ла́зарё. Во сас анда Вифа́ния — када гав, кай жувэнас и Мария и латири ԥэй Ма́рфа.
2 Када сас кодэя Мария, сави вишутя пэ пэрнэ лэ Учителёсти* о ароматно вулей и виқосля лэн пэстирэ балэнца. Ай о Ла́зарё, саво занасвайля, сас лако ԥрал.
3 Кадэла ԥэя бишалдэ манушэн тэ ԥэнэн лэ Исусости: «Учителё, кодэва, ко тути куч, занасвайля».
4 О Исусо, кала ашундя када, ԥэндя: «Кадэва насвалимос най кай во тэ мэрэл, ай кай о Дэл и лэско Шаво тэ ашэн май ашунглэ».
5 Лэ Исусости сас куч и Ма́рфа, латири ԥэй и о Ла́зарё.
6 Но во, кала уӷангля, кай о Ла́зарё насвало, заритярделя котэ, кай сас, инке пэ дуй дес.
7 Тоди во ԥэндя лэ учениконэнди: «Авэн упалэ андэ Иуде́я».
8 И ученикоря ԥэндэ лэсти: «Учителё*, кати найдэлмут и иудейски мануша камлэ тэ помарэн тут барэнца, и ту упалэ интя камэс тэ жас?»
9 О Исусо ԥэндя лэнди: «Хэба о дес жал най 12 часов? Ко ԥирэл десэ, во никай на дэлапэдап, важ кода кай диқэл кадэла люмако свето.
10 Ай ко ԥирэл и рят, во дэлпэдап, важ кода кай находийпэ андэ тэмнота».
11 Посли када во инке ԥэндя: «Амаро друӷо о Ла́зарё засутя, но мэ жав лэс тэ жунгавав».
12 И ученикоря ԥэндэ лэсти: «Учителё, если во совэл, тоди лэсти ашэла фэдэр».
13 О Исусо дэлас дума пала кода, кай во муля, ай вонэ погиндосардэ, кай во ԥэндя пала обычно суно.
14 Тоди о Исусо ԥэндя лэнди ворта: «О Ла́зарё муля.
15 И мэ лошало, кай ман котэ на сас, важ кода кай акана тумэ лэна инке май састэс тэ патян. Авэн каринг лэстэ».
16 О Фама́, пэ саво ԥэнэнас Близнецо, ԥэндя аврэ учениконэнди: «Жаса и амэ, кай тэ мэрас лэса».
17 Кала о Исусо авеля, во уӷангля, кай прожыля ужэ штар дес, сар лэ Лазарёс притидэ́*.
18 И Вифа́ния сас найдур лэ Иерусалимостар, машкар лэндэ сас варикай трин километроря*.
19 И бут иудеёря авелэ, кай тэ авэн паша* Ма́рфа и Мария, савэ ровэнас пала пэско ԥрал.
20 Кала и Ма́рфа ашундя, кай жал о Исусо, вой вижыля каринг лэстэ, ай и Мария ашэляпэ цэрэ.
21 И Ма́рфа ԥэндя лэ Исусости: «Учителё, тэ авелоп ту катэ, мэрно ԥрал авелоп жундо.
22 Но мэ и акана патяв: вся, со ту мангэса лэ Дэвлэстар, во дэла тути».
23 О Исусо ԥэндя лати: «Тиро ԥрал упалэ лэла тэ жувэл».
24 И Ма́рфа ԥэндя лэсти: «Ӷанав, кай упалэ лэла тэ жувэл, кала и мулэ жундёна андо послиднё дес».
25 О Исусо ԥэндя лати: «Мэ жундярав и дав и жызня. Ко патял андэр мандэ, дажэ если во мэрэла, жундёла,
26 и кажно, ко жувэл и патял андэр мандэ, никала на мэрэла. Патяс ту кадэлэсти?»
27 Вой ԥэндя: «Да, Учителё. Мэ патяв, кай ту Христос, лэ Дэвлэско Шаво, саво трэбуй сас тэ авэл андэ люма».
28 Посли када вой жыля, кай тэ ақарэл пэстиря ԥья ла Мария. Вой ԥэндя ек лати: «О Учителё катэ. Во ақарэл тут».
29 И Мария, кала ашундя када, сразу тай взбий и тай жал каринг о Исусо.
30 О Исусо инке на зажыля андо гав, ай сас котэ, кай диқляпэ ла Марфаса.
31 И иудеёря, савэ авелэ кай и Мария андо цэр, кай тэ авэн паша латэ*, додиқлэ, кай вой ля тэ грабийпэ и вижыля анда цэр. Вонэ жылэ пала Мария, важ кода кай погиндосардэ, кай вой жал пэ мулэ* тэ ровэл пала пэско ԥрал.
32 И Мария, кала авеля каринг о Исусо и додиқля лэс, пэля паша лэстирэ пэрнэ и ԥэндя: «Учителё, тэ авелоп ту катэ, мэрно ԥрал авелоп жундо».
33 Кала о Исусо додиқля, кай вой и авэр иудеёря, савэ авелэ ласа, ровэн, во ԥарэс пэрэԥурдяпэ и лэсти ашэля фартэ найдраго по ди.
34 Во пушля: «Кай тумэ лэс стодэ?» Вонэ ԥэндэ лэсти: «Учителё, авэн, и екжэно диқэса».
35 И о Исусо заровья.
36 Тоди и иудеёря линэ тэ ԥэнэн: «Диқэн, сар дэ куч во сас лэсти!»
37 Ай дэсавэ андар лэндэ ԥэнэнас: «Во жэ исцэлисардя лэ корэс! Хэба во не моӷ тэ стерэл кадя, кай кадэва мануш тэ на мэрэл?»
38 О Исусо упалэ ԥарэс пэрэԥурдяпэ и пашэля каринг и моӷилка. Када сас пещера, сави сас ԥандади барэса.
39 О Исусо ԥэндя: «Вилэн о бар». И Ма́рфа, савятэ на ашэля лэ ԥралэс, ԥэндя лэсти: «Учителё, прожыля ужэ штар дес, и, файма, и тила ужэ қандэл».
40 О Исусо ԥэндя лати: «Хэба мэ тути на ԥэндэм, кай, если лэса тэ патяс, диқэса, сар лэ Дэвлэстар марэл и бах?»
41 О бар вилинэ. О Исусо вазгля и яқа каринг о небо и ԥэндя: «Дадэ, блаӷодарисарав тут, кай ту ман ашундян.
42 Мэ ӷанав, кай ту вся и время ман ашунэс, но мэ ԥэндэм када, кай о миро, саво катэ тердёл, тэ патял, кай ту бишалдян ман».
43 Потом о Исусо зацыписайля: «Ла́зарё, вижа!»
44 И во вижыля. Лэстирэ вас и пэрнэ сас обмотымэ кирпаса, ай лэско муй сас ушарадо қоснэса. О Исусо ԥэндя: «Росԥандэн лэс и мэк во жал».
45 Посли када бут иудеёря, савэ авелэ каринг и Мария и додиқлэ, со стердя о Исусо, патяе андэр лэстэ.
46 Но дэсавэ андар лэндэ жылэ каринг и фарисеёря и пала вся лэнди росԥэндэ.
47 Тоди и барэ рашая и фарисеёря стидэ́ всаворэ́ сындомарен анда Ӷлавно иудейско сындо* и ԥэндэ: «Кадэва мануш терэл бут чудеса. Со амэнди тэ терас?
48 Если амэ нисо на тераса, всаворэ патяна андэр лэстэ. Тоди авэна и ри́мляноря и захутилэна амаро свынто ҭан и амарэ народос».
49 Машкар лэндэ сас о Кая́фа, саво андэ кодэва бэрш сас ӷлавно рашай. Во ԥэндя лэнди: «Тумэ нисо на полэн!
50 Хэба тумэ на диқэн: када важ тумэндэ фэдэр, кай ек мануш тэ хындёл пала народо, чем тэ хындёл вся о народо?»
51 Ай ԥэндя во када най корко пэстар: андэ кодэва бэрш во сас ӷлавно рашай, кочай о Дэл через лэстэ дя тэ ӷанэн, кай о Исусо трэбуй тэ мэрэл пала народо —
52 тэ мэрэл най кати важ о народо, но и важ кода, кай тэ стидэл андэ ек ӷурто лэ Дэвлэстирэ бэятонэн, савэ сас росшутэ.
53 Кодэла времятар вонэ линэ тэ гиндон, сар лэс тэ умарэн.
54 Важ када о Исусо будэр на ԥирэлас англа всаворэ машкар и иудеёря. Во ужылятар андо форо Ефре́мо*, савэстар найдур сас и пустыня, и ашэласпэ котэ лэ учениконэнца.
55 Ай андэ кодэя время пашолас и иудейско Патради, и бут мануша авелэ анда гава андо Иерусалимо, кай тэ ашэн вужэ англа празнико.
56 Вонэ родэнас лэ Исусос и дэнас дума машкар пэстэ андэ қандири: «Сар тумэ гиндон, можэт, во совсем на авэла по празнико?»
57 Ай и барэ рашая и фарисеёря приԥэндэ: кажно, ко уӷанэна, кай находийпэ о Исусо, трэбуй тэ ԥэнэн пала када, кай вонэ тэ хутилэн лэс.
Сноски
^ Или «лэ Барэ Хуласти». Катэ и май дур андэ кадэя ӷлава.
^ Ворта «рави́».
^ Или «о Ла́зарё пашлёл андэ моӷилка».
^ Или «тэ подритярэн».
^ Или «тэ подритярэн».
^ Или «каринг и моӷилка».
^ Ворта «Синедрёно».
^ Или «Ефраи́мо».
