Иоано 16:1-33
16 Мэ ԥэнав тумэнди када, кай тумэ тэ на парашэн тэ патян*.
2 Тумэн вишона анда синагога, и авэла время, кала и мануша, савэ лэна тэ умарэн тумэн, гиндона, кай кадя вонэ уӷодин лэ Дэвлэсти.
3 Вонэ лэна тэ терэн кадя важ кода, кай на ӷанэн ни лэ Дадэс, ни ман.
4 Мэ ԥэнав када тумэнди, кай, кала авэла кадэя время, тумэнди тэ авэн по гиндо мэрнэ алава, савэ мэ ԥэнавас тумэнди.
Мэ на ԥэндэмас пала када май данглал, важ кода кай сымас тумэнца.
5 Акана мэ жав каринг кодэва, ко ман бишалдя, но нико андар тумэндэ на пушэл: „Каринг ту жас?“
6 Тумэнди по ди ашэля ԥарэс мэрнэ алавэндар.
7 Но патян манди: мэ ужавтар важ тумари блаӷополучия. Важ кода кай если мэ на ужаватар, тоди о помошнико* на авэла каринг тумэндэ, ай если ужаватар, то бишалава лэс каринг тумэндэ.
8 Кала во авэла, во ворта сыкавэла ла люмати, ко терэл бэзэх, ко терэл правильно и кас аштярэл о сындо*.
9 Спэрва во ворта сыкавэла, ко терэл бэзэх, важ кода кай и мануша на патян андэр мандэ;
10 посли када — ко терэл правильно, важ кода кай мэ жав каринг о Дад и тумэ будэр на диқэна ман;
11 ай потом — кас аштярэл о сындо, важ кода кай лэ правителёсти, кастэ андэ вас кадэя люма,* виандярдо о приӷоворо.
12 Мэ моӷу инке бут со тэ ԥэнав тумэнди, но щас тумэ не сможэте када тэ полэн.
13 Каринг тумэндэ авэла о помошнико — када лэ чачимаско зор. Во лэла тэ андярэл тумэн, кай тумэ андэ вся тэ полэн о чачимос, важ кода кай во дэла дума най корко пэстар. Во дэла дума кода, со ашунэл, и росԥэнэна тумэнди, со трэбуй тэ авэл.
14 Через лэстэ мэ ашава май ашунгло, важ кода кай во росԥэнэна тумэнди кода, со мэ ԥэндэм лэсти.
15 Вся, со исин кай о Дад, прижал манди. Кочай мэ и ԥэндэм, кай во росԥэнэна тумэнди кода, со мэ ԥэндэм лэсти.
16 Прожала набут время, и тумэ ужэ на диқэна ман, ай потом прожала инке набут время — и тумэ диқэна ман».
17 Тоди дэсавэ анда лэстирэ ученикоря линэ тэ пушэн ек еқэстар: «Сар тэ полас лэстирэ алава „Прожала набут время, и тумэ ужэ на диқэна ман, ай потом прожала инке набут время — и тумэ диқэна ман“ и „мэ жав каринг о Дад“?»
18 Вонэ нащи додэнас: «Сар тэ полас „инке набут время“? Амэ на полас, пала со во дэл дума».
19 О Исусо ӷанэнас, кай вонэ камэн тэ роспушэн лэстар пала када, кочай ԥэндя лэнди: «Тумэ пушэн ек еқэстар, васо мэ ԥэндэм: „Прожала набут время, и тумэ ужэ на диқэна ман, ай потом прожала инке набут время — и тумэ диқэна ман“?
20 Чаче ԥэнав тумэнди: тумэ лэна тэ ровэн и тэ ӷолосын, ай и люма лэла тэ лошавэл. Тумэ помэкэна о муй, но потом лэна тэ радуинпэ.
21 Кала важ и жувли поджал и время тэ анэн бэятос, вой фартэ мучийпэ. Но кала о бэято арақаделя, тоди вой бистрэл, сар лати сас ԥарэс: вой лошавэл, кай пэ люма авеля бэято.
22 Кадя и тумэ щас помэкэн о муй, но, кала мэ упалэ тумэн диқава, тумэ залошавэна, и нико нисо на стерэла, кай тумэ тэ парашэн тэ лошавэн.
23 Андэ кодэва дес тумэ ни пала со на лэна мандар тэ пушэн. Патян: вся, со тумэ мангэна лэ Дадэстар через мэрно алав, во дэла тумэнди.
24 Идоси тумэ нисо на мангэнас через мэрно алав. Мангэн — и тумэнди авэла дино, кай па чачимастэ тэ лошавэн.
25 Мэ ԥэнав тумэнди када через и примероря. Но поджал и время, кала мэ на залава и дума дурал*, ай ворта росԥэнава тумэнди пала Дад.
26 Андэ кодэва дес тумэ лэна тэ мангэн лэ Дадэстар через мэрно алав. Мэ на ԥэнав тумэнди, кай лава тэ мангав важ тумэндэ.
27 Ай о Дад любий тумэн, важ кода кай тумэ любин ман и патян, кай мэ авелэм лэ Дэвлэстар.
28 Мэ авелэм андэ люма лэ Дадэстар. Ай акана мэ ужав анда люма и жав каринг о Дад».
29 Лэстирэ ученикоря ԥэндэ: «Акана ту дэс дума ворта и на залэс и дума дурал*,
30 и амэ диқас, кай ту ӷанэс вся и ӷанэс, со андо гиндо кай о мануш, инке жы каринг кода, сар во варисо тутар тэ пушэл. Кочай амэ патяс, кай ту авелян лэ Дэвлэстар».
31 О Исусо ԥэндя лэнди: «Акана тумэ патян?
32 Пашол и время, и вой ужэ поджыля, кала тумэ всаворэ порознашэнапэ па цэра и ашавэна ман екжэнэс. Но мэ най екжэно, важ кода кай манца о Дад.
33 Мэ ԥэндэм тумэнди када, кай через мандэ тумэнди по ди тэ авэл спокойно. Андэ люма тумэн аштярэл ԥари время, но авэн састэ*! Мэ биросардэм и люма».
Сноски
^ Или «тэ на дэнпэдап».
^ Или «кодэва, ко дэла зор». О Исусо ԥэнэн пала свынто зор, сар пала варисо жундо.
^ Или «лэ Дэвлэско сындо».
^ Или «лэ хуласти пэ кадэя люма».
^ Или «через и примероря».
^ Или «на призындярэс нисавэ примероря».
^ Или «смили».
