Свынто тайна 3:1-22
3 Пистросар лэ ӷуртостирэ анӷелости анда Са́рды: „Акэ со ԥэнэн кодэва, кастэ лэ Дэвлэстирэ семь зора и семь черӷая: ‚Мэ ӷанав, сави дила ту терэс. Здэлпэ, ту жундо, но па чачимастэ ту муло.
2 Отшув и линдра и састяр кода, со ашэляпэ и чуть на хынделя, важ кода кай мэ на диқав, кай ту тэ терэс вся и дила, сави аштярэл тутар мэрно Дэл.
3 Згиндосар пала кода, со тути дорэсляпэ и со ту ашундян, фэрисар када и каисав. Ай если на прошосапэ, мэ авава сар чор, и ту на уӷанэса, андэ сави время када авэла.
4 Но мэ ӷанав, кай тутэ андэ Са́рды исин кодэла, ко на маӷрисардя пэстири ӥда. Вонэ лэна тэ ԥирэн манца андэ парни ӥда, важ кода кай вонэ ашэн када.
5 Кодэва, ко победия, авэла утидо андэ парни ӥда, и мэ никала на стрисарава лэско алав анда ла жызняко лил, мэ прижанава лэс* англа мэрно Дад и англа лэстирэ анӷелоря.
6 Внимательно ашун, со о зор ԥэнэн лэ ӷуртонэнди‘“.
7 Пистросар лэ ӷуртостирэ анӷелости анда Филадэ́льфия: „Акэ со ԥэнэн кодэва, ко свынто и чачуно, кастэ исин лэ Давидостири тия (кода, со во ԥэрнавэл, нико не можэт тэ ԥандавэл, и кода, со во ԥандавэл, нико не можэт тэ ԥэрнавэл):
8 ‚Мэ ӷанав, сави дила ту терэс. Мэ ԥэрнадэм англа тутэ и вудар, сави нико на ԥандавэла. Мэ ӷанав, кай ту най фартэ зорало, и всаек ту на хасардян мэрно алав и на отԥэнделян мандар*.
9 Ай лэ Сатанастирэ учениконэн*, савэ ԥэнэн пэр пэстэ евреёря (но вонэ най евреёря, вонэ хохавэн), мэ застависарава тэ авэн и тэ тэлён тути андэ пэрнэ, и вонэ уӷанэна, кай ту мандэ андо ди*.
10 Ту на бистэрдян о алав пала кода, сар мэ пэрэандярдэм о ԥаримос*, кочай мэ фэрисарава тут андэ ԥари время, сави ӥто авэла важ вся и ԥув, кай тэ дицол лэ манушэндири дила.
11 Мэ ӥто авава. Састэс ритяр кода, со тутэ исин, кай нико тэ на одлэл тутар тири блаӷословения*.
12 Кодэлэс, ко победия, мэ стерава столбоса андэ мэрнэ Дэвлэстири қандири, и во ашэлапэ котэ пэ вся и вечность. Мэ пистросарава пэр лэстэ мэрнэ Дэвлэско алав, и мэрнэ Дэвлэстирэ фороско алав, лэ Нэвэ Иерусалимоско, саво змэкэлпэ па небо мэрнэ Дэвлэстар, и мэрно нэво алав.
13 Внимательно ашун, со о зор ԥэнэн лэ ӷуртонэнди‘“.
14 Пистросар лэ ӷуртостирэ анӷелости анда Лади́кия: „Акэ со ԥэнэн о Аминь, о кандино и о чачуно* свидетелё, пэрво, кас создал о Дэл:
15 ‚Мэ ӷанав, сави дила ту терэс: ту ни шудро, ни ԥабардо. Фэдэр тэ авелоп ту шудро или ԥабардо!
16 Но важ кода кай ту най ԥабардо и най шудро, ай тато, мэ вишава тут анда муй.
17 Ту ԥэнэс: ‚Мэ барвало, бут затердэм и манди нисо на трэбуй‘, но на ӷанэс, кай па чачимастэ ту бибахтало, тринэ мардэнго, чоро, коро и нанго.
18 Важ када приашундюв каринг мэрно совето и тин мандар вужо сомнак*, кай тэ ашэс барвало, и парни ӥда, кай тэ утидэспэ и кай англа авэр тути тэ на ашэл лажаво тирэ нангимастар, ай кадяжэ тин қои важ и яқа, кай тэ диқэс.
19 Мэ лажаварав и спушав всаворэндар, ко мандэ андо ди*. Важ када пристов о зор и каисав.
20 Мэ тердював паша вудар и стучисарав. Мэ зажава андо цэр каринг кодэва, ко ашунэла мэрно ӷласо и ԥэрнавэла и вудара, и амэ вместе бэшаса пала мисяйля.
21 Кодэва, ко победия, бэшэла паша мандэ пэ мэрно троно, сар и мэ бэшлэм мэрнэ Дадэса пэ лэско троно, кала победисардэм.
22 Внимательно ашун, со о зор ԥэнэн лэ ӷуртонэнди‘“.
Сноски
^ Ворта «лэско алав».
^ Или «мэрнэ алавэстар».
^ Или «кодэлэн, ко анда лэ Сатанастири синагога».
^ Или «мэ глаба пала тутэ».
^ Или, можэт, «ашэлянпэ састо андэ ԥари время кадя жэ, сар мэ».
^ Или «наӷрада». Ворта «винко».
^ Или «надёжно».
^ Или «сомнак, савэс вужардэ ягаса».
^ Или «пала кастэ мэ глаба».
